ബംഗളുരു: ബെംഗളൂരുവിൽ പ്രധാനമന്ത്രി നരേന്ദ്ര മോദിക്കും തിരഞ്ഞെടുപ്പ് കമ്മിഷനുമെതിരെ രൂക്ഷ വിമർശനവുമായി കോക്രോച്ച് ജനതാ പാർട്ടി സ്ഥാപകൻ അഭിജിത് ദീപ്കെ. SIR വോട്ടർപട്ടിക നടപടിയിലൂടെ ബിജെപിയെ എതിർക്കുന്നവരുടെ വോട്ടവകാശം ഇല്ലാതാക്കാനാണ് ശ്രമിച്ചതെന്ന് അദ്ദേഹം ആരോപിച്ചു.
ബെംഗളൂരുവിലെ ഫ്രീഡം പാർക്കിൽ നടന്ന ‘പീപ്പിൾസ് ട്രൈബ്യൂണലിൽ’ സംസാരിക്കുകയായിരുന്നു ദീപ്കെ. മോദിയും തിരഞ്ഞെടുപ്പ് കമ്മിഷനും SIR വഴി വോട്ടുകൾ വെട്ടിനീക്കി ജനാധിപത്യത്തെ അട്ടിമറിച്ചെന്നും ദീപ്കെ ആരോപിച്ചു. മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിഷേധം തുടരുമെന്നും അദ്ദേഹം പറഞ്ഞു.
‘13 കോടി വോട്ടുകൾ ഇല്ലാതാക്കി’
2024ലെ ലോക്സഭാ തിരഞ്ഞെടുപ്പിൽ ബിജെപിയും പ്രതിപക്ഷവും തമ്മിലുള്ള വോട്ട് വ്യത്യാസം രണ്ട് ശതമാനം മാത്രമായിരുന്നുവെന്നാണ് ദീപ്കെയുടെ വാദം. ‘400 സീറ്റ് കടക്കും’ എന്ന ലക്ഷ്യം പ്രഖ്യാപിച്ച ബിജെപിക്ക് 240 സീറ്റുകളാണ് ലഭിച്ചതെന്നും അദ്ദേഹം ചൂണ്ടിക്കാട്ടി.
ഇന്ത്യയിലുടനീളം 13 കോടിയോളം വോട്ടുകൾ ഇല്ലാതാക്കിയെന്നും കർണാടകയിൽ മാത്രം ഏകദേശം ഒരു കോടി വോട്ടുകൾ വെട്ടിമാറ്റിയെന്നും ദീപ്കെ ആരോപിച്ചു. കർണാടകയിലെ കണക്ക് രജിസ്റ്റർ ചെയ്ത വോട്ടർമാരുടെ 13–14 ശതമാനത്തോളം വരുമെന്നും അദ്ദേഹം പറഞ്ഞു.
മോദി തരംഗത്തിന്റെ ഉച്ചസ്ഥായിയിൽ പോലും വിജയിക്കാൻ കഴിയാത്ത സംസ്ഥാനങ്ങളിൽ ഇത്തരം വോട്ടർപട്ടികാ നീക്കങ്ങൾ ബിജെപിയെ സഹായിച്ചെന്നും ദീപ്കെ ആരോപിച്ചു. SIR വഴി വോട്ടർമാരെ ഒഴിവാക്കുന്നത് ബിജെപിയെ എതിർക്കുന്നവരുടെ വോട്ടവകാശത്തെ ബാധിക്കാനാണെന്നും അദ്ദേഹം പറഞ്ഞു.
More Read
മമത, കേജ്‌രിവാൾ, സ്റ്റാലിൻ എന്നിവരുടെ മണ്ഡലങ്ങളും ചൂണ്ടിക്കാട്ടി
പശ്ചിമ ബംഗാൾ മുഖ്യമന്ത്രി മമത ബാനർജിയുമായി ബന്ധപ്പെട്ട മണ്ഡലത്തിൽ 50,000 വോട്ടുകൾ വെട്ടിമാറ്റിയെന്നാണ് ദീപ്കെയുടെ മറ്റൊരു ആരോപണം. ഇവിടെ 15,000 വോട്ടുകൾക്കാണ് മമത പരാജയപ്പെട്ടതെന്നും അദ്ദേഹം പറഞ്ഞു.
അരവിന്ദ് കേജ്‌രിവാൾ 4,000 വോട്ടുകൾക്ക് പരാജയപ്പെട്ട മണ്ഡലത്തിൽ 40,000 വോട്ടുകളും തമിഴ്നാട് മുഖ്യമന്ത്രി എം.കെ. സ്റ്റാലിനുമായി ബന്ധപ്പെട്ട ഒരു മണ്ഡലത്തിൽ ഏകദേശം ഒരു ലക്ഷം വോട്ടുകളും വെട്ടിമാറ്റിയെന്നാണ് ദീപ്കെ ആരോപിച്ചത്. സ്റ്റാലിന്റെ മണ്ഡലത്തിലെ ഭൂരിപക്ഷം 9,000–10,000 വോട്ടുകൾ മാത്രമായിരുന്നുവെന്നും അദ്ദേഹം പറഞ്ഞു.
‘ഒരു രാജ്യം ഒരു തിരഞ്ഞെടുപ്പ്’ മുദ്രാവാക്യം മാത്രം
കേരളത്തിലും സമാനമായ വോട്ടർപട്ടികാ നീക്കങ്ങളിലൂടെയാണ് പിണറായി വിജയൻ സർക്കാരിനെ അട്ടിമറിച്ചതെന്നും ദീപ്കെ ആരോപിച്ചു. 2024ൽ മോദിക്കെതിരെ പ്രചാരണം നടത്തുകയും ബിജെപിയുടെ വലിയ ഭൂരിപക്ഷം തടയാൻ സഹായിക്കുകയും ചെയ്തവരാണ് മമത ബാനർജി, അരവിന്ദ് കേജ്‌രിവാൾ, എം.കെ. സ്റ്റാലിൻ, പിണറായി വിജയൻ എന്നിവരെന്നും അദ്ദേഹം പറഞ്ഞു.
“ഒരു രാജ്യം ഒരു തിരഞ്ഞെടുപ്പ് എന്നത് വെറും മുദ്രാവാക്യം മാത്രമാണ്; ഒരു രാജ്യം ഒരു പാർട്ടി എന്നതാണ് അവരുടെ ലക്ഷ്യം” എന്നായിരുന്നു ദീപ്കെയുടെ ആരോപണം. മോദിയുടെയും അമിത് ഷായുടെയും നിർദേശപ്രകാരമാണ് ഗ്യാനേഷ് കുമാർ വോട്ടുകൾ വെട്ടിമാറ്റിയതെന്നും അദ്ദേഹം ആരോപിച്ചു.
English Summary: Cockroach Janata Party founder Abhijit Dipke alleged that voter deletions under the Special Intensive Revision (SIR) were aimed at disenfranchising people opposed to the BJP. Speaking at a People’s Tribunal in Bengaluru, he accused Prime Minister Narendra Modi and the Election Commission of undermining democracy and alleged large-scale voter deletions across India and Karnataka.p
