ഹരിയാനയിലെ ഫരീദാബാദിലെ സിക്രോണ ഗ്രാമത്തിൽ സ്വകാര്യ സ്കൂളിൽ അധ്യാപികയെ കുത്തിക്കൊലപ്പെടുത്തിയ സംഭവം നടുക്കമുണ്ടാക്കി. സന്ധ്യ (29) എന്ന അധ്യാപികയാണ് ആക്രമണത്തിൽ കൊല്ലപ്പെട്ടത്. സ്കൂളിലേക്ക് അതിക്രമിച്ച് കയറിയ യുവാവ് മറ്റ് അധ്യാപകരുടെയും ജീവനക്കാരുടെയും മുന്നിൽവെച്ചാണ് ആക്രമണം നടത്തിയത്. സംഭവത്തിൽ കോട്ട് ഗ്രാമവാസിയായ അമിത് (21) എന്ന യുവാവിനെ പൊലീസ് അറസ്റ്റ് ചെയ്തു.
മുഖംമൂടിയണിഞ്ഞെത്തി ആക്രമണം
പൊലീസിന്റെ വിവരമനുസരിച്ച്, മുഖംമൂടി ധരിച്ചാണ് പ്രതി സ്കൂളിലെത്തിയത്. അധ്യാപികയുടെ പേര് ചോദിച്ച ശേഷം അവർ പുറത്തേക്ക് വന്നതോടെ കത്തി ഉപയോഗിച്ച് ആക്രമണം നടത്തുകയായിരുന്നു. കഴുത്ത്, നെഞ്ച്, മുഖം എന്നിവിടങ്ങളിൽ നിരവധി തവണ കുത്തേറ്റ സന്ധ്യ ഗുരുതരമായി പരിക്കേറ്റു. സ്കൂൾ ലോബിയിൽ നിന്ന് അധ്യാപികയെ വലിച്ചിഴച്ച് പുറത്തേക്ക് കൊണ്ടുപോയി ആക്രമിക്കുന്ന ദൃശ്യങ്ങൾ സിസിടിവിയിൽ പതിഞ്ഞിട്ടുണ്ടെന്ന് പൊലീസ് അറിയിച്ചു.
തടയാൻ ശ്രമിച്ചവരെയും ഭീഷണിപ്പെടുത്തി
അധ്യാപികയുടെ നിലവിളി കേട്ട് ഓടിയെത്തിയ സ്കൂൾ അഡ്മിനിസ്ട്രേറ്റർ ആക്രമണം തടയാൻ ശ്രമിച്ചെങ്കിലും പ്രതി കത്തി കാട്ടി ഭീഷണിപ്പെടുത്തിയതായി അന്വേഷണത്തിൽ വ്യക്തമായി. തുടർന്ന് നമ്പർ പ്ലേറ്റില്ലാത്ത മോട്ടോർസൈക്കിളിൽ ഇയാൾ രക്ഷപ്പെടുകയായിരുന്നു. ഗുരുതരമായി പരിക്കേറ്റ സന്ധ്യയെ ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
പരാതിയുടെ പ്രതികാരമെന്ന് പൊലീസ്
2024-ലാണ് പ്രതി അമിത് സന്ധ്യയെ പരിചയപ്പെട്ടതെന്ന് പൊലീസ് അറിയിച്ചു. പിന്നീട് ഇയാൾ അധ്യാപികയെ നിരന്തരം പിന്തുടരുകയും ശല്യം ചെയ്യുകയും ചെയ്തിരുന്നതായി അന്വേഷണത്തിൽ കണ്ടെത്തി. ശല്യം അസഹ്യമായതിനെ തുടർന്ന് കഴിഞ്ഞ ആഴ്ച സന്ധ്യ പൊലീസിൽ പരാതി നൽകിയിരുന്നു. അന്ന് നാട്ടുകാരുടെ സാന്നിധ്യത്തിൽ മാപ്പ് പറഞ്ഞാണ് പ്രതി മടങ്ങിയതെന്നും, അതിലുള്ള വൈരാഗ്യമാണ് കൊലപാതകത്തിന് കാരണമായതെന്നുമാണ് പൊലീസിന്റെ പ്രാഥമിക നിഗമനം.
More Read
രണ്ട് മണിക്കൂറിനകം പ്രതി പിടിയിൽ
സംഭവത്തിന് പിന്നാലെ പ്രത്യേക അന്വേഷണസംഘം നടത്തിയ തിരച്ചിലിലാണ് പ്രതിയെ രണ്ട് മണിക്കൂറിനകം പിടികൂടിയത്. ചോദ്യം ചെയ്യലിൽ ഇയാൾ കുറ്റം സമ്മതിച്ചതായും പൊലീസ് അറിയിച്ചു. കൊലപാതകവുമായി ബന്ധപ്പെട്ട കൂടുതൽ തെളിവുകൾ ശേഖരിച്ചുവരികയാണ്. സംഭവത്തിന്റെ പശ്ചാത്തലത്തിൽ സ്ത്രീകൾക്കെതിരായ പിന്തുടരലും ശല്യപ്പെടുത്തലും സംബന്ധിച്ച പരാതികളിൽ സമയബന്ധിതമായ ഇടപെടലിന്റെ ആവശ്യകത വീണ്ടും ചർച്ചയാകുകയാണ്.
