എസ്.എൻ.ഡി.പി യോഗം കേന്ദ്ര കമ്പനി നിയമത്തിന് കീഴിലെന്ന് റിപ്പോർട്ട്; വോട്ടിംഗ് രീതിയിലെ ഇളവും തുടരും

കൊച്ചി: എസ്.എൻ.ഡി.പി യോഗം പൂർണമായും 2013ലെ കേന്ദ്ര കമ്പനി നിയമത്തിന്റെ പരിധിയിൽ വരുന്നതാണെന്ന് കേന്ദ്ര കമ്പനികാര്യ മന്ത്രാലയത്തിന്റെ റിപ്പോർട്ട്. 1961ലെ കേരള നോൺ ട്രേഡിംഗ് കമ്പനീസ് ആക്ട് യോഗത്തിന് ബാധകമല്ലെന്നും മന്ത്രാലയം വ്യക്തമാക്കിയിട്ടുണ്ട്. യോഗം ഏത് നിയമത്തിന്റെ പരിധിയിലാണ് പ്രവർത്തിക്കേണ്ടതെന്ന തർക്കത്തിലാണ് റിപ്പോർട്ട് നിർണായകമാകുന്നത്.

എസ്.എൻ.ഡി.പി യോഗത്തിന് കേന്ദ്ര നിയമം ബാധകം

200 അംഗങ്ങൾക്ക് ഒരു പ്രതിനിധി എന്ന രീതിയിലുള്ള വോട്ടിംഗ് സംവിധാനത്തിന് 1974ൽ അനുവദിച്ച ഇളവ് ഇപ്പോഴും പ്രാബല്യത്തിലുണ്ടെന്നും കമ്പനികാര്യ മന്ത്രാലയത്തിലെ അഡീഷണൽ സെക്രട്ടറി അംശുമാൻ പട്നായിക് തയ്യാറാക്കിയ റിപ്പോർട്ടിൽ പറയുന്നു.

മെമ്മോറാണ്ടം ഓഫ് അസോസിയേഷൻ, ആർട്ടിക്കിൾസ് ഓഫ് അസോസിയേഷൻ എന്നിവയിലെ ഭേദഗതികൾക്കും വാർഷിക റിപ്പോർട്ടുകൾ സമർപ്പിക്കുന്നതിനും ഉൾപ്പെടെയുള്ള നടപടികൾക്കായി എസ്.എൻ.ഡി.പി യോഗം കമ്പനി രജിസ്ട്രാറെയാണ് സമീപിക്കേണ്ടത്.

മറ്റ് സംസ്ഥാനങ്ങളിലും ഇന്ത്യയ്ക്ക് പുറത്തും യോഗം പ്രവർത്തിക്കുന്നതിനാൽ കേന്ദ്ര കമ്പനി നിയമമാണ് ബാധകമെന്നും റിപ്പോർട്ടിൽ വിശദീകരിക്കുന്നു.

സുപ്രീംകോടതിയുടെ നിർദ്ദേശത്തെ തുടർന്ന് റിപ്പോർട്ട്

എസ്.എൻ.ഡി.പി യോഗം ഏത് നിയമത്തിന്റെ പരിധിയിലാണ് വരുന്നതെന്ന് പരിശോധിക്കാൻ കേരള ഹൈക്കോടതി ഡിവിഷൻ ബെഞ്ച് കേന്ദ്ര കമ്പനികാര്യ മന്ത്രാലയത്തോട് നിർദ്ദേശിച്ചിരുന്നു. ഈ ഉത്തരവിനെ ചോദ്യം ചെയ്തുള്ള അപ്പീലിലാണ് സുപ്രീംകോടതി ഇടപെട്ടത്.

ബന്ധപ്പെട്ട എല്ലാ കക്ഷികളെയും കേട്ട് നവംബർ 19ന് മുമ്പ് തീരുമാനമെടുക്കാനായിരുന്നു സുപ്രീംകോടതിയുടെ നിർദ്ദേശം. എസ്.എൻ.ഡി.പി യോഗം, ചീഫ് സെക്രട്ടറി, രജിസ്ട്രേഷൻ വകുപ്പ് ഐ.ജി. എന്നിവരടക്കം എട്ട് കക്ഷികളുടെ വാദം കേട്ട ശേഷമാണ് മന്ത്രാലയം റിപ്പോർട്ട് തയ്യാറാക്കിയത്.

നവംബർ 19ന് സുപ്രീംകോടതി കേസ് വീണ്ടും പരിഗണിക്കും. അതിന് മുമ്പ് റിപ്പോർട്ട് കോടതിയിൽ സമർപ്പിക്കുമെന്നാണ് വിവരം.

റിപ്പോർട്ടിനെ സ്വാഗതം ചെയ്ത് വെള്ളാപ്പള്ളി നടേശൻ

എസ്.എൻ.ഡി.പി യോഗത്തെ റിസീവർ ഭരണത്തിലാക്കാൻ ശ്രമിച്ചവർക്കുള്ള മറുപടിയാണ് കേന്ദ്ര കമ്പനികാര്യ മന്ത്രാലയത്തിന്റെ റിപ്പോർട്ടെന്ന് യോഗം ജനറൽ സെക്രട്ടറി വെള്ളാപ്പള്ളി നടേശൻ പ്രതികരിച്ചു.

200 അംഗങ്ങൾക്ക് ഒരു പ്രതിനിധി എന്ന രീതിയിലുള്ള പ്രാതിനിധ്യ വോട്ടവകാശം അംഗീകരിച്ചതും സ്വാഗതാർഹമാണെന്ന് അദ്ദേഹം വ്യക്തമാക്കി.

English Summary:

The Union Ministry of Corporate Affairs has stated in its report that the SNDP Yogam is fully governed by the Companies Act, 2013, and not by the Kerala Non-Trading Companies Act, 1961. The report also says the voting concession granted in 1974, allowing one representative for every 200 members, remains in force. The Supreme Court is scheduled to hear the matter again on November 19.