കോക്രോച്ച് ജനതാ പാർട്ടിയിൽ ആദ്യ വിമതനീക്കം; പുതിയ വിഭാഗവുമായി മനീഷ് ബ്രഹ്മഭട്ട്

ന്യൂഡൽഹി: അഭിജീത് ദിപ്കേ നയിക്കുന്ന കോക്രോച്ച് ജനതാ പാർട്ടിയിൽ (സിജെപി) ആദ്യ വിമതനീക്കം. മുൻ വൊളന്റിയറായ മനീഷ് ബ്രഹ്മഭട്ട് ‘കോക്രോച്ച് ജനതാ പാർട്ടി–ഡെമോക്രാറ്റിക്’ (സിജെപി-ഡി) എന്ന പുതിയ വിഭാഗം രൂപീകരിച്ചു.

യുവാക്കളുടെ പ്രസ്ഥാനത്തെ ദിപ്കേ തനിക്കിഷ്ടമുള്ളവരെ മാത്രം ഉൾപ്പെടുത്തി ‘കേജ്രിവാൾ ടീം’ ആക്കിയെന്നാണ് ബ്രഹ്മഭട്ടിന്റെ ആരോപണം. സിജെപി നേതൃത്വത്തിൽ മുൻപ് ആം ആദ്മി പാർട്ടിയിൽ പ്രവർത്തിച്ചവരാണ് കൂടുതലെന്നും അദ്ദേഹം ആരോപിച്ചു.

കോക്രോച്ച് ജനതാ പാർട്ടിക്കെതിരെ ഗുരുതര ആരോപണങ്ങൾ

ബിജെപിയെ എതിർക്കുക മാത്രമാണ് സിജെപി നേതൃത്വത്തിന്റെ ലക്ഷ്യമെന്നാണ് ബ്രഹ്മഭട്ട് ആരോപിച്ചത്.

‘രാഷ്ട്രീയ കച്ചവടങ്ങൾ നടത്തുകയാണ് സിജെപിയുടെ ലക്ഷ്യം. വിദ്യാർഥികളോ ജനങ്ങളോ നേരിടുന്ന പ്രശ്നങ്ങൾക്കായി പോരാടാൻ അവർക്ക് താൽപര്യമില്ല. കേജ്രിവാളിന്റെ നിർദേശപ്രകാരം ബിജെപിയെ എതിർക്കാനാണ് അവർ പ്രവർത്തിക്കുന്നത്’– ബ്രഹ്മഭട്ട് വാർത്താ ഏജൻസിയായ എഎൻഐയോട് പറഞ്ഞു.

നേതൃത്വ ഘടനയിലും വിമർശനം

സിജെപിയുടെ നേതൃത്വത്തിലുള്ള ടീമിന്റെ ഘടനയെയും ബ്രഹ്മഭട്ട് ചോദ്യം ചെയ്തു. ജന്തർ മന്ദിർ പ്രക്ഷോഭത്തെ പിന്തുണച്ച ആളുകൾക്കോ വിഭാഗങ്ങൾക്കോ നേതൃത്വത്തിൽ പ്രാതിനിധ്യം നൽകിയിട്ടില്ലെന്നാണ് ആരോപണം.

ദിപ്കേ ദേശീയ കൺവീനറായി സിജെപി ദേശീയ വർക്കിങ് കമ്മിറ്റി രൂപീകരിച്ചിരുന്നു. കമ്മിറ്റിയിൽ ദിപ്കേയോട് അടുപ്പമുള്ളവർക്ക് മുൻഗണന നൽകിയെന്നും സമരത്തിൽ പങ്കെടുത്തവരുമായി കൂടിയാലോചിച്ചില്ലെന്നും ബ്രഹ്മഭട്ടും കൂട്ടരും ആരോപിച്ചിരുന്നു.

പുതിയ വിഭാഗം രൂപീകരിച്ചത് ആരോപണങ്ങൾക്ക് പിന്നാലെ

നേതൃത്വ ഘടനയെച്ചൊല്ലിയുള്ള വിമർശനങ്ങൾക്കു പിന്നാലെയാണ് മനീഷ് ബ്രഹ്മഭട്ടും കൂട്ടരും പുതിയ സംഘടനാ വിഭാഗം രൂപീകരിച്ചത്.

ബ്രഹ്മഭട്ട് ഗുജറാത്ത് സ്വദേശിയാണെന്നാണ് മാധ്യമ റിപ്പോർട്ടുകൾ. സിജെപിക്കുള്ളിലെ ആദ്യ വിമതനീക്കമായാണ് പുതിയ വിഭാഗത്തിന്റെ രൂപീകരണം വിലയിരുത്തപ്പെടുന്നത്.

English Summary

The Cockroach Janata Party (CJP), led by Abhijeet Dipke, has witnessed its first internal rebellion. Former volunteer Manish Brahmabhatt has formed a new faction called Cockroach Janata Party-Democratic (CJP-D). He accused the CJP leadership of turning the youth movement into a “Kejriwal team” by favouring people close to Dipke. Brahmabhatt also questioned the party’s leadership structure and alleged that groups supporting the Jantar Mantar protest were not adequately represented.