ട്രെയിൻ ഹോൺ മുഴക്കി പാഞ്ഞെത്തി,വാക്കറുമായി ട്രാക്കിൽ ട്രാക്കിൽ കുടുങ്ങി ഭിന്നശേഷിക്കാരനായ യുവാവ്; നിമിഷങ്ങൾക്കകം രക്ഷപ്പെടുത്തി യാത്രക്കാർ !

വാക്കറുമായി ട്രാക്കിൽ ട്രാക്കിൽ കുടുങ്ങി ഭിന്നശേഷിക്കാരനായ യുവാവ്

മുംബൈ ∙ ട്രെയിൻ എത്തുന്നതിന് തൊട്ടുമുൻപ് വാക്കറിന്റെ സഹായത്തോടെ റെയിൽവേ ട്രാക്ക് മുറിച്ചുകടക്കാൻ ശ്രമിച്ച യുവാവിനെ നിമിഷങ്ങളുടെ വ്യത്യാസത്തിൽ യാത്രക്കാർ രക്ഷപ്പെടുത്തിയ സംഭവം മഹാരാഷ്ട്രയിലെ അമ്പർനാഥ് റെയിൽവേ സ്റ്റേഷനിൽ. അപകടകരമായ രീതിയിൽ ട്രാക്കിലേക്ക് ഇറങ്ങിയ യുവാവ് ട്രെയിൻ അടുത്തെത്തിയിട്ടും മറുവശത്തേക്ക് കടക്കാൻ കഴിയാതെ കുടുങ്ങുകയായിരുന്നു. ട്രെയിൻ തുടർച്ചയായി ഹോൺ മുഴക്കിക്കൊണ്ട് മുന്നോട്ടെത്തുന്നതിനിടെയായിരുന്നു സംഭവം.

ട്രെയിൻ അടുത്തെത്തി, രക്ഷാപ്രവർത്തനം അതിവേഗം

സെപ്റ്റംബർ രണ്ടിന് നടന്ന സംഭവത്തിന്റെ ദൃശ്യങ്ങളാണ് ഇപ്പോൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നത്. വാക്കറിന്റെ സഹായത്തോടെ ട്രാക്കിലൂടെ നീങ്ങുന്ന യുവാവിനെയാണ് ദൃശ്യങ്ങളിൽ കാണുന്നത്. ഇതിനിടെ ട്രെയിൻ സ്റ്റേഷനിലേക്ക് പ്രവേശിക്കുകയും തുടർച്ചയായി ഹോൺ മുഴക്കുകയും ചെയ്തു. എന്നാൽ ട്രെയിൻ എത്തുന്നതിന് മുൻപ് ട്രാക്ക് മുറിച്ചുകടക്കാൻ യുവാവിന് സാധിച്ചില്ല.

അപകടസാധ്യത തിരിച്ചറിഞ്ഞതോടെ പ്ലാറ്റ്‌ഫോമിലുണ്ടായിരുന്ന യാത്രക്കാർ ഉടൻ ഇടപെടുകയായിരുന്നു. യുവാവ് പ്ലാറ്റ്‌ഫോമിന്റെ അരികിലെത്തിയ ഉടൻ തന്നെ നിരവധി യാത്രക്കാർ ചേർന്ന് കൈപിടിച്ച് മുകളിലേക്ക് വലിച്ചുകയറ്റി. ട്രെയിൻ കടന്നുപോകുന്നതിന് തൊട്ടുമുൻപ് നടത്തിയ ഈ രക്ഷാപ്രവർത്തനമാണ് യുവാവിന്റെ ജീവൻ രക്ഷിച്ചതെന്നാണ് പുറത്തുവന്ന ദൃശ്യങ്ങൾ വ്യക്തമാക്കുന്നത്.

സമൂഹമാധ്യമങ്ങളിൽ വൈറലായി ദൃശ്യങ്ങൾ

രാഹുൽ ബംഗാർ എന്നയാളാണ് സംഭവത്തിന്റെ ദൃശ്യങ്ങൾ പകർത്തി ഇൻസ്റ്റഗ്രാമിൽ പങ്കുവച്ചത്. വീഡിയോ പുറത്തുവന്നതിന് പിന്നാലെ വളരെ വേഗത്തിലാണ് ഇത് സമൂഹമാധ്യമങ്ങളിൽ വ്യാപിച്ചത്. അപകടകരമായ രീതിയിൽ റെയിൽവേ ട്രാക്ക് മുറിച്ചുകടക്കുന്നതിന്റെ അപകടം ചൂണ്ടിക്കാട്ടിയ അദ്ദേഹം, യാത്രക്കാർ ട്രാക്കിലൂടെ കടന്നുപോകാതെ റെയിൽവേ അധികൃതർ നിർദേശിച്ചിട്ടുള്ള മേൽപ്പാലങ്ങളും മറ്റ് സുരക്ഷിത മാർഗങ്ങളും മാത്രം ഉപയോഗിക്കണമെന്ന് അഭ്യർഥിച്ചു.

ട്രെയിൻ എത്തുന്നതിന് തൊട്ടുമുൻപ് ട്രാക്കിൽനിന്ന് രക്ഷപ്പെടാൻ ശ്രമിക്കുന്ന യുവാവിനെയും അദ്ദേഹത്തെ പ്ലാറ്റ്‌ഫോമിലേക്ക് വലിച്ചുകയറ്റുന്ന യാത്രക്കാരെയും ദൃശ്യങ്ങളിൽ കാണാം. ചെറിയൊരു പിഴവ് സംഭവിച്ചിരുന്നെങ്കിൽ വലിയ ദുരന്തത്തിന് തന്നെ വഴിവെക്കുമായിരുന്നുവെന്നാണ് വീഡിയോ കണ്ടവരിൽ പലരും അഭിപ്രായപ്പെട്ടത്.

സുരക്ഷാ വീഴ്ചയോ അടിസ്ഥാന സൗകര്യങ്ങളുടെ പരിമിതിയോ?

എന്നാൽ സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ ചർച്ചയായതോടെ ട്രാക്ക് മുറിച്ചുകടന്ന യുവാവിന്റെ നടപടിയെ മാത്രം വിമർശിച്ചുകൊണ്ടല്ല പ്രതികരണങ്ങൾ ഉണ്ടായത്. റെയിൽവേ സ്റ്റേഷനുകളിലെ ഭിന്നശേഷി സൗഹൃദവും പ്രായമായവർക്കും ചലനപരിമിതിയുള്ളവർക്കും അനുയോജ്യവുമായ അടിസ്ഥാന സൗകര്യങ്ങളുടെ അഭാവവും വലിയ ചർച്ചയായി.

അമ്പർനാഥ് സ്റ്റേഷനിലെ മൂന്നാം നമ്പർ പ്ലാറ്റ്‌ഫോമിൽ എസ്‌കലേറ്ററോ ലിഫ്റ്റോ ഇല്ലെന്നാണ് പ്രദേശവാസികൾ ചൂണ്ടിക്കാട്ടുന്നത്. വാക്കറിന്റെ സഹായത്തോടെ സഞ്ചരിക്കുന്നവർക്കും പ്രായമായവർക്കും ഫുട് ഓവർ ബ്രിഡ്ജിലെ പടികൾ കയറുന്നത് വലിയ ബുദ്ധിമുട്ടാണ്. ഇത്തരത്തിൽ പടികൾ കയറാൻ സാധിക്കാത്ത സാഹചര്യത്തിലുള്ള യാത്രക്കാർക്ക് പ്ലാറ്റ്‌ഫോമുകൾക്കിടയിൽ സുരക്ഷിതമായി സഞ്ചരിക്കാൻ ആവശ്യമായ സൗകര്യങ്ങൾ പര്യാപ്തമല്ലെന്നാണ് ആരോപണം.

‘ജീവൻ പണയം വെച്ച് ട്രാക്കിലിറങ്ങേണ്ട സാഹചര്യം’

റെയിൽവേ ട്രാക്ക് മുറിച്ചുകടക്കുന്നത് അതീവ അപകടകരമാണെന്നതിൽ സംശയമില്ല. എന്നാൽ ഭിന്നശേഷിക്കാരും ചലനപരിമിതിയുള്ളവരും പ്രായമായവരും സുരക്ഷിതമായി ഒരു പ്ലാറ്റ്‌ഫോമിൽനിന്ന് മറ്റൊന്നിലേക്ക് എത്താൻ ആവശ്യമായ സൗകര്യങ്ങൾ സ്റ്റേഷനുകളിൽ ഉറപ്പാക്കേണ്ടതുണ്ടെന്നും യാത്രക്കാർ പറയുന്നു.

ഫുട് ഓവർ ബ്രിഡ്ജ് ഉപയോഗിക്കുന്നത് ശാരീരികമായി ബുദ്ധിമുട്ടുള്ളവർക്ക് പകരം മാർഗമില്ലാത്ത സാഹചര്യം ഉണ്ടാകുമ്പോൾ അവർ അപകടകരമായ വഴികൾ തിരഞ്ഞെടുക്കാൻ നിർബന്ധിതരാകുന്നുണ്ടോയെന്ന ചോദ്യമാണ് അമ്പർനാഥ് സംഭവം ഉയർത്തുന്നത്. അതിനാൽ ട്രാക്ക് മുറിച്ചുകടന്ന യുവാവിന്റെ നടപടിയെ വിമർശിക്കുന്നതിനൊപ്പം, ഇത്തരം യാത്രക്കാർക്ക് സുരക്ഷിതമായ പ്രവേശനവും യാത്രാസൗകര്യവും ഉറപ്പാക്കുന്നതിൽ റെയിൽവേയ്ക്ക് എന്ത് ചെയ്യാനാകുമെന്നതും പരിശോധിക്കണമെന്നാണ് ആവശ്യം.