കോഴിക്കോട്: കോഴിക്കോട് കെഎസ്ഇബി ജാഗ്രതാ നിർദേശം പുറത്തിറക്കി. ജില്ലയിൽ കനത്ത മഴ തുടരുന്ന സാഹചര്യത്തിൽ വൈദ്യുതി സംബന്ധമായ അപകടങ്ങൾ ഒഴിവാക്കാൻ പൊതുജനങ്ങൾ അതീവ ജാഗ്രത പാലിക്കണമെന്ന് കെഎസ്ഇബി അറിയിച്ചു. വൈദ്യുതി തകരാറുകളോ അപകടസാധ്യതകളോ ശ്രദ്ധയിൽപ്പെട്ടാൽ ഉടൻ അധികൃതരെ വിവരം അറിയിക്കണമെന്നും നിർദേശിച്ചു.
വൈദ്യുതി തകരാറുകൾ റിപ്പോർട്ട് ചെയ്യാൻ ഹെൽപ് ലൈൻ
പൊതുജനങ്ങൾക്ക് പരാതികളും അടിയന്തര വിവരങ്ങളും അറിയിക്കാൻ കെഎസ്ഇബി പ്രത്യേക നമ്പറുകൾ നൽകിയിട്ടുണ്ട്.
- ടോൾ ഫ്രീ കസ്റ്റമർ കെയർ: 1912
- വാട്സ്ആപ്പ്: 9496001912
- വൈദ്യുതി അടിയന്തര സേവനം: 9496010692
വൈദ്യുതി സംബന്ധമായ ഏത് അടിയന്തര സാഹചര്യത്തിലും ഈ നമ്പറുകളിൽ ബന്ധപ്പെടാമെന്ന് കെഎസ്ഇബി അറിയിച്ചു.
കെഎസ്ഇബി പുറത്തിറക്കിയ സുരക്ഷാ നിർദേശങ്ങൾ
പൊട്ടിവീണ വൈദ്യുതി കമ്പികൾ, തകരാറിലായ ലൈനുകൾ, വൈദ്യുതി ലൈനുകളിലേക്ക് ചാഞ്ഞുനിൽക്കുന്ന മരങ്ങൾ എന്നിവ ഒരു കാരണവശാലും സമീപിക്കുകയോ സ്പർശിക്കുകയോ ചെയ്യരുത്.
അതേസമയം, ഇത്തരത്തിലുള്ള അപകടസാധ്യതകൾ ശ്രദ്ധയിൽപ്പെട്ടാൽ മറ്റുള്ളവരെയും അപകടമേഖലയിൽ നിന്ന് അകറ്റി നിർത്തുകയും ഉടൻ കെഎസ്ഇബിയെ വിവരം അറിയിക്കുകയും വേണമെന്ന് അധികൃതർ നിർദേശിച്ചു.
മഴക്കെടുതി രൂക്ഷം; വിവിധ ജില്ലകളിൽ വെള്ളപ്പൊക്ക ഭീഷണി
കേരളത്തിൽ അതിശക്തമായ മഴ തുടരുന്നതിനിടെ മഴക്കെടുതികളും രൂക്ഷമാകുകയാണ്. ഇതുവരെ ഏഴ് മരണങ്ങളാണ് റിപ്പോർട്ട് ചെയ്തിരിക്കുന്നത്. ഉരുൾപൊട്ടലിലും മണ്ണിടിച്ചിലിലും കോട്ടയം, ഇടുക്കി ജില്ലകളിൽ നാല് പേർക്ക് ജീവൻ നഷ്ടമായി.
കൂടാതെ, കോട്ടയം, ഇടുക്കി, പത്തനംതിട്ട ജില്ലകളിൽ വ്യാപകമായ നാശനഷ്ടമാണ് റിപ്പോർട്ട് ചെയ്യുന്നത്. കോട്ടയം പാല, ഈരാറ്റുപേട്ട എന്നിവിടങ്ങളിൽ വീടുകളിലും കടകളിലും വെള്ളം കയറി. ഇടുക്കിയിലെ ഉപ്പുതറ, ചപ്പാത്ത്, ഏലപ്പാറ, വണ്ടിപ്പെരിയാർ മേഖലകളിൽ ഉച്ചയ്ക്കുശേഷം മഴയ്ക്ക് നേരിയ ശമനമുണ്ടായതോടെ വെള്ളം ഇറങ്ങിത്തുടങ്ങി.
അതേസമയം, കോഴഞ്ചേരി, ആറന്മുള, റാന്നി ടൗൺ പ്രദേശങ്ങളിൽ വെള്ളക്കെട്ട് തുടരുകയാണ്. ഇവിടെ നിന്നുള്ള നിരവധി പേരെ ദുരിതാശ്വാസ ക്യാമ്പുകളിലേക്കും ബന്ധുവീടുകളിലേക്കും മാറ്റിയിട്ടുണ്ട്.
