ഡെറാഡൂൺ: ഉത്തരാഖണ്ഡിൽ ചാർധം തീർഥാടനത്തിനിടെ ഹെലികോപ്റ്റർ തകർന്നുവീണ് പൈലറ്റടക്കം ആറുപേർ മരിച്ചു. ബദരീനാഥിൽ നിന്ന് ഫാറ്റയിലേക്ക് പോവുകയായിരുന്ന ഹെലികോപ്റ്ററാണ് ജോഷിമഠിന് സമീപം അപകടത്തിൽപ്പെട്ടത്. ഹെലികോപ്റ്ററിലുണ്ടായിരുന്ന ആർക്കും രക്ഷപ്പെടാനായില്ല. മരിച്ചവരിൽ കർണാടക പൊലീസിലെ സെൻട്രൽ ക്രൈംബ്രാഞ്ച് ഇൻസ്പെക്ടർ അരുൺ സോളങ്കിയും ഉൾപ്പെടുന്നു.
ഉത്തരാഖണ്ഡ് ഹെലികോപ്റ്റർ അപകടം: മരിച്ചവരിൽ പൊലീസ് ഉദ്യോഗസ്ഥനും
എച്ച്.എസ്. നടരാജ, പ്രതാപ് ഗൗഡ, ശങ്കർ ഗൗഡ, സുധീപ് എന്നിവരാണ് മരിച്ച മറ്റ് യാത്രക്കാർ. ചാർധം തീർഥാടനത്തിനായി എത്തിയ സുഹൃത്തുക്കളാണ് ഇവരെന്നാണ് വിവരം. ഡൽഹി സ്വദേശിയായ ക്യാപ്റ്റൻ ഹിമാൻഷു സബർബാളായിരുന്നു ഹെലികോപ്റ്ററിന്റെ പൈലറ്റ്.
മഞ്ഞുവീഴ്ചയ്ക്കിടെ ഹെലികോപ്റ്ററുമായുള്ള ബന്ധം നഷ്ടപ്പെട്ടു
ഉച്ചയ്ക്ക് 1.14ഓടെയാണ് ബദരീനാഥിൽ നിന്ന് ഹെലികോപ്റ്റർ പുറപ്പെട്ടത്. മഞ്ഞുവീഴ്ചയ്ക്കിടെ ഹാത്തി പർവത മേഖലയ്ക്ക് സമീപം എത്തിയതോടെ ഹെലികോപ്റ്ററുമായുള്ള ആശയവിനിമയം നഷ്ടപ്പെടുകയായിരുന്നു.
More Read
ജോഷിമഠ് താഴ്‌വരയ്ക്ക് മുകളിലൂടെ സഞ്ചരിക്കുന്നതിനിടെയാണ് ബന്ധം വിച്ഛേദിക്കപ്പെട്ടത്. ട്രാക്കിംഗ് സംവിധാനത്തിലൂടെയും ഹെലികോപ്റ്ററിനെ പിന്നീട് കണ്ടെത്താനായില്ലെന്ന് ഉത്തരാഖണ്ഡ് സിവിൽ ഏവിയേഷൻ ഡെവലപ്‌മെന്റ് അതോറിറ്റി അറിയിച്ചു.
ആദ്യഘട്ടത്തിൽ ഹെലികോപ്റ്ററിനെ കാണാതായെന്ന വിവരമാണ് പുറത്തുവന്നത്. പിന്നീട് ജോഷിമഠിന് സമീപത്തെ ചായീ ഗ്രാമത്തിനടുത്ത് ഹെലികോപ്റ്റർ തകർന്നുവീണതായി സ്ഥിരീകരണം ലഭിക്കുകയായിരുന്നു. അപകടവിവരം ഉത്തരാഖണ്ഡ് മുഖ്യമന്ത്രി പുഷ്കർ സിങ് ധാമിയും സ്ഥിരീകരിച്ചു.
രക്ഷാപ്രവർത്തനം നടത്തിയെങ്കിലും ജീവൻ രക്ഷിക്കാനായില്ല
More Read
അപകടസ്ഥലത്ത് എൻഡിആർഎഫ്, എസ്ഡിആർഎഫ് സംഘങ്ങളെ വിന്യസിച്ച് രക്ഷാപ്രവർത്തനം നടത്തി. എന്നാൽ ഹെലികോപ്റ്ററിലുണ്ടായിരുന്ന ആറുപേരുടെയും ജീവൻ രക്ഷിക്കാനായില്ല.
അപകടത്തിന്റെ പശ്ചാത്തലത്തിൽ മുൻകരുതൽ നടപടിയായി ട്രാൻസ് ഭാരത് ഏവിയേഷൻ പ്രൈവറ്റ് ലിമിറ്റഡിന്റെ എല്ലാ ഹെലികോപ്റ്റർ സർവീസുകളും താൽക്കാലികമായി നിർത്തിവച്ചു.
