അമ്പലപ്പുഴ: സർക്കാർ ആശുപത്രികളിലെ പേ വാർഡ് സൗകര്യം ഇനി ബിപിഎൽ വിഭാഗത്തിൽപ്പെട്ട രോഗികൾക്കും ലഭിക്കും. പേ വാർഡ് അനുവദിക്കുന്നതിനുള്ള വരുമാനപരിധി മാനദണ്ഡം ഒഴിവാക്കി സർക്കാർ ഉത്തരവിറക്കി. നിശ്ചിത മുറിവാടക അടച്ച് സാമ്പത്തികമായി പിന്നാക്കം നിൽക്കുന്നവർക്കും ഇനി പേ വാർഡിൽ പ്രവേശനം നേടാം.
ഒ.പി. ടിക്കറ്റിലെ വരുമാനരേഖ ഇനി മാനദണ്ഡമല്ല
കേരള ഹെൽത്ത് റിസർച്ച് ആൻഡ് വെൽഫെയർ സൊസൈറ്റിക്ക് (കെ.എച്ച്.ആർ.ഡബ്ല്യു.എസ്.) കീഴിലുള്ള പേ വാർഡുകളിൽ പ്രവേശനം അനുവദിക്കുന്നതിന് ഒ.പി. ടിക്കറ്റിൽ രേഖപ്പെടുത്തുന്ന പ്രതിമാസ വരുമാനമായിരുന്നു ഇതുവരെ പ്രധാന മാനദണ്ഡം. ഈ വ്യവസ്ഥയാണ് പുതിയ സർക്കാർ ഉത്തരവിലൂടെ ഒഴിവാക്കിയത്.
ജനറൽ വാർഡിലെ ചികിത്സാസേവനങ്ങൾ തുടരും
പേ വാർഡിൽ പ്രവേശിപ്പിച്ചാലും ജനറൽ വാർഡിൽ ലഭിക്കുന്ന ചികിത്സാസേവനങ്ങൾ രോഗികൾക്ക് നിഷേധിക്കാൻ പാടില്ലെന്ന് ഉത്തരവിൽ വ്യക്തമാക്കിയിട്ടുണ്ട്. പേ വാർഡിൽ കഴിയുന്നതിന്റെ പേരിൽ ചികിത്സയ്ക്ക് അധിക നിരക്ക് ഈടാക്കാനും പാടില്ല.
കാസ്പ്, കാരുണ്യ ഗുണഭോക്താക്കൾക്കും ആശ്വാസം
കാസ്പ്, കാരുണ്യ ബെനവലന്റ് ഫണ്ട്, ബിപിഎൽ വിഭാഗങ്ങളിൽ ഉൾപ്പെടുന്ന രോഗികൾക്ക് ഇതുവരെ പേ വാർഡ് സൗകര്യം ലഭിച്ചിരുന്നില്ല. ഇവർക്ക് ജനറൽ വാർഡുകളിലായിരുന്നു ചികിത്സ ലഭിച്ചിരുന്നത്.
പുതിയ ഉത്തരവോടെ ഈ വിഭാഗങ്ങളിൽപ്പെടുന്നവർക്കും നിശ്ചിത മുറിവാടക നൽകി പേ വാർഡ് ഉപയോഗിക്കാം. അതേസമയം, ബന്ധപ്പെട്ട ഇൻഷുറൻസ്, സഹായധന പദ്ധതികളുടെ വ്യവസ്ഥകൾക്ക് വിധേയമായി ചികിത്സാസേവനങ്ങളും ആനുകൂല്യങ്ങളും തുടർന്നും ലഭിക്കും.
English Summary: Kerala has removed the income eligibility restriction for pay ward admission in government hospitals under KHRWS. BPL patients and beneficiaries of KASP and Karunya schemes can also use pay wards by paying the prescribed room rent, while remaining eligible for applicable treatment benefits.
