കോഴിക്കോട് എംഡിഎംഎ കേസ് അന്വേഷണത്തിൽ നിർണായക വിവരങ്ങളാണ് പുറത്തുവരുന്നത്. അറസ്റ്റിലായ മൂന്ന് അധ്യാപികമാർ ലഹരിമരുന്ന് ഇടപാടിൽ ഇടനിലക്കാരായാണ് പ്രവർത്തിച്ചതെന്നാണ് പൊലീസ് കണ്ടെത്തൽ. സാമ്പത്തിക ഇടപാടുകളും മറ്റ് സംസ്ഥാനങ്ങളിലെ ബന്ധങ്ങളും കേന്ദ്രീകരിച്ച് അന്വേഷണം പുരോഗമിക്കുകയാണ്.
കോഴിക്കോട് എംഡിഎംഎ കേസ്: അധ്യാപികമാർ ഇടനിലക്കാരെന്ന് പൊലീസ്
കോഴിക്കോട് എംഡിഎംഎ കേസിൽ അറസ്റ്റിലായ അധ്യാപികമാർ ആവശ്യക്കാരും വിതരണക്കാരും തമ്മിലുള്ള സാമ്പത്തിക ഇടപാടുകൾ ഏകോപിപ്പിച്ചിരുന്നുവെന്നാണ് പൊലീസ് പറയുന്നത്.
ആവശ്യക്കാർ അയച്ച ₹10,000 മുതൽ ₹20,000 വരെ തുക ലഹരിമരുന്ന് വിതരണക്കാർക്ക് കൈമാറുകയും തുടർന്ന് ഒളിത്താവളങ്ങളിലേക്കുള്ള വഴി ഗൂഗിൾ മാപ്പിലൂടെ അയച്ചുനൽകുകയും ചെയ്തിരുന്നുവെന്നാണ് അന്വേഷണത്തിൽ കണ്ടെത്തിയത്.
ഇൻസ്റ്റഗ്രാം വഴിയുള്ള ബന്ധവും സാമ്പത്തിക ഇടപാടുകളും
ഇൻസ്റ്റഗ്രാം വഴിയാണ് ലഹരി സംഘങ്ങളുമായി പ്രതികൾ ബന്ധം സ്ഥാപിച്ചതെന്നാണ് പൊലീസ് വ്യക്തമാക്കുന്നത്. ലഹരിമരുന്ന് വിൽപ്പനയിൽ നിന്നുള്ള പണം പ്രതികൾ തമ്മിൽ പങ്കിട്ടിരുന്നതായും അന്വേഷണ സംഘം കണ്ടെത്തി.
അതേസമയം, ബെംഗളൂരു, ഹൈദരാബാദ് എന്നിവിടങ്ങളിലെ സംഘങ്ങളുമായി പ്രതികൾക്ക് ബന്ധമുണ്ടെന്ന വിവരവും അന്വേഷണത്തിൽ ലഭിച്ചിട്ടുണ്ട്.
More Read
ബാങ്ക് അക്കൗണ്ടുകളിൽ വൻ സാമ്പത്തിക ഇടപാട്
പ്രതികളുടെ ബാങ്ക് അക്കൗണ്ടുകൾ പരിശോധിച്ചപ്പോൾ വൻ സാമ്പത്തിക ഇടപാടുകളുടെ തെളിവുകൾ ലഭിച്ചതായി പൊലീസ് അറിയിച്ചു.
കീർത്തനയുടെ അക്കൗണ്ടിൽ ഒരു വർഷത്തിനിടെ ₹14 ലക്ഷം രൂപയും കാവ്യയുടെ അക്കൗണ്ടിൽ അഞ്ച് മാസത്തിനിടെ ₹9 ലക്ഷം രൂപയും എത്തിയതായി അന്വേഷണത്തിൽ കണ്ടെത്തി. പണം അയച്ചവരെയും നിരീക്ഷണത്തിലാണെന്ന് പൊലീസ് അറിയിച്ചു.
അന്വേഷണം വ്യാപിപ്പിച്ച് പൊലീസ്
എംഡിഎംഎ ആവശ്യക്കാർക്ക് നേരിട്ട് കൈമാറിയവർ ആരാണെന്ന് കണ്ടെത്തുകയാണ് അന്വേഷണ സംഘത്തിന്റെ അടുത്ത ലക്ഷ്യം.
പേരാമ്പ്ര ബി.ആർ.സിയിലെ അധ്യാപികമാരായ കാവ്യ, കീർത്തന, നീഷ്മ എന്നിവരാണ് കേസിൽ അറസ്റ്റിലായത്. നീഷ്മ സ്പെഷ്യൽ എജ്യുക്കേറ്ററായിരുന്നു. അറസ്റ്റിന് പിന്നാലെ കരാർ അടിസ്ഥാനത്തിൽ ജോലി ചെയ്തിരുന്ന മൂന്നുപേരെയും വിദ്യാഭ്യാസ വകുപ്പ് പിരിച്ചുവിട്ടു.
കേസിൽ കണ്ണൂർ ഇരിട്ടി സ്വദേശിയായ ജിജിലും അറസ്റ്റിലായിട്ടുണ്ട്. അറസ്റ്റിലായ കീർത്തന ലഹരിവിരുദ്ധ ബോധവത്കരണ പ്രവർത്തനങ്ങളിൽ സജീവമായി പങ്കെടുത്തിരുന്നുവെന്ന വിവരവും പുറത്തുവന്നിട്ടുണ്ട്.
