മെസിയെ കേരളത്തിലെത്തിക്കാമെന്ന് വാഗ്ദാനം; 549.22 കോടി തട്ടിപ്പെന്ന് ജി.എസ്.ടി

മെസി കേരളത്തിലെത്തുമെന്ന വാഗ്ദാനത്തിന്റെ മറവിൽ 549.22 കോടി രൂപയുടെ തട്ടിപ്പ് നടന്നതായി സർക്കാർ നിയോഗിച്ച ജി.എസ്.ടി പ്രത്യേക അന്വേഷണ സംഘത്തിന്റെ കണ്ടെത്തൽ. പ്രധാന സ്പോൺസർമാരായ റിപ്പോർട്ടർ ബ്രോഡ്കാസ്റ്റിംഗ് കമ്പനിയുടെ നേതൃത്വത്തിലാണ് ക്രമക്കേടുകൾ നടന്നതെന്നാണ് അന്വേഷണ റിപ്പോർട്ടിലെ കണ്ടെത്തൽ. കള്ളപ്പണം, അനധികൃത വിദേശനാണ്യ ഇടപാടുകൾ, രഹസ്യ അക്കൗണ്ടുകൾ, നികുതിവെട്ടിപ്പ് തുടങ്ങിയ ഗുരുതര ആരോപണങ്ങളും റിപ്പോർട്ടിലുണ്ട്.

മെസി കേരളത്തിലെത്തുമെന്ന തട്ടിപ്പ്; അന്വേഷണത്തിൽ ഗുരുതര കണ്ടെത്തൽ

കള്ളപ്പണം വെളുപ്പിക്കൽ, അനധികൃത വിദേശനാണ്യ ഇടപാടുകൾ, രഹസ്യ യു.എസ് ഡോളർ അക്കൗണ്ടുകളിലൂടെയുള്ള ഇടപാടുകൾ, കണക്കിൽപ്പെടാത്ത ബാങ്കിതര വായ്പകൾ, ആദായനികുതി വെട്ടിപ്പ്, മുദ്രപ്പത്ര വിലയിലെ വെട്ടിപ്പ് തുടങ്ങിയ ക്രമക്കേടുകൾ കണ്ടെത്തിയതായി പ്രത്യേക അന്വേഷണ സംഘം റിപ്പോർട്ടിൽ പറയുന്നു.

ഇത്തരം ക്രമക്കേടുകൾ തടയുന്നതിൽ സംസ്ഥാന സർക്കാർ സ്ഥാപനങ്ങൾക്ക് ഗുരുതര വീഴ്ച സംഭവിച്ചതായും റിപ്പോർട്ടിൽ ചൂണ്ടിക്കാട്ടുന്നു. അന്വേഷണ റിപ്പോർട്ട് സർക്കാരിന് കൈമാറി.

കേന്ദ്ര ഏജൻസികൾക്ക് അന്വേഷണം കൈമാറണമെന്ന് ശുപാർശ

കേസുമായി ബന്ധപ്പെട്ട അന്വേഷണം എൻഫോഴ്‌സ്‌മെന്റ് ഡയറക്ടറേറ്റ്, ഇൻകം ടാക്സ് ഇൻവെസ്റ്റിഗേഷൻ വിംഗ്, റിസർവ് ബാങ്ക് ഓഫ് ഇന്ത്യയുടെ ഫെമ വിഭാഗം, രജിസ്ട്രാർ ഓഫ് ചിറ്റ്സ്, രജിസ്ട്രാർ ഓഫ് കമ്പനീസ്, കേന്ദ്ര ജി.എസ്.ടി ഇന്റലിജൻസ് തുടങ്ങിയ കേന്ദ്ര ഏജൻസികൾക്ക് കൈമാറണമെന്നാണ് അന്വേഷണ സംഘത്തിന്റെ ശുപാർശ.

ജി.എസ്.ടി ഉദ്യോഗസ്ഥർ നികുതിവെട്ടിപ്പ് കണ്ടെത്തിയിരുന്നെങ്കിലും ചില ഉദ്യോഗസ്ഥരുടെ ഭാഗത്തുനിന്ന് തെറ്റായ ഇടപെടലും വീഴ്ചയും ഉണ്ടായതായും റിപ്പോർട്ടിൽ പറയുന്നു.

കാഞ്ഞങ്ങാട്ടെ ഇന്റലിജൻസ് ഓഫീസർ, തിരുവനന്തപുരം ഇന്റലിജൻസ് ഹെഡ്ക്വാർട്ടേഴ്സ് ഡെപ്യൂട്ടി കമ്മിഷണർ, കാസർകോട് ഡെപ്യൂട്ടി കമ്മിഷണർ (ഇന്റലിജൻസ്), കോഴിക്കോട് ജോയിന്റ് കമ്മിഷണർ (ഇന്റലിജൻസ്) എന്നിവർക്കെതിരെ അച്ചടക്കനടപടിക്കും ശുപാർശ ചെയ്തിട്ടുണ്ട്.

ആറ് രഹസ്യ അക്കൗണ്ടുകൾ; 549.22 കോടി ഇടപാടിൽ നിർണായക കണ്ടെത്തൽ

സ്പോൺസറുടെ കമ്പനിയുമായി ബന്ധപ്പെട്ട ഔദ്യോഗിക രേഖകളിലോ മറ്റ് രേഖകളിലോ പരാമർശിക്കാത്ത ആറ് അക്കൗണ്ടുകൾ അന്വേഷണ സംഘം കണ്ടെത്തിയതാണ് പ്രധാന കണ്ടെത്തലുകളിലൊന്ന്.

549.22 കോടി രൂപ സമാഹരിച്ചതിൽ 212.75 കോടി രൂപ ബാങ്കിതര ധനകാര്യ സ്ഥാപനങ്ങളിൽനിന്ന് വായ്പയെടുത്തതാണെന്നാണ് റിപ്പോർട്ടിലെ കണ്ടെത്തൽ.

ശേഷിക്കുന്ന 336.47 കോടി രൂപയുടെ വരവിന്റെ ഉറവിടം രേഖപ്പെടുത്തിയിട്ടില്ലെന്നും റിപ്പോർട്ടിൽ പറയുന്നു. ഇതിൽ 102.47 കോടി രൂപ കമ്പനിയുടെ വരുമാനമായി കാണിച്ച് റിട്ടേൺ ഫയൽ ചെയ്തതായി അന്വേഷണ സംഘം കണ്ടെത്തി.

ഇതോടെ ശേഷിക്കുന്ന 234.31 കോടി രൂപ കള്ളപ്പണമാണെന്നാണ് അന്വേഷണ സംഘത്തിന്റെ വിലയിരുത്തൽ.

സംശയാസ്പദമായ ആറ് അക്കൗണ്ടുകളിലൂടെയും പണം സ്പോൺസറുടെ പ്രധാന അക്കൗണ്ടിലേക്കാണ് എത്തിയതെന്നും റിപ്പോർട്ടിൽ പറയുന്നു. ഇതിന്റെ അടിസ്ഥാനത്തിലാണ് 549.22 കോടി രൂപയുടെ തട്ടിപ്പെന്ന നിഗമനത്തിലേക്ക് അന്വേഷണ സംഘം എത്തിയതെന്നാണ് റിപ്പോർട്ട്.

നികുതി നഷ്ടം 25.78 കോടി രൂപ

സംസ്ഥാന സർക്കാരിന് ആകെ 25.78 കോടി രൂപയുടെ നികുതി നഷ്ടമുണ്ടായതായും അന്വേഷണ സംഘം കണ്ടെത്തിയിട്ടുണ്ട്.

അർജന്റീന ഫുട്ബോൾ അസോസിയേഷന്റെ കളക്ഷൻ ഏജന്റായ ടൂർ പ്രോഡ് എന്റർ വഴി അയച്ച 126.03 കോടി രൂപയുടെ (1.45 കോടി ഡോളർ) ഇടപാടിൽ 22.68 കോടി രൂപയുടെ ജി.എസ്.ടി നഷ്ടപ്പെട്ടതായി റിപ്പോർട്ടിൽ പറയുന്നു.

കൂടാതെ, അഞ്ച് വിദേശ ഇടപാടുകളിലായി നടത്തിയ 1.89 കോടി രൂപയുടെ ഇടപാടിൽ 35.15 ലക്ഷം രൂപയുടെ ജി.എസ്.ടി നഷ്ടമുണ്ടായതായും കണ്ടെത്തി.

സ്റ്റേഡിയം നവീകരണത്തിനായി കൂടുതൽ തുക ചെലവഴിച്ചതായി കാണിച്ച് ഇൻപുട്ട് ടാക്സ് ഇനത്തിൽ സർക്കാരിൽനിന്ന് 2.75 കോടി രൂപ തട്ടിയെടുത്തതായും അന്വേഷണ സംഘം കണ്ടെത്തിയിട്ടുണ്ട്.

ഇവയെല്ലാം ചേർത്താണ് സംസ്ഥാന സർക്കാരിനുണ്ടായ നികുതി നഷ്ടം 25.78 കോടി രൂപയായി കണക്കാക്കുന്നത്.

രജിസ്ട്രേഷൻ ഐ.ജി അന്വേഷണവും ആവശ്യപ്പെട്ടു

രജിസ്ട്രേഷൻ ഐ.ജി അന്വേഷണം നടത്തണമെന്നും ജി.എസ്.ടി വകുപ്പിൽ വകുപ്പുതല നടപടി സ്വീകരിക്കണമെന്നും മുഖ്യമന്ത്രിക്ക് കൈമാറിയ റിപ്പോർട്ടിൽ ശുപാർശ ചെയ്തിട്ടുണ്ട്.

അതേസമയം, സംസ്ഥാനതലത്തിൽ കണ്ടെത്തിയ ക്രമക്കേടുകളുടെ സ്വഭാവം കണക്കിലെടുത്ത് കേന്ദ്ര ഏജൻസികളുടെ അന്വേഷണം ആവശ്യമായേക്കുമെന്നാണ് പ്രത്യേക അന്വേഷണ സംഘത്തിന്റെ റിപ്പോർട്ടിലെ ശുപാർശകൾ വ്യക്തമാക്കുന്നത്.