ബംഗളൂരു: ഉയർന്ന ശമ്പളമുള്ള ഐ.ടി. ജോലി ഉപേക്ഷിച്ച് കൃഷിയിലേക്ക് തിരിഞ്ഞ മലയാളി യുവാവ് ഇടിമിന്നലേറ്റ് മരിച്ചു. കുമടിക്കേരി സ്വദേശിയായ റോഷൻ ബാലകൃഷ്ണൻ (43) ആണ് മരിച്ചത്.
ഐ.ടി. മേഖലയിലെ ജോലി ഉപേക്ഷിച്ച് അടുത്തിടെയാണ് റോഷൻ കാർഷിക രംഗത്തേക്ക് പ്രവേശിച്ചത്. സഹപ്രവർത്തകനൊപ്പം ചേർന്ന് കൃഷി ആരംഭിച്ച അദ്ദേഹം ആധുനിക കാർഷിക ഉപകരണങ്ങൾ കർഷകരിലെത്തിക്കുന്ന ഒരു സംരംഭത്തിനും തുടക്കമിട്ടിരുന്നു.
കൃഷി വിപുലീകരിക്കുന്നതിന്റെ ഭാഗമായി കുടുംബത്തോടൊപ്പം മൈസൂരുവിലെ ഒരു കൃഷിസ്ഥലം സന്ദർശിക്കാനെത്തിയതായിരുന്നു റോഷൻ. ഭാര്യയും മകനും ഒപ്പമുണ്ടായിരുന്നു.
സ്ഥലത്തെ പരിശോധനയ്ക്കിടെ മാങ്ങ പറിക്കാൻ ശ്രമിക്കുന്നതിനിടെയാണ് അപ്രതീക്ഷിതമായി ഇടിമിന്നലേറ്റത്. ഗുരുതരമായി പരിക്കേറ്റ റോഷൻ സംഭവസ്ഥലത്തുവെച്ചുതന്നെ കുഴഞ്ഞുവീഴുകയായിരുന്നുവെന്നാണ് വിവരം. ഉടൻ രക്ഷാപ്രവർത്തനം നടത്തിയെങ്കിലും ജീവൻ രക്ഷിക്കാനായില്ല.
അപകടസമയത്ത് ഭാര്യയും മകനും സമീപത്തുണ്ടായിരുന്നു. റോഷനൊപ്പമുണ്ടായിരുന്ന മറ്റൊരാൾക്കും പരിക്കേറ്റെങ്കിലും അപകടനില തരണം ചെയ്തതായി റിപ്പോർട്ടുണ്ട്.
More Read
ഐ.ടി. മേഖലയിലെ സുരക്ഷിതമായ ജോലി ഉപേക്ഷിച്ച് കൃഷിയെ ജീവിതമാർഗമാക്കിയ റോഷന്റെ അപ്രതീക്ഷിത വേർപാട് സുഹൃത്തുക്കളെയും സഹപ്രവർത്തകരെയും നാട്ടുകാരെയും ദുഃഖത്തിലാഴ്ത്തി.
English Summary: Roshan Balakrishnan, a former IT professional who recently quit his corporate job to pursue farming, died after being struck by lightning near Mysuru while inspecting farmland with his family.
