പവർകട്ട് വീണ്ടും; എമർജൻസി ലൈറ്റിനും ഇൻവർട്ടറിനും ഡിമാൻഡ്

തിരുവനന്തപുരം: വൈദ്യുതി എപ്പോൾ പോകുമെന്നോ എപ്പോൾ തിരിച്ചെത്തുമെന്നോ ഉറപ്പില്ലാത്ത സാഹചര്യം തുടരുമ്പോൾ വിപണിയിലും അതിന്റെ പ്രതിഫലനം. ഏറെക്കാലമായി കാര്യമായ വിൽപനയില്ലാതെ കിടന്നിരുന്ന എമർജൻസി ലൈറ്റുകൾക്ക് വീണ്ടും ആവശ്യക്കാർ. വീടുകളിൽ വൈദ്യുതി ബാക്കപ്പ് ഒരുക്കാൻ ഇൻവർട്ടർ വാങ്ങുന്നവരുടെ എണ്ണവും വർധിച്ചു.

തുടർച്ചയായ പവർകട്ടിനൊപ്പം കടുത്ത ചൂടും വൈദ്യുതി ബാക്കപ്പ് ഉപകരണങ്ങളുടെ വിൽപന ഉയരാൻ കാരണമായിട്ടുണ്ട്. ആവശ്യകത കൂടിയതോടെ ഡിമാൻഡിന് അനുസരിച്ച് സ്റ്റോക്ക് ഉറപ്പാക്കാൻ പോലും ചില വിൽപനശാലകൾ ബുദ്ധിമുട്ടുകയാണെന്ന് വ്യാപാരികൾ പറയുന്നു.

പവർകട്ട്; ഇൻവർട്ടർ വാങ്ങാൻ ഇടത്തരക്കാരും

മുൻകാലങ്ങളിൽ സാമ്പത്തികമായി മുന്നിലുള്ള കുടുംബങ്ങളായിരുന്നു പ്രധാനമായും ഇൻവർട്ടറുകൾ വാങ്ങിയിരുന്നതെങ്കിൽ ഇപ്പോൾ ഇടത്തരക്കാരും വലിയ തോതിൽ ഇവ തേടിയെത്തുന്നുണ്ട്.

കുട്ടികളും പ്രായമായവരുമുള്ള വീടുകളിലാണ് ഇൻവർട്ടറിന് കൂടുതൽ ആവശ്യക്കാരെന്ന് വ്യാപാരികൾ പറയുന്നു. വീടുകൾക്ക് പുറമെ ചെറുകിട വ്യാപാര സ്ഥാപനങ്ങളും ക്ലിനിക്കുകളും വൈദ്യുതി മുടക്കം നേരിടാൻ ഇൻവർട്ടർ വാങ്ങുന്നുണ്ട്.

ലിഥിയം ഇൻവർട്ടറുകൾക്ക് കൂടുതൽ ഡിമാൻഡ്

ലിഥിയം ഇൻവർട്ടറുകൾക്കാണ് നിലവിൽ വിപണിയിൽ കൂടുതൽ ആവശ്യക്കാരുള്ളത്. വി-ഗാർഡ്, ലൂമിനസ് തുടങ്ങിയ മുൻനിര ബ്രാൻഡുകൾക്ക് ആവശ്യക്കാർ ഏറെയാണ്.

ഏകദേശം 25,000 രൂപ മുതലാണ് ലിഥിയം ഇൻവർട്ടറുകളുടെ വില. ദീർഘകാല ഉപയോഗവും കുറഞ്ഞ പരിപാലനവും കണക്കിലെടുത്താണ് പലരും ലിഥിയം മോഡലുകളിലേക്ക് മാറുന്നതെന്ന് വ്യാപാരികൾ പറയുന്നു.

സ്റ്റെബിലൈസറിനും റീച്ചാർജബിൾ ഫാനിനും ആവശ്യക്കാർ

ഇടയ്ക്കിടെയുള്ള പവർകട്ട് പതിവായതോടെ സെർവോ സ്റ്റെബിലൈസറുകളുടെ വിൽപനയും വർധിച്ചിട്ടുണ്ട്. സോളാർ സംവിധാനമുള്ള വീടുകളിലാണ് സെർവോ വോൾട്ടേജ് സ്റ്റെബിലൈസറുകൾക്ക് പ്രധാനമായും ആവശ്യക്കാർ.

വൈദ്യുതി വോൾട്ടേജിലെ വ്യതിയാനങ്ങളിൽനിന്ന് ഇലക്ട്രോണിക് ഉപകരണങ്ങളെ സംരക്ഷിക്കാൻ ഇവ സഹായിക്കും.

അതേസമയം, എമർജൻസി ലൈറ്റുകൾക്കും റീച്ചാർജബിൾ ഫാനുകൾക്കും ഓൺലൈൻ വിപണിയിലും ആവശ്യക്കാർ കൂടിയിട്ടുണ്ട്. 600 രൂപ മുതലാണ് റീച്ചാർജബിൾ ഫാനുകളുടെ വില. എമർജൻസി ലൈറ്റുകൾക്ക് 700 മുതൽ 1,200 രൂപ വരെയാണ് വില.

വൈദ്യുതി മുടങ്ങിയാൽ ഇനി ‘ബാക്കപ്പ്’ ജീവിതം

വൈദ്യുതി മുടക്കം പതിവാകുന്നതിനൊപ്പം അതിനൊപ്പമുള്ള ‘ബാക്കപ്പ്’ ജീവിതവും വീടുകളിൽ സാധാരണമാകുകയാണ്. പവർകട്ട് എത്രകാലം തുടരുമെന്ന കാര്യത്തിൽ വ്യക്തതയില്ലാത്തതിനാൽ മുൻകരുതലെടുക്കുകയാണ് പല കുടുംബങ്ങളും.

ഇൻവർട്ടർ, എമർജൻസി ലൈറ്റ്, റീച്ചാർജബിൾ ഫാൻ തുടങ്ങിയവയുടെ ആവശ്യകത വരും ദിവസങ്ങളിലും ഉയർന്നേക്കുമെന്നാണ് വ്യാപാരികളുടെ കണക്കുകൂട്ടൽ. ഇതോടെ ആവശ്യമായ സ്റ്റോക്ക് നേരത്തെ തന്നെ ഉറപ്പാക്കാനുള്ള ശ്രമത്തിലാണ് വിൽപനശാലകളും.

English Summary

Frequent power cuts and intense heat have increased demand for power backup products in Kerala. Inverters, emergency lights, rechargeable fans and servo stabilizers are seeing higher sales, with lithium inverters particularly in demand. Retailers say demand is strong among middle-class families, small businesses and clinics, while some stores are struggling to maintain adequate stock.