തിരുവനന്തപുരം: പ്ലാസ്റ്റിക് മദ്യക്കുപ്പി പദ്ധതി പിൻവലിച്ച ബെവറേജസ് കോർപ്പറേഷന്റെ (ബെവ്കോ) നടപടിയിൽ അതൃപ്തി രേഖപ്പെടുത്തി എക്സൈസ് മന്ത്രി എം ലിജു. പദ്ധതി അവസാനിപ്പിക്കാൻ ബെവ്കോ എംഡി ഉത്തരവിറക്കിയത് തന്റെ അറിവോ കൂടിയാലോചനയോ ഇല്ലാതെയാണെന്ന് മന്ത്രി വ്യക്തമാക്കി.
ഇതേ തുടർന്ന് ബെവ്കോ എംഡി യോഗേഷ് ഗുപ്തയോട് ഇന്ന് രാവിലെ 10 മണിക്ക് നേരിട്ട് ഹാജരായി വിശദീകരണം നൽകാൻ മന്ത്രി നിർദേശം നൽകി.
പ്ലാസ്റ്റിക് മദ്യക്കുപ്പി പദ്ധതി നിർത്തിയത് എന്തുകൊണ്ട്?
പ്ലാസ്റ്റിക് മദ്യക്കുപ്പികൾ തിരികെ ശേഖരിക്കുന്ന പദ്ധതി പരിസ്ഥിതി സംരക്ഷണത്തിന് ഗുണകരമാണെന്ന് മന്ത്രി പറഞ്ഞു. പ്ലാസ്റ്റിക് മലിനീകരണം കുറയ്ക്കാൻ ഈ പദ്ധതി സഹായിക്കുമെന്നും തദ്ദേശസ്വയംഭരണ വകുപ്പുമായി ചേർന്ന് പദ്ധതി കൂടുതൽ വ്യാപിപ്പിക്കാനുള്ള ആലോചനയുണ്ടെന്നും അദ്ദേഹം അറിയിച്ചു.
കൂടാതെ, ഓണത്തിന് ശേഷം ഇതുസംബന്ധിച്ച സമഗ്ര പദ്ധതി തയ്യാറാക്കുമെന്നും മന്ത്രി വ്യക്തമാക്കി.
20 രൂപ നിക്ഷേപ മാതൃകയിലായിരുന്നു പദ്ധതി
പ്ലാസ്റ്റിക് കുപ്പിയിൽ മദ്യം വാങ്ങുമ്പോൾ ഉപഭോക്താവിൽ നിന്ന് 20 രൂപ അധിക നിക്ഷേപമായി ഈടാക്കുകയും, അതേ ഔട്ട്ലെറ്റിൽ ഒഴിഞ്ഞ കുപ്പി തിരികെ നൽകിയാൽ ആ തുക മടക്കി നൽകുകയും ചെയ്യുന്നതായിരുന്നു പദ്ധതി.
More Read
തിരുവനന്തപുരം, കണ്ണൂർ ജില്ലകളിലെ 20 ബെവ്കോ ഔട്ട്ലെറ്റുകളിൽ പരീക്ഷണാടിസ്ഥാനത്തിൽ കഴിഞ്ഞ ഒക്ടോബറിലാണ് പദ്ധതി ആരംഭിച്ചത്. ക്ലീൻ കേരള കമ്പനിയുമായി സഹകരിച്ചായിരുന്നു പദ്ധതി നടപ്പാക്കിയത്.
പദ്ധതി അവസാനിപ്പിക്കാൻ കാരണങ്ങൾ
കൺസ്യൂമർഫെഡിന്റെ എതിർപ്പും കുപ്പി ശേഖരണത്തിനായി ടെൻഡർ വിളിച്ചിട്ടും അനുയോജ്യമായ കമ്പനി ലഭിക്കാതിരുന്നതുമാണ് പദ്ധതി അവസാനിപ്പിക്കാൻ കാരണമായതെന്ന് ബെവ്കോ വിശദീകരിച്ചു.
അതേസമയം, മന്ത്രിയുമായി ആലോചിക്കാതെയാണ് പദ്ധതി അവസാനിപ്പിക്കുന്ന ഉത്തരവിറക്കിയതെന്നാണ് എക്സൈസ് മന്ത്രിയുടെ ആരോപണം. ഇതോടെയാണ് വിഷയത്തിൽ വിശദീകരണം തേടി ബെവ്കോ എംഡിയെ നേരിട്ട് വിളിപ്പിച്ചത്.
