ജാർഖണ്ഡിലെ ഛത്ര ജില്ലയിൽ പെൺകുട്ടിയെ തട്ടിക്കൊണ്ടുപോയി ലൈംഗികാതിക്രമത്തിന് ഇരയാക്കിയെന്ന ആരോപണത്തെ തുടർന്ന് യുവാവിനെ നാട്ടുകാർ മർദിച്ച് കൊലപ്പെടുത്തി. സംഭവത്തിൽ മൂന്ന് പേരെ പൊലീസ് അറസ്റ്റ് ചെയ്തിട്ടുണ്ട്. കേസിൽ കൂടുതൽ അന്വേഷണം പുരോഗമിക്കുകയാണെന്ന് അധികൃതർ അറിയിച്ചു.
രാത്രി മുഴുവൻ തിരച്ചിൽ
തിങ്കളാഴ്ച വൈകുന്നേരമാണ് പെൺകുട്ടിയെ വീടിന് പുറത്തുനിന്ന് കാണാതായത്. ബന്ധുക്കളും നാട്ടുകാരും രാത്രി മുഴുവൻ തിരച്ചിൽ നടത്തിയെങ്കിലും കണ്ടെത്താനായില്ല. ചൊവ്വാഴ്ച രാവിലെ വീട്ടിലെത്തിയ പെൺകുട്ടി തട്ടിക്കൊണ്ടുപോയി ലൈംഗികാതിക്രമത്തിന് ഇരയാക്കിയതായി കുടുംബാംഗങ്ങളോട് പറഞ്ഞതോടെയാണ് പ്രദേശത്ത് സംഘർഷാവസ്ഥ രൂപപ്പെട്ടത്.
വീട്ടിൽ നിന്ന് വലിച്ചിറക്കി ആക്രമണം
പെൺകുട്ടിയുടെ ബന്ധുക്കളും നാട്ടുകാരും ചേർന്ന് സമീപഗ്രാമത്തിലെ പ്രതിയുടെ വീട്ടിലെത്തി ഇയാളെ പുറത്തേക്ക് വലിച്ചിറക്കി. തുടർന്ന് വടികളും കല്ലുകളും ഉപയോഗിച്ച് മർദിച്ചതായാണ് പൊലീസ് പറയുന്നത്. ഗുരുതരമായി പരിക്കേറ്റ യുവാവിനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
ജാമ്യത്തിലിറങ്ങിയ പ്രതി
പൊലീസ് പറയുന്നതനുസരിച്ച്, കൊല്ലപ്പെട്ട യുവാവ് 2023-ൽ രജിസ്റ്റർ ചെയ്ത മറ്റൊരു ലൈംഗികാതിക്രമ കേസിൽ അറസ്റ്റിലായിരുന്നയാളാണ്. അടുത്തിടെയാണ് ഇയാൾ ജാമ്യത്തിൽ പുറത്തിറങ്ങിയിരുന്നത്. നിലവിലെ കേസിലെ ആരോപണങ്ങൾ സംബന്ധിച്ചും പൊലീസ് അന്വേഷണം തുടരുകയാണ്.
More Read
മൂന്ന് പേർ അറസ്റ്റിൽ, സുരക്ഷ ശക്തമാക്കി
സംഭവവുമായി ബന്ധപ്പെട്ട് മൂന്ന് പേരെ അറസ്റ്റ് ചെയ്തതായി തൻഡവ സബ് ഡിവിഷണൽ പൊലീസ് ഓഫീസർ അറിയിച്ചു. പ്രദേശത്ത് കൂടുതൽ സംഘർഷം ഒഴിവാക്കുന്നതിനായി സുരക്ഷ ശക്തമാക്കിയിട്ടുണ്ട്. സംഭവത്തിന്റെ എല്ലാ സാഹചര്യങ്ങളും പരിശോധിച്ചുവരികയാണെന്നും സംസ്ഥാന ന്യൂനപക്ഷ കമ്മീഷൻ സംഘവും പ്രദേശം സന്ദർശിച്ച് സ്ഥിതിഗതികൾ വിലയിരുത്തുമെന്നും അധികൃതർ അറിയിച്ചു.
