കോട്ടയം: ചരിത്രത്തിലാദ്യമായി കിലോയ്ക്ക് 300 രൂപയിലെത്തിയ റബർ വിലയിൽ ഒരാഴ്ചയ്ക്കിടെ വൻ ഇടിവ്. 24 രൂപ കുറഞ്ഞതോടെ റബർ വില വീണ്ടും താഴേക്ക് പോകുമെന്ന ആശങ്കയിലാണ് സംസ്ഥാനത്തെ കർഷകർ. റബർ ബോർഡിന്റെ ആർ.എസ്.4 വില 276 രൂപയായും വ്യാപാരി വില 268 രൂപയായും കുറഞ്ഞു. ഇതിലും താഴ്ന്ന നിരക്കിലാണ് പല വ്യാപാരികളും കർഷകരിൽനിന്ന് റബർ വാങ്ങുന്നത്.
റബർ വിലയിടിവിന് പിന്നിൽ ടയർ വ്യവസായികളുടെ ഇടപെടലോ?
ടയർ വ്യവസായികൾക്കുവേണ്ടി ഇടനിലക്കാർ വിപണിയിൽനിന്ന് വിട്ടുനിന്ന് വില കുറയ്ക്കുകയാണെന്നാണ് കർഷകരുടെ ആരോപണം. അതേസമയം, മഴ കുറഞ്ഞതോടെ ടാപ്പിങ് സജീവമായതും വിപണിയിൽ റബറിന്റെ ലഭ്യത വർധിപ്പിച്ചു.
വില ഉയർന്ന സമയത്ത് ഷീറ്റുകൾ വിറ്റഴിക്കാതെ സൂക്ഷിച്ചിരുന്ന കർഷകർ വില താഴ്ന്നതോടെ വിൽപ്പനയ്ക്ക് എത്തിച്ചതും വിപണിയിലെ സമ്മർദ്ദം വർധിപ്പിച്ചു. ഇതോടെ ആവശ്യകതയും കുറഞ്ഞു.
അന്താരാഷ്ട്ര വിപണിയിലെ വിലയിടിവും ഇറക്കുമതി സമ്മർദ്ദവും
അന്താരാഷ്ട്ര വിപണിയിലും റബർ വില കുത്തനെ ഇടിഞ്ഞു. ബാങ്കോക്കിൽ കിലോയ്ക്ക് 258 രൂപയിലേക്ക് വില താഴ്ന്നു. ആഭ്യന്തര വിപണിയുമായി 25 രൂപയിലേറെ വ്യത്യാസം വന്നതോടെ റബർ ഇറക്കുമതി വർധിപ്പിക്കാനുള്ള സമ്മർദ്ദവും വൻകിട വ്യവസായികൾ ശക്തമാക്കി.
റബർ ലഭ്യതക്കുറവ് ചൂണ്ടിക്കാട്ടി നികുതിയില്ലാതെ ഇറക്കുമതി അനുവദിക്കണമെന്നാവശ്യപ്പെട്ട് വൻകിട വ്യവസായികൾ കഴിഞ്ഞ ദിവസം കേന്ദ്രസർക്കാരിന് നിവേദനം നൽകിയിരുന്നു.
എന്നാൽ പശ്ചിമേഷ്യൻ യുദ്ധം തുടരുന്നതിനാൽ കപ്പൽ ഗതാഗതം സുഗമമല്ല. ഇതോടെ വിദേശത്തുനിന്ന് റബർ എത്തിക്കുന്നതിൽ കമ്പനികൾക്ക് തടസ്സം നേരിടുന്നു. അതിനാൽ ആഭ്യന്തര വിപണിയിൽനിന്ന് വിട്ടുനിന്ന് വില താഴ്ത്താനുള്ള നീക്കമാണ് നടക്കുന്നതെന്നാണ് കർഷകരുടെ ആരോപണം.
ആവശ്യകത 15 ലക്ഷം ടൺ; ഉത്പാദനം ഒമ്പത് ലക്ഷത്തിൽ താഴെ
രാജ്യത്ത് പ്രതിവർഷം ഏകദേശം 15 ലക്ഷം ടൺ റബർ ആവശ്യമാണ്. എന്നാൽ ആഭ്യന്തര ഉത്പാദനം ഒമ്പത് ലക്ഷം ടണ്ണിൽ താഴെയാണ്. ആറു ലക്ഷം ടണ്ണിലേറെ കുറവുണ്ടെന്ന കണക്കുകൾ ഉയർത്തിക്കാട്ടിയാണ് ഇറക്കുമതി വർധിപ്പിക്കാൻ വ്യവസായികൾ ശ്രമിക്കുന്നത്.
വിദേശ വിപണിയിലെ വിലയിടിവ് മുതലെടുത്ത് കൂടുതൽ റബർ ഇറക്കുമതി ചെയ്ത് സംഭരിക്കാനാണ് വൻകിട കമ്പനികളുടെ നീക്കമെന്നാണ് കർഷകരുടെ വിലയിരുത്തൽ. ഇറക്കുമതി നികുതി ഒഴിവാക്കിയാൽ മാത്രമേ കൂടുതൽ ലാഭം നേടാനാകൂ എന്നതിനാൽ നികുതിയിളവിനായി സമ്മർദ്ദം ശക്തമാക്കുകയാണ്.
താങ്ങുവില 250 രൂപ; ആനുകൂല്യം കർഷകർക്ക് ലഭിക്കുന്നില്ല
കിലോയ്ക്ക് 250 രൂപയാണ് സംസ്ഥാന സർക്കാർ റബറിന് താങ്ങുവില നിശ്ചയിച്ചിരിക്കുന്നത്. എന്നാൽ വിപണിവില ഉയർന്നുനിന്ന കാലത്ത് ഈ പദ്ധതിയുടെ പ്രയോജനം കർഷകർക്ക് ലഭിച്ചിരുന്നില്ല.
പദ്ധതിക്കായി ബജറ്റിൽ വകയിരുത്തിയ തുക സർക്കാർ മറ്റ് ആവശ്യങ്ങൾക്കായി വകമാറ്റി ചെലവഴിക്കുകയാണെന്നും വിമർശനമുണ്ട്.
ഇതിനിടെ, റെക്കാഡ് വിലയിൽനിന്ന് റബർ താഴേക്ക് പതിച്ചതോടെ വ്യാപാരി വിലയായ 268 രൂപയിലും കുറഞ്ഞ നിരക്കിലാണ് ചില കർഷകർക്ക് ലഭിക്കുന്നത്. വിലയിടിവ് തുടർന്നാൽ വിപണിവില സർക്കാർ പ്രഖ്യാപിച്ച താങ്ങുവിലയായ 250 രൂപയ്ക്കും താഴെയെത്തുമെന്ന ആശങ്കയും ശക്തമാണ്.
ടയർ വ്യവസായികളുടെ വിലയിടിക്കൽ തന്ത്രങ്ങൾക്കു മുന്നിൽ കേന്ദ്രസർക്കാരും റബർ ബോർഡും ഫലപ്രദമായി ഇടപെടുന്നില്ലെന്നാണ് കർഷകരുടെ പ്രധാന പരാതി. റബർ വിലയിലെ അസ്ഥിരത തുടരുന്നത് കർഷകരുടെ വരുമാനത്തെയും ഉപജീവനത്തെയും പ്രതികൂലമായി ബാധിക്കുമെന്നാണ് വിലയിരുത്തൽ.
