കൊച്ചി: രാജ്യത്തെ പ്രമുഖ സ്വകാര്യ എണ്ണക്കമ്പനിയായ നയാര എനർജി പെട്രോൾ, ഡീസൽ വില വർധിപ്പിച്ചു. പെട്രോൾ ലീറ്ററിന് അഞ്ച് രൂപയും ഡീസൽ ലീറ്ററിന് മൂന്ന് രൂപയുമാണ് ഒറ്റയടിക്ക് കൂട്ടിയത്.
ഇതോടെ കൊച്ചിയിലെ നയാര പമ്പുകളിൽ പെട്രോൾ വില ലീറ്ററിന് ₹118.89 ആയും ഡീസൽ വില ₹105.50 ആയും ഉയർന്നു.
നയാര ഇന്ധനവില ഉയരാൻ കാരണം ക്രൂഡ് ഓയിൽ
അന്താരാഷ്ട്ര വിപണിയിലെ ക്രൂഡ് ഓയിൽ വിലയിലെ മാറ്റങ്ങളാണ് പുതിയ വിലവർധനയ്ക്ക് പ്രധാന കാരണമായി ചൂണ്ടിക്കാണിക്കുന്നത്. പശ്ചിമേഷ്യയിലെ സംഘർഷാവസ്ഥ വീണ്ടും രൂക്ഷമായതോടെ ആഗോള ക്രൂഡ് ഓയിൽ വില ഉയർന്നതാണ് നയാരയുടെ പുതിയ തീരുമാനത്തിന് പിന്നിലെന്നാണ് റിപ്പോർട്ട്.
മാർച്ചിലും ക്രൂഡ് ഓയിൽ വില ഉയർന്നതിനെ തുടർന്ന് നയാര ഇന്ധനവില വർധിപ്പിച്ചിരുന്നു. പിന്നീട് ക്രൂഡ് വില കുറഞ്ഞപ്പോൾ കമ്പനി വില കുറച്ചിരുന്നു.
പൊതുമേഖലാ പമ്പുകളിൽ വില എത്ര?
ഇതിനിടെ മേയിൽ പൊതുമേഖലാ എണ്ണക്കമ്പനികളും പെട്രോളിനും ഡീസലിനും ലീറ്ററിന് എട്ട് രൂപ വീതം വില വർധിപ്പിച്ചിരുന്നു.
നിലവിൽ കൊച്ചിയിലെ പൊതുമേഖലാ എണ്ണക്കമ്പനികളുടെ പമ്പുകളിൽ പെട്രോൾ ലീറ്ററിന് ₹115.49യും ഡീസൽ ₹104.40യുമാണ്.
ഇതോടെ കൊച്ചിയിൽ നയാര പമ്പുകളിലെ പെട്രോൾ വില പൊതുമേഖലാ കമ്പനികളേക്കാൾ ലീറ്ററിന് ₹3.40 കൂടുതലായി.
ഇന്ധനവിപണിയിൽ പൊതുമേഖലാ കമ്പനികൾക്ക് ആധിപത്യം
രാജ്യത്തെ ഇന്ധനവിപണിയിൽ ഇന്ത്യൻ ഓയിൽ (ഐഒസി), ഭാരത് പെട്രോളിയം (ബിപിസിഎൽ), ഹിന്ദുസ്ഥാൻ പെട്രോളിയം (എച്ച്പിസിഎൽ) എന്നീ പൊതുമേഖലാ എണ്ണക്കമ്പനികൾക്കാണ് ഇപ്പോഴും വലിയ ആധിപത്യം.
രാജ്യത്തെ ഏകദേശം 90 ശതമാനം പെട്രോൾ പമ്പുകളും ഈ മൂന്ന് കമ്പനികളുടെ കീഴിലാണെന്നാണ് കണക്ക്. രാജ്യത്താകെ ഏകദേശം 1.04 ലക്ഷം പെട്രോൾ പമ്പുകളാണുള്ളത്.
അതേസമയം, സ്വകാര്യ എണ്ണക്കമ്പനിയായ ജിയോ ബിപിയും പൊതുമേഖലാ എണ്ണക്കമ്പനികളും നിലവിൽ പുതിയ വിലവർധന പ്രഖ്യാപിച്ചിട്ടില്ല.
English Summary
Nayara Energy has increased petrol and diesel prices sharply, raising petrol by ₹5 and diesel by ₹3 per litre. In Kochi, petrol at Nayara pumps now costs ₹118.89 per litre, while diesel costs ₹105.50. The increase has been linked to rising global crude oil prices amid renewed tensions in West Asia.
