‘ഞാൻ ആത്മഹത്യ ചെയ്യാൻ പോകുന്നു’; സൈബർ പൊലീസിന്റെ ഇടപെടലിൽ പെൺകുട്ടിയെ രക്ഷപ്പെടുത്തി

കൊച്ചി: ആത്മഹത്യ ചെയ്യാൻ പോകുന്നുവെന്ന് അറിയിച്ച് ആലുവ സൈബർ ക്രൈം പൊലീസ് സ്റ്റേഷനിലേക്ക് സന്ദേശമെത്തിയതിനെ തുടർന്ന് നടത്തിയ സമയോചിത ഇടപെടലിൽ പെൺകുട്ടിയെ രക്ഷപ്പെടുത്തി.

പരുന്തുംപാറയിലെ അപകടസാധ്യതയുള്ള പ്രദേശത്താണ് പെൺകുട്ടിയെ കണ്ടെത്തിയത്. പീരുമേട് പൊലീസിന്റെ ഒന്നര മണിക്കൂർ നീണ്ട ശ്രമത്തിനൊടുവിലാണ് രക്ഷാപ്രവർത്തനം വിജയിച്ചത്.

സൈബർ പൊലീസിന് ലഭിച്ചത് നിർണായക സന്ദേശം

തിങ്കളാഴ്ച രാവിലെയാണ് ആലുവ സൈബർ ക്രൈം പൊലീസ് സ്റ്റേഷനിൽ പെൺകുട്ടിയുടെ സന്ദേശമെത്തിയത്. താൻ പരുന്തുംപാറയിലാണെന്നും ആത്മഹത്യ ചെയ്യാൻ പോകുകയാണെന്നും അറിയിച്ചായിരുന്നു സന്ദേശം.

സന്ദേശത്തോടൊപ്പം മലയുടെ ചിത്രവും ലഭിച്ചിരുന്നു. വിവരം ഗൗരവത്തോടെ പരിഗണിച്ച ആലുവ സൈബർ പൊലീസ് സംഘം ഉടൻ തന്നെ ബന്ധപ്പെട്ട ഉദ്യോഗസ്ഥർക്ക് വിവരം കൈമാറി.

ഇടുക്കി പൊലീസിന് വിവരം കൈമാറി

ഇടുക്കി ജില്ലാ വയർലെസ് കൺട്രോൾ റൂം, ഇടുക്കി സൈബർ പൊലീസ് സ്റ്റേഷൻ, പീരുമേട് പൊലീസ് സ്റ്റേഷൻ എന്നിവിടങ്ങളിലേക്കാണ് വിവരം കൈമാറിയത്.

തുടർന്ന് ആലുവ സൈബർ പൊലീസിൽനിന്ന് ലഭിച്ച വിവരത്തിന്റെ അടിസ്ഥാനത്തിൽ പീരുമേട് പൊലീസ് സ്ഥലത്തെത്തി. പെൺകുട്ടി അപകടകരമായ സാഹചര്യത്തിൽ മലമുകളിൽ നിൽക്കുന്നതായി പൊലീസ് കണ്ടെത്തി.

ഒന്നര മണിക്കൂർ നീണ്ട ശ്രമം; പെൺകുട്ടിയെ രക്ഷപ്പെടുത്തി

പീരുമേട് പൊലീസ് ഉദ്യോഗസ്ഥർ നടത്തിയ ഇടപെടലിനൊടുവിൽ ഒന്നര മണിക്കൂറിനുശേഷം പെൺകുട്ടിയെ സുരക്ഷിതമായി രക്ഷപ്പെടുത്തുകയായിരുന്നു.

പ്ലസ്ടുവിന് താൽപര്യമുള്ള വിഷയം പഠിക്കാൻ കഴിയാത്തതിലുള്ള മനോവിഷമമാണ് പെൺകുട്ടിയെ ഈ നിലയിലേക്ക് എത്തിച്ചതെന്നാണ് പ്രാഥമികമായി ലഭിക്കുന്ന വിവരം.

ആലുവ സൈബർ ക്രൈം സംഘത്തിന് നേതൃത്വം

ആലുവ സൈബർ ക്രൈം പൊലീസ് സ്റ്റേഷൻ സി.ഐ എസ്. സുധീഷ് കുമാർ, എ.എസ്.ഐ ആർ. ഡെൽജിത്ത്, സീനിയർ സി.പി.ഒ പി.കെ. ദിനേശൻ, സി.പി.ഒ സി. നിഖിൽ എന്നിവരാണ് ആലുവയിൽ നിന്നുള്ള ഏകോപനത്തിന് നേതൃത്വം നൽകിയത്.

പെൺകുട്ടിയെ സുരക്ഷിതമായി രക്ഷപ്പെടുത്തിയ വിവരം ലഭിച്ചതോടെ സൈബർ പൊലീസ് സംഘത്തിനും ആശ്വാസമായി.

സംഭവത്തിൽ തുടർനടപടികളും ആവശ്യമായ കൗൺസലിങ് ഉൾപ്പെടെയുള്ള പിന്തുണയും ഉറപ്പാക്കാനുള്ള നടപടികൾ സ്വീകരിച്ചുവരികയാണ്.

English Summary

A teenage girl was safely rescued after Aluva Cyber Crime Police received a message indicating that she intended to die by suicide. The cyber police immediately alerted the Idukki district wireless control room, Idukki Cyber Police and Peerumade Police. Officers reached Parunthumpara and, after around one and a half hours of efforts, brought the girl to safety. The incident was reportedly linked to distress over not being able to study her preferred subject in Plus Two.