തിരുവനന്തപുരം: സംസ്ഥാനത്ത് മഴ മുന്നറിയിപ്പിൽ മാറ്റം വരുത്തി കാലാവസ്ഥ വകുപ്പ്. ഇന്ന് എട്ട് ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്.
തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂർ ജില്ലകളിലാണ് മുന്നറിയിപ്പ് നൽകിയിരിക്കുന്നത്.
ഒറ്റപ്പെട്ട ഇടങ്ങളിൽ ശക്തമായ മഴയ്ക്കും മണിക്കൂറിൽ ഉയർന്ന വേഗതയിൽ കാറ്റ് വീശാനും സാധ്യതയുണ്ടെന്ന് കാലാവസ്ഥ വകുപ്പ് അറിയിച്ചു.
കടൽക്ഷോഭ സാധ്യത നിലനിൽക്കുന്നതിനാൽ തീരദേശ മേഖലകളിലെ ജനങ്ങൾ അതീവ ജാഗ്രത പാലിക്കണമെന്നും നിർദേശം നൽകിയിട്ടുണ്ട്.
നാളെ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം ജില്ലകളിൽ യെല്ലോ അലർട്ട് തുടരും. തിങ്കളാഴ്ച കോട്ടയം, ഇടുക്കി, എറണാകുളം ജില്ലകളിലും മുന്നറിയിപ്പ് പ്രഖ്യാപിച്ചിട്ടുണ്ട്.
More Read
മഴ ശക്തമാകാൻ സാധ്യതയുള്ളതിനാൽ താഴ്ന്ന പ്രദേശങ്ങളിലുള്ളവർ ജാഗ്രത പാലിക്കണമെന്നും മലയോര മേഖലകളിൽ രാത്രിയാത്ര പരമാവധി ഒഴിവാക്കണമെന്നും അധികൃതർ നിർദേശിച്ചു.
മത്സ്യത്തൊഴിലാളികളും തീരദേശവാസികളും കാലാവസ്ഥ മുന്നറിയിപ്പുകൾ കൃത്യമായി പിന്തുടരണമെന്നും മുന്നറിയിപ്പുണ്ട്.
അതേസമയം, പടിഞ്ഞാറൻ കാറ്റ് ദുർബലമായതിനാൽ കേരളത്തിൽ കാലവർഷം എത്തുന്നത് വൈകാനിടയുണ്ടെന്നാണ് വിലയിരുത്തൽ. ജൂൺ ആദ്യവാരത്തിൽ കാലവർഷം സജീവമാകുമെന്നാണ് നിലവിലെ സൂചന.
More Read
അറബിക്കടലിൽ രൂപംകൊണ്ട ചക്രവാതച്ചുഴി പടിഞ്ഞാറൻ കാറ്റിന്റെ കേരളത്തിലേക്കുള്ള സഞ്ചാരത്തെ ബാധിച്ചിരിക്കുകയാണ്. ഈ സാഹചര്യം ദുർബലമാകുകയോ പടിഞ്ഞാറോട്ട് നീങ്ങുകയോ ചെയ്താൽ മാത്രമേ കാലവർഷത്തിന് സംസ്ഥാനത്തേക്ക് പ്രവേശിക്കാൻ അനുകൂല സാഹചര്യമൊരുങ്ങൂ.
നേരത്തെ മെയ് 26-ന് തന്നെ കാലവർഷം കേരളത്തിലെത്തുമെന്നായിരുന്നു കാലാവസ്ഥാ വകുപ്പിന്റെ പ്രവചനം.
English Summary: The India Meteorological Department has issued yellow alerts in eight Kerala districts amid forecasts of heavy rain and strong winds. The southwest monsoon is also expected to be delayed due to weak westerly winds and atmospheric disturbances over the Arabian Sea.
