അഹമ്മദാബാദ്: ഇന്ത്യൻ പ്രീമിയർ ലീഗ് 2026 സീസണിൽ റോയൽ ചലഞ്ചേഴ്സ് ബെംഗളൂരു കിരീടം സ്വന്തമാക്കി. ഫൈനലിൽ ഗുജറാത്ത് ഉയർത്തിയ 156 റൺസ് വിജയലക്ഷ്യം അഞ്ച് വിക്കറ്റ് നഷ്ടത്തിൽ 18 ഓവറിൽ തന്നെ മറികടന്നാണ് ബെംഗളൂരു കിരീടം ഉറപ്പിച്ചത്.
വിജയത്തിൽ നിർണായക പങ്കുവഹിച്ചത് വിരാട് കോഹ്ലിയായിരുന്നു. 42 പന്തുകൾ നേരിട്ട അദ്ദേഹം 75 റൺസ് നേടി ടീമിന്റെ ടോപ് സ്കോററുമായി. മറുപടി ബാറ്റിങ്ങിൽ വെങ്കടേഷ് അയ്യരോടൊപ്പം കോഹ്ലി ആർസിബിക്ക് അതിവേഗ തുടക്കമാണ് സമ്മാനിച്ചത്. ഇരുവരും ചേർന്ന് ആദ്യ 4.3 ഓവറിൽ 62 റൺസ് കൂട്ടിച്ചേർത്തു.
16 പന്തിൽ 32 റൺസ് നേടിയ വെങ്കടേഷ് അയ്യരെ പുറത്താക്കി ഗുജറാത്തിന് മുഹമ്മദ് സിറാജ് ആദ്യ ബ്രേക്ക്ത്രൂ നൽകി. തുടർന്ന് ദേവ്ദത്ത് പടിക്കൽ, ക്രുണാൽ പാണ്ഡ്യ എന്നിവർ വേഗത്തിൽ മടങ്ങിയെങ്കിലും കോഹ്ലി ഇന്നിങ്സ് നിയന്ത്രിച്ചു. രജത് പാട്ടിദാർ 15 റൺസും ടിം ഡേവിഡ് 24 റൺസും നേടി പിന്തുണ നൽകി.
അവസാനഘട്ടത്തിൽ ജിതേഷ് ശർമയ്ക്കൊപ്പം കോഹ്ലി നടത്തിയ കൂട്ടുകെട്ടാണ് ബെംഗളൂരുവിനെ വിജയത്തിലേക്ക് നയിച്ചത്. 18 ഓവറിൽ അഞ്ച് വിക്കറ്റ് നഷ്ടത്തിൽ 161 റൺസ് നേടിയ ആർസിബി കിരീടം ആഘോഷിച്ചു.
അതിന് മുമ്പ് ടോസ് നേടിയ ബെംഗളൂരു നായകൻ രജത് പാട്ടിദാർ ബൗളിങ് തിരഞ്ഞെടുക്കുകയായിരുന്നു. ആദ്യം ബാറ്റ് ചെയ്ത ഗുജറാത്തിന് മികച്ച തുടക്കം ലഭിച്ചില്ല. നായകൻ ശുഭ്മൻ ഗിൽ, സായ് സുദർശൻ, നിഷാന്ത് സിദ്ദു, ജോസ് ബട്ലർ എന്നിവർ നിരാശപ്പെടുത്തിയതോടെ ടീം 12.1 ഓവറിൽ 73 റൺസിന് നാല് വിക്കറ്റ് നഷ്ടത്തിൽ പ്രതിസന്ധിയിലായി.
More Read
ഇടക്കാലത്ത് വാഷിങ്ടൺ സുന്ദർ പൊരുതി നിന്നു. 37 പന്തിൽ 50 റൺസ് നേടിയ അദ്ദേഹം ഗുജറാത്തിന്റെ ടോപ് സ്കോററായിരുന്നു. അർഷദ് ഖാൻ 15 റൺസ് നേടി പിന്തുണച്ചെങ്കിലും മറ്റാർക്കും കാര്യമായ സംഭാവന നൽകാനായില്ല. നിശ്ചിത 20 ഓവറിൽ എട്ട് വിക്കറ്റ് നഷ്ടത്തിൽ 155 റൺസാണ് ഗുജറാത്ത് നേടിയത്.
English Summary:
Royal Challengers Bengaluru won the IPL 2026 title by defeating Gujarat in the final. Chasing 156, RCB reached the target in 18 overs with five wickets in hand. Virat Kohli starred with 75 runs off 42 balls, leading Bengaluru to another IPL crown.
