ചപ്പാത്തി മെഷീൻ അപകടത്തിൽ ഗുരുതരമായി പരുക്കേറ്റ വ്യാപാരിയായ വീട്ടമ്മ മരിച്ചു. മൂവാറ്റുപുഴ വാഴക്കുളം സ്റ്റാർ ചപ്പാത്തി കട ഉടമ പള്ളിക്കുന്നേൽ റെജിമോൾ ജസ്റ്റിൻ (52) ആണ് ദാരുണമായ അപകടത്തെ തുടർന്ന് മരിച്ചത്.
വിൽപനയ്ക്കുള്ള ചപ്പാത്തി തയ്യാറാക്കുന്നതിനിടെയാണ് റെജിമോളുടെ കൈ യന്ത്രത്തിൽ കുടുങ്ങിയത്. ഗുരുതരമായി പരുക്കേറ്റ ഇവരെ ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
ചപ്പാത്തി മെഷീനിൽ കൈ കുടുങ്ങിയത് എങ്ങനെ?
ചപ്പാത്തി നിർമാണത്തിനിടെ യന്ത്രത്തിൽനിന്ന് അസാധാരണമായ ശബ്ദവും മണവും പുറത്തുവന്നതോടെയാണ് അപകടം ശ്രദ്ധയിൽപ്പെട്ടത്. സ്ഥാപനത്തോട് ചേർന്നുള്ള വീട്ടിൽനിന്ന് മകൻ എത്തി നോക്കിയപ്പോഴാണ് റെജിമോൾ യന്ത്രത്തിൽ കൈ കുടുങ്ങിയ നിലയിൽ കണ്ടെത്തിയത്.
തുടർന്ന് ഉടൻ ആശുപത്രിയിൽ എത്തിച്ചെങ്കിലും ചികിത്സയ്ക്കിടെ മരണം സംഭവിക്കുകയായിരുന്നു.
ഭർത്താവിന്റെ മരണശേഷം തുടങ്ങിയ സ്ഥാപനം
ഭർത്താവ് ജസ്റ്റിന്റെ മരണശേഷം മക്കളെ വളർത്തുന്നതിനായാണ് റെജിമോൾ സ്റ്റാർ ചപ്പാത്തി കട ആരംഭിച്ചത്. ജീവിതത്തിലെ പ്രതിസന്ധികളെ അതിജീവിച്ച് മുന്നോട്ടുപോകുന്നതിനിടെയാണ് അപ്രതീക്ഷിതമായി ദുരന്തം സംഭവിച്ചത്.
More Read
ഭർത്താവിന്റെ വേർപാടും തുടർന്നുണ്ടായ ദുരിതങ്ങളും മറികടന്ന് സ്വന്തം അധ്വാനത്തിലൂടെ ജീവിതം തിരിച്ചുപിടിക്കാൻ ശ്രമിച്ചിരുന്ന റെജിമോളുടെ മരണവാർത്ത പ്രദേശത്തും ദുഃഖമുണ്ടാക്കി.
സംസ്കാരം നാളെ
റെജിമോൾ ജസ്റ്റിന്റെ സംസ്കാരം നാളെ രാവിലെ 10.30ന് വസതിയിലെ ശുശ്രൂഷകൾക്ക് ശേഷം വാഴക്കുളം സെന്റ് ജോർജ് ഫൊറോന പള്ളിയിൽ നടക്കും.
മക്കൾ: ജാസ്മിൻ, ജ്യോതി ദർശന, ജസ്റ്റോ.
