ഭേദമാക്കാനാകാത്ത ഗുരുതരമായ രോഗങ്ങളാൽ കടുത്ത ശാരീരിക വേദന അനുഭവിക്കുന്ന പ്രായപൂർത്തിയായവർക്ക് കർശനമായ വ്യവസ്ഥകളോടെ ദയാവധം (Euthanasia) അനുവദിക്കുന്ന ചരിത്രപ്രധാനമായ ബില്ലിന് ഫ്രാൻസിന്റെ ദേശീയ അസംബ്ലി അന്തിമ അംഗീകാരം നൽകി. പ്രസിഡന്റ് ഇമ്മാനുവൽ മാക്രോൺ 2023-ൽ പ്രഖ്യാപിച്ച ദയാവധത്തിന് അനുകൂലമായ നിയമനിർമാണത്തിന്റെ ഏറ്റവും പ്രധാനപ്പെട്ട ഘട്ടമാണിത്.
നേരത്തെ ഫ്രഞ്ച് പാർലമെന്റിന്റെ ഉപരിസഭയായ സെനറ്റ് ഈ ബിൽ തള്ളിക്കളഞ്ഞിരുന്നു. എന്നാൽ ഇത്തരം സാഹചര്യങ്ങളിൽ ഫ്രഞ്ച് നിയമപ്രകാരം ദേശീയ അസംബ്ലിക്കാണ് അന്തിമ തീരുമാനമെടുക്കാനുള്ള അധികാരം എന്നതിനാൽ ബില്ലിന് അംഗീകാരം ലഭിക്കുകയായിരുന്നു. എങ്കിലും ഈ പുതിയ ബിൽ രാജ്യത്ത് ഔദ്യോഗികമായി നിയമമായി മാറി പ്രാബല്യത്തിൽ വരുന്നതിന് മുൻപ് ഫ്രാൻസിന്റെ ഭരണഘടനാ സമിതിയുടെ (Constitutional Council) അന്തിമ പരിശോധന കൂടി പൂർത്തിയാക്കേണ്ടതുണ്ട്.
സ്വയം മരുന്ന് സ്വീകരിക്കാം; വ്യവസ്ഥകൾ ഇങ്ങനെ
പുതിയ നിയമപ്രകാരം മാരകരോഗം ബാധിച്ച ഒരാൾക്ക് മരണം വരിക്കുന്നതിനുള്ള പ്രത്യേക മരുന്ന് ഡോക്ടറുടെ നിർദ്ദേശപ്രകാരം സ്വയമേവ സ്വീകരിക്കാൻ അനുവാദമുണ്ടാകും. ഇതിനായി സർക്കാർ ചില കർശനമായ മാനദണ്ഡങ്ങൾ നിശ്ചയിച്ചിട്ടുണ്ട്. 18 വയസ്സ് പൂർത്തിയായ ഫ്രഞ്ച് പൗരന്മാർക്കും, നിയമപരമായി ഫ്രാൻസിൽ സ്ഥിരതാമസമാക്കിയ വിദേശികൾക്കും മാത്രമാണ് ഈ നിയമത്തിന്റെ ആനുകൂല്യം ലഭിക്കുക.
ഏറ്റവും പ്രധാനമായി, അപേക്ഷ നൽകുന്നത് പൂർണ്ണമായും അതാത് വ്യക്തികളുടെ സ്വന്തം ഇഷ്ടപ്രകാരമായിരിക്കണം. കുടുംബാംഗങ്ങളുടെയോ മറ്റുള്ളവരുടെയോ നിർബന്ധത്തിന് വഴങ്ങി അപേക്ഷിക്കാൻ പാടില്ല. അതേസമയം, സ്വയം തീരുമാനമെടുക്കാൻ ശേഷിയില്ലാത്ത ഗുരുതര മാനസികരോഗമുള്ളവർക്കും, ഓർമ്മശക്തിയെ ബാധിക്കുന്ന അൽസ്ഹൈമേഴ്സ് (Alzheimer’s) പോലുള്ള രോഗമുള്ളവർക്കും ഈ നിയമപ്രകാരം ദയാവധത്തിന് അപേക്ഷിക്കാൻ അർഹതയുണ്ടായിരിക്കില്ല.
15 ദിവസത്തെ പരിശോധന; ചെലവ് മുഴുവൻ സർക്കാർ ഇൻഷുറൻസിൽ
ഒരു രോഗി ദയാവധത്തിനായി അപേക്ഷ സമർപ്പിച്ചാൽ, 15 ദിവസത്തിനകം പ്രത്യേക ആരോഗ്യവിദഗ്ദ്ധ സമിതി രോഗിയെ നേരിട്ട് കണ്ട് പരിശോധനകൾ നടത്തും. രോഗിയുടെ അവസ്ഥ ഭേദമാക്കാനാകാത്തതാണെന്ന് സമിതി ഉറപ്പുവരുത്തിയ ശേഷം മാത്രമേ ഇതിനുള്ള അനുമതി പത്രം നൽകുകയുള്ളൂ. അനുമതി ലഭിച്ചുകഴിഞ്ഞാൽ രോഗിക്ക് സ്വന്തം വീട്ടിലോ അല്ലെങ്കിൽ ഏതെങ്കിലും ആരോഗ്യ സ്ഥാപനത്തിലോ വെച്ച് ബന്ധുക്കളുടെ സാന്നിധ്യത്തിൽ മരുന്ന് സ്വീകരിക്കാം.
More Read
ഈ സമയത്ത് അടിയന്തര സഹായത്തിനായി ഒരു ഡോക്ടറോ നഴ്സോ നിർബന്ധമായും രോഗിയുടെ സമീപത്തുണ്ടാകണം. ഈ പ്രക്രിയയ്ക്ക് ആവശ്യമായി വരുന്ന മുഴുവൻ ചികിത്സാ ചെലവുകളും ഫ്രാൻസിന്റെ ദേശീയ ആരോഗ്യ ഇൻഷുറൻസ് പദ്ധതിയാണ് (National Health Insurance) പൂർണ്ണമായും വഹിക്കുന്നത്.
നിലവിലുള്ള ഫ്രഞ്ച് നിയമപ്രകാരം മരണാസന്നരായ രോഗികൾക്ക് കഠിനമായ വേദന ഒഴിവാക്കാൻ ‘ഡീപ്പ് സെഡേഷൻ’ (Deep Sedation) നൽകി ഉറക്കാൻ അനുവാദമുണ്ടായിരുന്നെങ്കിലും, ജീവനൊടുക്കാൻ സഹായിക്കുന്ന ‘അസിസ്റ്റഡ് ഡൈയിങ്ങ്’ രീതികൾക്ക് അനുമതിയുണ്ടായിരുന്നില്ല. ഇതിനാൽ മുൻപ് നിരവധി ഫ്രഞ്ച് പൗരന്മാർ ദയാവധത്തിന് നിയമസാധുതയുള്ള അയൽരാജ്യങ്ങളെ ആശ്രയിക്കേണ്ടി വന്നിരുന്നു.
2023-ൽ പുറത്തുവന്ന ഔദ്യോഗിക റിപ്പോർട്ടുകൾ പ്രകാരം ഫ്രാൻസിലെ ഭൂരിഭാഗം ജനങ്ങളും ഈ നിയമത്തെ അനുകൂലിക്കുന്നുണ്ടെങ്കിലും, വിവിധ മത-സാമൂഹിക സംഘടനകൾ ഇതിനെതിരെ ശക്തമായി രംഗത്തുണ്ട്. ഈ നിയമം വരുന്നത് പ്രായമായവരിലും ഭിന്നശേഷിക്കാരിലും ജീവനൊടുക്കാനുള്ള മാനസിക സമ്മർദ്ദം ചെലുത്താൻ കാരണമാകുമെന്നാണ് ഇവരുടെ പ്രധാന ആശങ്ക.
