കാവേരി ജലവിഷയവുമായി ബന്ധപ്പെട്ട് ഡിഎംകെ സംഘടിപ്പിച്ച പ്രതിഷേധ പരിപാടിക്കിടെ നടി തൃഷയെക്കുറിച്ച് നടത്തിയതായി ആരോപിക്കപ്പെടുന്ന ദ്വയാർഥ പരാമർശത്തെ തുടർന്ന് പ്രതിപക്ഷ നേതാവ് ഉദയനിധി സ്റ്റാലിയെ തമിഴ്നാട് പൊലീസ് കസ്റ്റഡിയിലെടുത്തു. മുഖ്യമന്ത്രിയെ അപകീർത്തിപ്പെടുത്തിയെന്ന പരാതിയുടെ അടിസ്ഥാനത്തിൽ ആറ് വകുപ്പുകൾ ചുമത്തി കേസ് രജിസ്റ്റർ ചെയ്തതിന് പിന്നാലെയാണ് പൊലീസ് നടപടി. അറസ്റ്റ് ചെയ്യുന്നതിനായി ചെന്നൈയിലെ നീലാങ്കരയിലുള്ള ഉദയനിധിയുടെ വസതിയിലെത്തിയ പൊലീസ് പിന്നീട് അദ്ദേഹത്തെ കസ്റ്റഡിയിലെടുക്കുകയായിരുന്നു.
കാവേരി പ്രതിഷേധത്തിലെ പ്രസംഗം വിവാദമായി
തഞ്ചാവൂരിൽ കാവേരി ജലവിഷയത്തിൽ സംഘടിപ്പിച്ച പ്രതിഷേധ പരിപാടിയിലായിരുന്നു വിവാദത്തിന് ഇടയായ പ്രസംഗം. പ്രസംഗത്തിനിടെ പ്രവർത്തകർ നടി തൃഷയുടെ പേര് വിളിച്ചുപറഞ്ഞതിനെ തുടർന്നാണ് ഉദയനിധി നടത്തിയ പരാമർശം വിവാദമായത്. ഇതിന്റെ വീഡിയോ സമൂഹമാധ്യമങ്ങളിൽ വ്യാപകമായി പ്രചരിച്ചതോടെ വിവിധ രാഷ്ട്രീയ പാർട്ടികളും പൊതുപ്രവർത്തകരും ശക്തമായ വിമർശനവുമായി രംഗത്തെത്തി.
ഹൈക്കോടതിയെ സമീപിച്ച് ഡിഎംകെ
പൊലീസ് നടപടിക്കെതിരെ ഡിഎംകെ മദ്രാസ് ഹൈക്കോടതിയെ സമീപിച്ചു. അറസ്റ്റ് തടയണമെന്നാവശ്യപ്പെട്ട് അടിയന്തര ഹർജി സമർപ്പിച്ചതായാണ് റിപ്പോർട്ടുകൾ. ഹർജി കോടതി പരിഗണിക്കുമെന്ന വിവരവും പുറത്തുവന്നിട്ടുണ്ട്. കേസുമായി ബന്ധപ്പെട്ട തുടർ നിയമനടപടികൾ കോടതി വിധിയെ ആശ്രയിച്ചായിരിക്കും.
പരാതികളും പ്രതിഷേധവും ശക്തമായി
സംഭവത്തിന് പിന്നാലെ ടിവികെ ഉൾപ്പെടെയുള്ള രാഷ്ട്രീയ പാർട്ടികൾ ഉദയനിധിക്കെതിരെ രംഗത്തെത്തി. ദേശീയ വനിതാ കമ്മിഷനിലും തഞ്ചാവൂർ പൊലീസിലും പരാതി നൽകിയതായി റിപ്പോർട്ടുകളുണ്ട്. ടിവികെ വനിതാ വിഭാഗം ഭാരവാഹികളാണ് വനിതാ കമ്മിഷനെ സമീപിച്ചത്. അതേസമയം, സമൂഹമാധ്യമങ്ങളിലും പരാമർശത്തിനെതിരെ വ്യാപക പ്രതിഷേധമാണ് ഉയർന്നത്.
More Read
രാഷ്ട്രീയ നേതാക്കളുടെ വിമർശനം
ടിവികെ എംഎൽഎ രേവന്ത് ചരൺ സമൂഹമാധ്യമത്തിലൂടെ പരാമർശത്തെ ശക്തമായി വിമർശിച്ചു. സ്ത്രീകളെ അപമാനിക്കുന്ന തരത്തിലുള്ള പരാമർശങ്ങൾ ഒരു പൊതുപ്രവർത്തകനിൽ നിന്ന് ഉണ്ടാകാൻ പാടില്ലെന്നും അദ്ദേഹം അഭിപ്രായപ്പെട്ടു. ബിജെപി വക്താവ് നാരായണൻ തിരുപ്പതിയും ഉദയനിധിക്കെതിരെ നടപടി ആവശ്യപ്പെട്ട് രംഗത്തെത്തി. വിവാദം തമിഴ്നാട് രാഷ്ട്രീയത്തിൽ പുതിയ ഏറ്റുമുട്ടലുകൾക്ക് വഴിവെച്ചിരിക്കുകയാണ്.
