യുവാക്കളുടെ തൊഴിലില്ലായ്മയിൽ കേരളം ഒന്നാമത്; നിരക്ക് 28.9 ശതമാനം

തിരുവനന്തപുരം: രാജ്യത്തെ യുവാക്കൾക്കിടയിലെ തൊഴിലില്ലായ്മയിൽ കേരളം ഒന്നാമതെന്ന് ദേശീയ കണക്ക്. 15 മുതൽ 29 വയസ്സുവരെയുള്ളവരുടെ തൊഴിലില്ലായ്മാ നിരക്ക് സംസ്ഥാനത്ത് 28.9 ശതമാനമാണ്. 

നടപ്പ് സാമ്പത്തിക വർഷത്തിലെ ജൂലൈ–സെപ്റ്റംബർ പാദത്തിൽ പുറത്തുവന്ന കണക്കുകളിലാണ് കേരളത്തിലെ യുവജന തൊഴിലില്ലായ്മയുടെ ഉയർന്ന നിരക്ക് വ്യക്തമാകുന്നത്.

നഗരമേഖലകളിലെ യുവാക്കൾക്കിടയിലെ തൊഴിലില്ലായ്മ ദേശീയതലത്തിൽ കഴിഞ്ഞ ആറു പാദങ്ങളിലെ ഏറ്റവും ഉയർന്ന നിലയിലെത്തിയതും ആശങ്ക വർധിപ്പിക്കുന്നു.

നഗരങ്ങളിലെ യുവജന തൊഴിലില്ലായ്മ 18.9 ശതമാനം

നാഷണൽ സ്റ്റാറ്റിസ്റ്റിക്സ് ഓഫീസ് (NSO) പുറത്തുവിട്ട പീരിയോഡിക് ലേബർ ഫോഴ്സ് സർവേയുടെ (PLFS) കണക്കുകൾ പ്രകാരം,

 രാജ്യത്തെ നഗരമേഖലകളിൽ 15–29 പ്രായവിഭാഗക്കാരുടെ തൊഴിലില്ലായ്മാ നിരക്ക് മുൻ പാദത്തിലെ 18.2 ശതമാനത്തിൽനിന്ന് 18.9 ശതമാനമായി ഉയർന്നു.

അതേസമയം, ഗ്രാമീണ മേഖലയിൽ ഈ വിഭാഗത്തിലെ തൊഴിലില്ലായ്മ 14.7 ശതമാനത്തിൽനിന്ന് 13.6 ശതമാനമായി കുറഞ്ഞു. 

ഇതിന്റെ ഫലമായി ഗ്രാമീണ, നഗര മേഖലകൾ ചേർത്തുള്ള രാജ്യത്തെ യുവജന തൊഴിലില്ലായ്മാ നിരക്ക് 15.9 ശതമാനത്തിൽനിന്ന് 15.3 ശതമാനമായി താഴ്ന്നു.

കേരളത്തിൽ യുവാക്കൾക്കിടയിൽ ഏറ്റവും ഉയർന്ന നിരക്ക്

സംസ്ഥാനങ്ങൾ തിരിച്ചുള്ള കണക്കുകളിലാണ് കേരളത്തിന്റെ സ്ഥിതി കൂടുതൽ ശ്രദ്ധേയമാകുന്നത്. 15–29 പ്രായവിഭാഗത്തിൽ 28.9 ശതമാനമാണ് കേരളത്തിലെ തൊഴിലില്ലായ്മാ നിരക്ക്. കണക്കുകൾ ലഭ്യമായ സംസ്ഥാനങ്ങളിൽ ഏറ്റവും ഉയർന്ന നിരക്കാണിത്.

15 വയസ്സിന് മുകളിലുള്ളവരുടെ മൊത്തം തൊഴിലില്ലായ്മാ നിരക്കിലും കേരളമാണ് മുന്നിൽ. 8.7 ശതമാനമാണ് സംസ്ഥാനത്തെ നിരക്ക്. പഞ്ചാബും ആന്ധ്രപ്രദേശും 7.8 ശതമാനവുമായി തൊട്ടുപിന്നിലുണ്ട്. ഏറ്റവും കുറഞ്ഞ നിരക്ക് കർണാടകയിലാണ്; 2.8 ശതമാനം.

ദേശീയ തൊഴിലില്ലായ്മാ നിരക്കിൽ നേരിയ കുറവ്

രാജ്യത്ത് 15 വയസ്സിന് മുകളിലുള്ളവരുടെ മൊത്തം തൊഴിലില്ലായ്മാ നിരക്ക് മുൻ പാദത്തിലെ 5.4 ശതമാനത്തിൽനിന്ന് 5.1 ശതമാനമായി കുറഞ്ഞു. ഗ്രാമീണ മേഖലയിലെ നിരക്ക് 4.8 ശതമാനത്തിൽനിന്ന് 4.3 ശതമാനമായും താഴ്ന്നു.

എന്നാൽ നഗരമേഖലയിലെ മൊത്തം തൊഴിലില്ലായ്മാ നിരക്ക് 6.7 ശതമാനത്തിൽനിന്ന് 6.8 ശതമാനമായി ഉയർന്നു. അതിനാൽ ദേശീയതലത്തിൽ മൊത്തം നിരക്ക് കുറഞ്ഞെങ്കിലും നഗരങ്ങളിലെ തൊഴിൽ സാഹചര്യം മെച്ചപ്പെട്ടതായി പറയാനാകില്ല.

കണക്കുകൾ തയ്യാറാക്കിയത് പുതിയ സർവേ രീതിയിൽ

2025 ജനുവരി മുതൽ പരിഷ്കരിച്ച കറന്റ് വീക്ക്ലി സ്റ്റാറ്റസ് (CWS) രീതിയിലാണ് പുതിയ കണക്കുകൾ തയ്യാറാക്കിയത്. പരിശോധനയ്ക്ക് വിധേയമായ ആഴ്ചയിൽ ഒരു മണിക്കൂർപോലും ജോലി ചെയ്യാതിരിക്കുകയും അതേസമയം ജോലി അന്വേഷിക്കുകയോ ജോലി ചെയ്യാൻ ലഭ്യമായിരിക്കുകയോ ചെയ്യുന്നവരെയാണ് ഈ രീതിയിൽ തൊഴിലില്ലാത്തവരായി കണക്കാക്കുന്നത്.

ഉയർന്ന മാനവവിഭവശേഷിയും വിദ്യാഭ്യാസ നിലവാരവുമുള്ള കേരളത്തിൽ യുവാക്കൾക്ക് അനുയോജ്യമായ തൊഴിലവസരങ്ങൾ ലഭ്യമാക്കുന്നതിലെ വെല്ലുവിളിയാണ് പുതിയ കണക്കുകൾ വീണ്ടും ചർച്ചയാക്കുന്നത്.

English Summary: Kerala recorded the highest youth unemployment rate among the states covered in the latest survey, at 28.9 per cent for people aged 15–29. India’s urban youth unemployment rose to 18.9 per cent in the July–September 2026 quarter, a six-quarter high.