പ്രകൃതി പാർക്ക് എന്ന ആശയം യാഥാർഥ്യമാക്കി ശ്രദ്ധേയനാവുകയാണ് ചാലക്കുടിയിലെ 66-കാരനായ വർക്കി. സ്വന്തം അധ്വാനവും സൃഷ്ടിപരമായ ആശയങ്ങളും ചേർത്ത് 25 വർഷം കൊണ്ട് ഒന്നരയേക്കർ സ്ഥലത്തെ പ്രകൃതിയും പൈതൃകവും സമന്വയിപ്പിച്ച കൗതുകലോകമാക്കി അദ്ദേഹം മാറ്റിയിരിക്കുകയാണ്.
പ്രകൃതി പാർക്കിൽ കുളങ്ങളും ഗുഹകളും നക്ഷത്രവനവും
ചാലക്കുടി പോട്ട പനമ്പിള്ളി കോളേജിന് സമീപത്തെ പാരമ്പര്യ വീട്ടുവളപ്പിലാണ് വർക്കി ഈ പ്രകൃതി പാർക്ക് ഒരുക്കിയത്.
നിഴൽ വിരിച്ച മരങ്ങൾക്കിടയിൽ ചെറുതും വലുതുമായി 16 കുളങ്ങൾ, കുളത്തിന് നടുവിലൂടെ മുളപ്പാലം, പൈതൃകത്തെ ഓർമിപ്പിക്കുന്ന ഗുഹകളും മുനിയറകളും ഇവിടത്തെ പ്രധാന ആകർഷണങ്ങളാണ്.
മൃഗങ്ങളും പക്ഷികളും സ്വതന്ത്രമായി വിഹരിക്കുന്ന ആവാസവ്യവസ്ഥ
ഗിനിപ്പന്നികൾ, മുയലുകൾ, വാത്തകൾ, പ്രാവുകൾ, കോഴികൾ തുടങ്ങി നിരവധി ജീവികൾ സ്വതന്ത്രമായി സഞ്ചരിക്കുന്ന രീതിയിലാണ് പാർക്ക് ഒരുക്കിയിരിക്കുന്നത്.
കൂടാതെ, 27 നക്ഷത്രങ്ങൾക്കനുസരിച്ചുള്ള മരങ്ങൾ നട്ടുപിടിപ്പിച്ച് നക്ഷത്രവനവും സൃഷ്ടിച്ചിട്ടുണ്ട്. സ്വന്തമായി നിർമ്മിച്ച കുളങ്ങളിൽ കാരി, കൂരി തുടങ്ങിയ മത്സ്യങ്ങളെയും വളർത്തുന്നുണ്ട്.
More Read
കൗതുകങ്ങളുടെ ആർക്കിടെക്ട് വർക്കി
സൗദി അറേബ്യയിൽ 16 വർഷം ജോലി ചെയ്ത ശേഷം നാട്ടിലെത്തിയ വർക്കി പിന്നീട് എൽ.ഐ.സി ഏജന്റായാണ് പ്രവർത്തിച്ചത്.
ഭാര്യ ലിസിയും മകൾ രേഷ്മയും ഒപ്പമുണ്ടായതോടെ സന്ദർശകരെ ആകർഷിക്കുന്ന പുതിയ ആശയങ്ങൾ യാഥാർഥ്യമാക്കി. പക്ഷിക്കൂടുകൾ നിർമ്മിക്കാൻ പഴയ ചട്ടികൾ, കലങ്ങൾ, ചിമ്മിനിക്കട്ടകൾ തുടങ്ങിയ പുനരുപയോഗ വസ്തുക്കളാണ് ഉപയോഗിച്ചത്.
വേരുകൾകൊണ്ട് ഏറുമാടം; ലിംക റെക്കോർഡും നേട്ടവും
പി.വി.സി പൈപ്പിൽ മണ്ണ് നിറച്ച് അത്തിമരത്തിന്റെ വേരുകൾ വളർത്തിയെടുത്ത ശേഷമാണ് അതുപയോഗിച്ച് മരത്തിൽ ഏറുമാടം നിർമ്മിച്ചത്.
ഏറുമാടത്തിലേക്ക് കയറാനുള്ള ഗോവണിയും വേരുകൾകൊണ്ടുതന്നെയാണ് നിർമിച്ചിരിക്കുന്നത്. മുളയിൽ നിർമ്മിച്ച മറ്റൊരു ഏറുമാടവും ഇവിടെയുണ്ട്. ഈ സവിശേഷ മനുഷ്യനിർമിത ആവാസവ്യവസ്ഥയ്ക്ക് രണ്ട് ലിംക ബുക്ക് ഓഫ് റെക്കോർഡ് ഉൾപ്പെടെ മുപ്പതോളം പുരസ്കാരങ്ങളും ലഭിച്ചിട്ടുണ്ട്.
വിദ്യാർത്ഥികൾക്കും സന്ദർശകർക്കും പ്രിയപ്പെട്ട ഇടം
ഈ പ്രകൃതി പാർക്ക് കാണാൻ വിവിധ പ്രദേശങ്ങളിൽ നിന്നായി വിദ്യാർത്ഥികളും പ്രകൃതിസ്നേഹികളും എത്തുന്നുണ്ട്.
സന്ദർശകരിൽ നിന്നും വിദ്യാർത്ഥികളിൽ നിന്നും ചെറിയ പ്രവേശന ഫീസ് ഈടാക്കുന്നതാണ് പാർക്കിന്റെ പ്രധാന വരുമാന മാർഗമെന്ന് വർക്കി പറയുന്നു.
