കെയ്റോ: അമേരിക്ക–ഇറാൻ സംഘർഷം വീണ്ടും രൂക്ഷമാകുന്ന സാഹചര്യത്തിൽ പശ്ചിമേഷ്യയിൽ യുദ്ധഭീതി ശക്തമായി. ജോർദാനിലെ യു.എസ്. സൈനിക താവളത്തിന് നേരെയുണ്ടായ മിസൈൽ ആക്രമണത്തിന് പിന്നാലെ ഇറാനിലെ വിവിധ സൈനിക കേന്ദ്രങ്ങൾ ലക്ഷ്യമിട്ട് അമേരിക്ക ആക്രമണം നടത്തിയതായി റിപ്പോർട്ടുകൾ. അതേസമയം, ഇറാഖിലെ ഇറാൻ അനുകൂല സായുധസംഘങ്ങളുടെ കേന്ദ്രങ്ങൾ ലക്ഷ്യമിട്ടും യു.എസ്.യും സൗദിയും സംയുക്ത ആക്രമണം നടത്തിയതായി വിവരമുണ്ട്.
ഇറാൻ സൈനിക കേന്ദ്രങ്ങൾ ലക്ഷ്യമിട്ട് ആക്രമണം
യു.എസ്. സെൻട്രൽ കമാൻഡ് (സെന്റ്കോം) പുറത്തുവിട്ട വിവരമനുസരിച്ച്, ഇസ്ലാമിക് റെവലൂഷണറി ഗാർഡിന്റെ മിസൈൽ, ഡ്രോൺ കേന്ദ്രങ്ങൾ, തീരദേശ റഡാർ നിരീക്ഷണ സംവിധാനങ്ങൾ ഉൾപ്പെടെ നിരവധി സൈനിക കേന്ദ്രങ്ങളാണ് ആക്രമണത്തിന് വിധേയമായത്.
ഹോർമുസ് കടലിടുക്കിനോട് ചേർന്ന ഖെഷെം ദ്വീപിലുണ്ടായ ബോംബാക്രമണത്തിൽ മൂന്ന് പേർ കൊല്ലപ്പെട്ടതായും റിപ്പോർട്ടുണ്ട്. ഇറാഖിലെ ആക്രമണങ്ങളിൽ 20 പേർ കൊല്ലപ്പെട്ടതായും വിവരങ്ങൾ പുറത്തുവന്നിട്ടുണ്ട്.
ജോർദാനിൽ മിസൈൽ ആക്രമണം; സംഘർഷം കനക്കുന്നു
More Read
ജോർദാനിലെ യു.എസ്. സൈനിക താവളത്തിന് നേരെ ഇറാൻ മിസൈൽ ആക്രമണം നടത്തിയതിന് പിന്നാലെയാണ് അമേരിക്ക തിരിച്ചടിയുമായി രംഗത്തെത്തിയത്.
അതേസമയം, ജോർദാനിലേക്ക് വിക്ഷേപിച്ച അഞ്ച് ഇറാനിയൻ മിസൈലുകൾ സൈന്യം തകർത്തതായി അധികൃതർ അറിയിച്ചു. കുവൈത്തിന്റെ വടക്കൻ മേഖലയിലെ ഒരു ചൈനീസ് കമ്പനിയുടെ സ്ഥാപനത്തിന് നേരെയുണ്ടായ ആക്രമണത്തിൽ ഒരാൾ കൊല്ലപ്പെട്ടതായും റിപ്പോർട്ടുണ്ട്.
ഹോർമുസ് കടലിടുക്ക് വീണ്ടും സംഘർഷ കേന്ദ്രം
ജൂൺ 17-ന് നിലവിൽവന്ന ഇടക്കാല വെടിനിർത്തൽ കരാറിന് ശേഷം മേഖലയിൽ ശാന്തത നിലനിന്നിരുന്നു. എന്നാൽ, ഹോർമുസ് കടലിടുക്കിന്റെ നിയന്ത്രണവുമായി ബന്ധപ്പെട്ട തർക്കമാണ് വീണ്ടും സംഘർഷത്തിന് വഴിവെച്ചതെന്നാണ് വിലയിരുത്തൽ.
മുമ്പ് ഹോർമുസ് മേഖലയിലെ കപ്പലുകൾക്ക് നേരെയുണ്ടായ ആക്രമണങ്ങളെ തുടർന്ന് ഇരുവിഭാഗവും ആഴ്ചകളോളം പരസ്പരം ആക്രമണം നടത്തിയിരുന്നു. പിന്നീട് അമേരിക്ക ആക്രമണങ്ങളിൽ അയവ് വരുത്തിയതോടെ യു.എസ്. സഖ്യകക്ഷികളെ ലക്ഷ്യമിട്ടുള്ള നടപടികളും നിർത്തുന്നതായി ഇറാൻ പ്രഖ്യാപിച്ചിരുന്നു.
ഈജിപ്ത് തുറമുഖത്ത് ഡ്രോൺ ആക്രമണം
ഇതിനിടെ, ഈജിപ്തിലെ ഡമിയേറ്റ തുറമുഖത്ത് നങ്കൂരമിട്ടിരുന്ന പ്രകൃതിവാതകം കയറ്റിയ യു.എസ്., ഗ്രീക്ക് കപ്പലുകൾക്ക് നേരെ ഡ്രോൺ ആക്രമണം നടന്നു. ആക്രമണത്തെ തുടർന്ന് കപ്പലുകളിൽ തീപിടിത്തമുണ്ടായതായി റിപ്പോർട്ടുകൾ പറയുന്നു.
ആക്രമണത്തിന്റെ ഉത്തരവാദിത്വം ഇതുവരെ ആരും ഏറ്റെടുത്തിട്ടില്ല. സംഭവത്തിന് പിന്നിൽ ഇറാനോ ഇറാൻ പിന്തുണയ്ക്കുന്ന സായുധസംഘങ്ങളോ ആകാമെന്നാണ് സുരക്ഷാ ഏജൻസികളുടെ പ്രാഥമിക വിലയിരുത്തൽ. ഫെബ്രുവരിയിൽ യുദ്ധം ആരംഭിച്ചതിന് ശേഷം ഈജിപ്തിലെ ലക്ഷ്യങ്ങൾക്ക് നേരെ റിപ്പോർട്ട് ചെയ്യുന്ന ആദ്യ വലിയ ആക്രമണമാണിത്
