കൊച്ചിയിൽ വൻ രാഷ്ട്രീയ കോളിളക്കം സൃഷ്ടിച്ച സി.എം.ആർ.എൽ.-എക്സാലോജിക് മാസപ്പടി കേസിൽ മുഖ്യമന്ത്രി പിണറായി വിജയന്റെ മകൾ ടി. വീണയ്ക്ക് എൻഫോഴ്സ്മെന്റ് ഡയറക്ടറേറ്റ് വീണ്ടും സമൻസ് അയച്ചു. വരും ബുധനാഴ്ച ചോദ്യം ചെയ്യലിനായി നേരിട്ട് ഹാജരാകണമെന്നാണ് കേന്ദ്ര അന്വേഷണ ഏജൻസിയുടെ കർശന നിർദേശം.
നേരത്തെ വെള്ളിയാഴ്ച ഹാജരാകാൻ ആവശ്യപ്പെട്ടിരുന്നെങ്കിലും കടുത്ത ആരോഗ്യപ്രശ്നങ്ങൾ ചൂണ്ടിക്കാട്ടി വീണ ഇ-മെയിൽ വഴി ഒഴിഞ്ഞുമാറുകയായിരുന്നു. ഈ അസൗകര്യം അറിയിച്ചതിന് തൊട്ടുപിന്നാലെയാണ് ഇ.ഡി. പുതിയ സമൻസ് പുറപ്പെടുവിച്ചത്.
കൊച്ചിയിലെ ഇ.ഡി. ഓഫിസിൽ നേരിട്ടെത്തുന്നതിന് പകരം അന്വേഷണ ഉദ്യോഗസ്ഥർ ആവശ്യപ്പെട്ട മുഴുവൻ രേഖകളും തന്റെ അഭിഭാഷകർ മുഖേന കൈമാറാമെന്നായിരുന്നു വീണയുടെ ആദ്യ നിലപാട്. ഇതിനായി പ്രത്യേക അവധി അപേക്ഷയും അവർ സമർപ്പിച്ചിരുന്നു.
എന്നാൽ ഈ അപേക്ഷ പൂർണ്ണമായും തള്ളിക്കളഞ്ഞ ഇ.ഡി. അധികൃതർ, കേസിന്റെ സ്വഭാവം കണക്കിലെടുത്ത് വീണ വ്യക്തിപരമായി തന്നെ ചോദ്യം ചെയ്യലിന് ഹാജരാകണമെന്ന ഉറച്ച നിലപാടിലാണ്. കൃത്യമായ രേഖകളുടെ അടിസ്ഥാനത്തിൽ വീണയെ നേരിട്ട് ചോദ്യം ചെയ്ത ശേഷമേ സി.എം.ആർ.എൽ. ഉന്നത ഉദ്യോഗസ്ഥരിലേക്ക് അന്വേഷണം വ്യാപിപ്പിക്കൂ എന്നാണ് ലഭിക്കുന്ന സൂചനകൾ.
കരിമണൽ കമ്പനിയിൽ നിന്നും എക്സാലോജിക്കിലേക്ക് ഒഴുകിയ കോടിക്കണക്കിന് രൂപ ഏത് സേവനത്തിന്റെ പ്രതിഫലമാണെന്ന് വ്യക്തമാക്കുന്ന കൃത്യമായ തെളിവുകൾ ഹാജരാക്കാൻ വീണയോട് ആവശ്യപ്പെട്ടിട്ടുണ്ട്. ഇല്ലാത്ത ചെലവുകൾ വ്യാജമായി കാണിച്ച് സി.എം.ആർ.എലുമായി ബന്ധപ്പെട്ട് 132 കോടിയിലധികം രൂപയുടെ വൻ സാമ്പത്തിക ക്രമക്കേടുകൾ നടന്നിട്ടുണ്ടെന്നാണ് സീരിയസ് ഫ്രോഡ് ഇൻവെസ്റ്റിഗേഷൻ ഓഫീസ് നേരത്തെ കണ്ടെത്തിയത്. ഇതിന്റെ തുടർച്ചയായാണ് ഇപ്പോൾ ഇ.ഡി.യും അന്വേഷണം ശക്തമാക്കിയിരിക്കുന്നത്.
More Read
ലഭ്യമായ വിവരങ്ങൾ പ്രകാരം 2016 മുതൽ 2021 വരെയുള്ള അഞ്ച് വർഷത്തെ കാലയളവിൽ മാത്രം കരിമണൽ കമ്പനിയിൽ നിന്ന് 2.78 കോടി രൂപ വീണയ്ക്ക് കൈമാറിയിട്ടുണ്ട്. ഇതിന് പുറമെ എംപവർ ഇന്ത്യ ക്യാപിറ്റലിൽ നിന്ന് 50 ലക്ഷം രൂപയുടെ വായ്പയും ഇവർ കൈപ്പറ്റിയിട്ടുണ്ട്.
കേസിന്റെ ഭാഗമായി നേരത്തെ പന്ത്രണ്ടോളം കേന്ദ്രങ്ങളിൽ നടത്തിയ വിപുലമായ പരിശോധനയിൽ 242 ബാങ്ക് അക്കൗണ്ടുകളിലായി കിടന്നിരുന്ന 18 കോടിയിലധികം രൂപ ഇ.ഡി. മരവിപ്പിച്ചിരുന്നു. എക്സാലോജിക്കും കരിമണൽ കമ്പനിയും തമ്മിൽ നടത്തിയ എല്ലാ സാമ്പത്തിക ഇടപാടുകളുടെയും യഥാർത്ഥ രേഖകൾ ഇ.ഡി.ക്ക് കൈമാറാൻ മുൻപ് കോടതിയും കർശനമായി ഉത്തരവിട്ടിരുന്നു.
English Summary
More Read
The Enforcement Directorate (ED) has issued a fresh summons to T. Veena, daughter of Chief Minister Pinarayi Vijayan, in the CMRL-Exalogic monthly pay-off case, directing her to appear on Wednesday. The ED rejected her request to submit documents through lawyers and insisted on her personal appearance for interrogation.
