കരുവാറ്റ കൊലപാതകം: കുട്ടിക്കുറ്റവാളികളുടെ കസ്റ്റഡിയിൽ തീരുമാനം ഇന്ന്

ആലപ്പുഴ കരുവാറ്റയിൽ ഗൃഹനാഥനെ കൊലപ്പെടുത്തി കവർച്ച നടത്തിയ കേസിൽ കുട്ടിക്കുറ്റവാളികളെ കസ്റ്റഡിയിൽ വാങ്ങാനുള്ള പൊലീസ് നീക്കത്തിൽ ഇന്ന് നിർണായക തീരുമാനം. കുറ്റത്തിന്റെ ഗൗരവവും ക്രൂരതയും ചൂണ്ടിക്കാട്ടിയാണ് അഞ്ച് ദിവസത്തെ കസ്റ്റഡി അന്വേഷണസംഘം ആവശ്യപ്പെട്ടത്. ജുവനൈൽ ജസ്റ്റിസ് ബോർഡിന്റെ തീരുമാനം തുടർനിയമനടപടികളിലും നിർണായകമാകും.

കരുവാറ്റ കൊലപാതകത്തിൽ ജുവനൈൽ ബോർഡ് തീരുമാനം ഇന്ന്

പ്രതികൾക്ക് 18 വയസ് തികയാത്തതിനാൽ ബാലനീതി നിയമപ്രകാരമാണ് നടപടികൾ സ്വീകരിക്കേണ്ടത്. എന്നാൽ കുറ്റത്തിന്റെ ആസൂത്രണം, ഗൗരവം, കൃത്യം നടപ്പാക്കിയ രീതി, ക്രൂരത എന്നിവ കണക്കിലെടുത്ത് ഇളവ് നൽകരുതെന്നാണ് പൊലീസിന്റെ ആവശ്യം.

ജുവനൈൽ ജസ്റ്റിസ് ബോർഡ് പൊലീസിന്റെ റിപ്പോർട്ട് അംഗീകരിച്ചാൽ പ്രതികൾക്കെതിരെ കൂടുതൽ കടുത്ത നിയമനടപടികൾക്ക് സാധ്യതയുണ്ടാകും.

അഞ്ച് ദിവസത്തെ കസ്റ്റഡി ആവശ്യപ്പെട്ട് പൊലീസ്

കരുവാറ്റ കൊലപാതകത്തിൽ കവർച്ചയിലും കൊലപാതകത്തിലും നേരിട്ട് പങ്കെടുത്ത രണ്ടും മൂന്നും നാലും പ്രതികളെയാണ് പൊലീസ് കസ്റ്റഡിയിൽ ആവശ്യപ്പെട്ടിരിക്കുന്നത്.

വിശദമായ ചോദ്യം ചെയ്യലിനും തെളിവെടുപ്പിനുമായി അഞ്ച് ദിവസത്തേക്കാണ് അന്വേഷണസംഘം കസ്റ്റഡി ആവശ്യപ്പെട്ടത്. സംഭവത്തിന്റെ ആസൂത്രണവും കൃത്യം നടപ്പാക്കിയ രീതിയും രക്ഷപ്പെട്ട രീതിയും ഉൾപ്പെടെ കൂടുതൽ വിവരങ്ങൾ ശേഖരിക്കുകയാണ് ലക്ഷ്യം.

65കാരനായ ശിവൻകുട്ടി ചെട്ടിയാർ കൊല്ലപ്പെട്ടു

കരുവാറ്റയിൽ താമസിച്ചിരുന്ന കൊല്ലം പരവൂർ കൊച്ചാലുംമൂട് സരസ്വതി നിവാസിൽ ശിവൻകുട്ടി ചെട്ടിയാർ (65) ആണ് കൊല്ലപ്പെട്ടത്.

ശിവൻകുട്ടിയുടെ 13 വയസുള്ള ചെറുമകളും എട്ടാം ക്ലാസ് വിദ്യാർഥിനിയുമാണ് കേസിലെ ഒന്നാം പ്രതി. പെൺകുട്ടി കാമുകന് ക്വട്ടേഷൻ നൽകി കൃത്യം നടത്തുകയായിരുന്നുവെന്നാണ് അന്വേഷണസംഘത്തിന്റെ കണ്ടെത്തൽ.

കാമുകനും പരവൂർ സ്വദേശിയുമായ പ്ലസ് ടു വിദ്യാർഥിയാണ് രണ്ടാം പ്രതി. ഇയാളുടെ 17 വയസുള്ള രണ്ട് സുഹൃത്തുക്കളാണ് മൂന്നും നാലും പ്രതികൾ.

കൊലപാതകത്തിന്റെ കാരണം കണ്ടെത്താൻ അന്വേഷണം

ശിവൻകുട്ടി ചെട്ടിയാരോട് പെൺകുട്ടിക്ക് ഉണ്ടായിരുന്ന വിരോധത്തിന്റെ കാരണം വ്യക്തമാക്കുന്നതിനും അതുമായി ബന്ധപ്പെട്ട തെളിവുകൾ കണ്ടെത്തുന്നതിനുമാണ് പൊലീസ് പ്രധാനമായും ശ്രമിക്കുന്നത്.

കൂടാതെ, കൊലപാതകവും കവർച്ചയും എങ്ങനെ ആസൂത്രണം ചെയ്തു, കൃത്യം എങ്ങനെ നടപ്പാക്കി, സംഭവശേഷം എങ്ങനെയാണ് രക്ഷപ്പെട്ടത് തുടങ്ങിയ കാര്യങ്ങളിലും വ്യക്തത വരുത്തും.

സ്ക്രൂഡ്രൈവറിലെ വിരലടയാളവും പരിശോധിക്കും

അലമാര കുത്തിത്തുറക്കാൻ ഉപയോഗിച്ച സ്ക്രൂഡ്രൈവറിലെ വിരലടയാളം പ്രതികളുടെ വിരലടയാളവുമായി താരതമ്യം ചെയ്യുന്നതിനായി സാമ്പിളുകൾ ശേഖരിക്കാനും പൊലീസ് ലക്ഷ്യമിടുന്നു.

രണ്ടാം പ്രതി മുതൽ നാലാം പ്രതിവരെയുള്ളവരിൽ നിന്ന് ലഭിക്കുന്ന വിവരങ്ങളുടെ അടിസ്ഥാനത്തിലാകും ഒന്നാം പ്രതിയായ എട്ടാം ക്ലാസ് വിദ്യാർഥിനിയെ കസ്റ്റഡിയിൽ വാങ്ങുന്ന കാര്യത്തിൽ പൊലീസ് നീങ്ങുക.

ഇതിനിടെ, ശിവരാമൻ ചെട്ടിയാരിൽ നിന്ന് മോശം അനുഭവമുണ്ടായെന്ന പെൺകുട്ടിയുടെ മൊഴിയും അന്വേഷണസംഘം വിശദമായി പരിശോധിക്കും.