കെഎംഎസ്‌സിഎൽ ക്വാളിറ്റി കൺട്രോൾ വിഭാഗം നിർത്തലാക്കി

തിരുവനന്തപുരം: കേരള മെഡിക്കൽ സർവീസസ് കോർപ്പറേഷൻ ലിമിറ്റഡിലെ (കെ.എം.എസ്.സി.എൽ) ക്വാളിറ്റി കൺട്രോൾ വിഭാഗം നിർത്തലാക്കി. ഇനി കെഎംഎസ്‌സിഎൽ വഴി വാങ്ങുന്ന മരുന്നുകളുടെ ഗുണനിലവാരം ഉറപ്പാക്കുന്നതിനുള്ള ചുമതല ഡ്രഗ്സ് കൺട്രോൾ വകുപ്പിനായിരിക്കും.

കെഎംഎസ്‌സിഎൽ വഴി സംഭരിക്കുകയും വിതരണം ചെയ്യുകയും ചെയ്ത മരുന്നുകളിൽ പലതിനും ഗുണനിലവാരമില്ലെന്ന് കണ്ടെത്തിയതിനെ തുടർന്നാണ് നടപടി. കോടിക്കണക്കിന് രൂപയുടെ മരുന്നുകൾ ഇത്തരത്തിൽ ഗുണനിലവാര പരിശോധനയിൽ പ്രശ്നമുള്ളതായി കണ്ടെത്തിയിരുന്നു.

കെഎംഎസ്‌സിഎൽ ക്വാളിറ്റി കൺട്രോൾ സംവിധാനത്തിൽ മാറ്റം

കെഎംഎസ്‌സിഎൽ വാങ്ങുന്ന മരുന്നുകളുടെ നിലവാരം അതേ സ്ഥാപനത്തിലെ ക്വാളിറ്റി കൺട്രോൾ വിഭാഗം തന്നെ പരിശോധിക്കുന്ന രീതി അഴിമതിക്ക് ഇടയാക്കുന്നതായി പരാതികളും ഉയർന്നിരുന്നു.

അതേസമയം, കെഎംഎസ്‌സിഎൽ സംഭരിക്കുന്ന മരുന്നുകളുടെ ഗുണനിലവാരം ഉറപ്പാക്കുന്ന സംവിധാനം കൂടുതൽ ശക്തിപ്പെടുത്തേണ്ടത് അനിവാര്യമായ സാഹചര്യത്തിലാണ് പുതിയ തീരുമാനം.

ഡ്രഗ്സ് കൺട്രോൾ വകുപ്പ് ഇനി പരിശോധന നടത്തും

മരുന്നുകളുടെ ഗുണനിലവാരം ഉറപ്പാക്കുന്നതിന് നിയമപരമായ അധികാരവും സാങ്കേതിക വൈദഗ്ധ്യവും നിയന്ത്രണ ചുമതലയും ഡ്രഗ്സ് കൺട്രോൾ വകുപ്പിനുണ്ട്.

ഇതോടെ കെഎംഎസ്‌സിഎൽ വഴി സംഭരിക്കുന്ന എല്ലാ മരുന്നുകളും സർക്കാർ ആശുപത്രികളിലേക്കും സർക്കാർ സ്ഥാപനങ്ങളിലേക്കും വിതരണം ചെയ്യുന്നതിന് മുമ്പ് ഡ്രഗ്സ് കൺട്രോൾ വകുപ്പ് പരിശോധിക്കും.

ആവശ്യമായ ഗുണനിലവാര പരിശോധനകൾ പൂർത്തിയാക്കിയ ശേഷമായിരിക്കും മരുന്നുകൾ വിതരണം ചെയ്യുക. ഇതുവഴി പരിശോധനാ സംവിധാനം കൂടുതൽ സുതാര്യവും കാര്യക്ഷമവുമാക്കുകയാണ് ലക്ഷ്യം.

ജീവനക്കാരെ കരാർ അടിസ്ഥാനത്തിൽ നിയമിക്കും

ഡ്രഗ്സ് കൺട്രോൾ വകുപ്പിലെ നിലവിലുള്ള ജീവനക്കാരുടെ കുറവ് പരിഗണിച്ചാണ് ഗുണനിലവാര പരിശോധനാ സംവിധാനം കാര്യക്ഷമമായി നടപ്പാക്കാൻ താൽക്കാലിക കരാർ അടിസ്ഥാനത്തിൽ ജീവനക്കാരെ നിയമിക്കുന്നതിനും അനുമതി നൽകിയത്.

കൂടാതെ, പരിശോധനകൾ സമയബന്ധിതമായി പൂർത്തിയാക്കുന്നതിനുള്ള സംവിധാനവും ഇതിലൂടെ ശക്തിപ്പെടുത്തും.

പരിശോധന സുതാര്യമാക്കാനാണ് നടപടിയെന്ന് കെ. മുരളീധരൻ

മരുന്നുകളുടെ നിലവാരപരിശോധന സുതാര്യമാക്കുന്നതിന്റെ ഭാഗമായാണ് നടപടിയെന്ന് മന്ത്രി കെ. മുരളീധരൻ പറഞ്ഞു.

ഇക്കാര്യങ്ങൾ ചൂണ്ടിക്കാട്ടി ആരോഗ്യവകുപ്പ് പ്രിൻസിപ്പൽ സെക്രട്ടറിക്ക് മന്ത്രി കത്ത് നൽകിയിട്ടുണ്ട്.