തിരുവനന്തപുരം: മോഷണക്കേസിൽ നിരപരാധിയാണെന്ന് തെളിഞ്ഞിട്ടും തനിക്കെതിരെ കള്ളക്കേസ് ചുമത്തി അപമാനിച്ചവർക്കെതിരെ നിയമപോരാട്ടം തുടരുകയാണെന്ന് പനവൂർ പനയമുട്ടം സ്വദേശിനിയും മുൻ വീട്ടുജോലിക്കാരിയുമായ ആർ. ബിന്ദു. കേസെടുത്ത് ഒരു വർഷം പിന്നിട്ടിട്ടും നേരിട്ട മാനസിക പീഡനത്തിനും അപമാനത്തിനും ഉത്തരവാദികളായവർ ശിക്ഷിക്കപ്പെടണമെന്ന ഉറച്ച നിലപാടിലാണ് അവർ.
ആഭ്യന്തരമന്ത്രി രമേശ് ചെന്നിത്തലയുടെ ഉപദേഷ്ടാവും മുൻ ഡി.ജി.പിയുമായ എ. ഹേമചന്ദ്രൻ രചിച്ച ‘അധികാരത്തിന്റെ വഴി, അനീതിയുടെയും’ എന്ന പുസ്തകം അദ്ദേഹത്തിൽ നിന്ന് നേരിട്ട് ഏറ്റുവാങ്ങാൻ കഴിഞ്ഞത് തനിക്ക് ലഭിച്ച പിന്തുണയുടെ പ്രതീകമാണെന്ന് ബിന്ദു പറഞ്ഞു.
കേസുമായി ബന്ധപ്പെട്ട അന്വേഷണത്തിന്റെ ഭാഗമായി രണ്ടാഴ്ച മുൻപ് ശംഖുമുഖം അസിസ്റ്റന്റ് കമ്മിഷണർ ഓഫീസിൽ ഹാജരായിരുന്നുവെന്നും അവിടെ മൊഴി നൽകാനെത്തിയ പേരൂർക്കട സ്റ്റേഷനിലെ മുൻ ഗ്രേഡ് എസ്.ഐ പ്രസന്നൻ ഇപ്പോഴും പഴയ വാദങ്ങൾ ആവർത്തിക്കുന്നത് കേട്ടപ്പോൾ സഹതാപമാണ് തോന്നിയതെന്നും ബിന്ദു വ്യക്തമാക്കി.
2025 ഏപ്രിൽ 23-നാണ് അമ്പലമുക്ക് സ്വദേശിനി ഓമന ഡാനിയൽ നൽകിയ പരാതിയെ തുടർന്ന് ബിന്ദുവിനെതിരെ മോഷണക്കേസ് രജിസ്റ്റർ ചെയ്തത്. എന്നാൽ അന്വേഷണത്തിൽ കുറ്റാരോപണം നിലനിൽക്കില്ലെന്ന് വ്യക്തമായതോടെ ബിന്ദുവിന്റെ നിരപരാധിത്വം തെളിഞ്ഞു.
സംഭവത്തിനുശേഷം നാട്ടുകാരുടെ പിന്തുണ കൂടുതൽ ലഭിച്ചതായും ആരും തന്നെ ‘കള്ളി’ എന്ന് വിളിച്ചിട്ടില്ലെന്നും ബിന്ദു പറയുന്നു. താമസിക്കുന്ന വീടിലേക്ക് എത്താൻ തോട് മുറിച്ചുകടക്കേണ്ട സാഹചര്യമുണ്ടായിരുന്നുവെങ്കിലും ഇതുസംബന്ധിച്ച വാർത്ത പുറത്തുവന്നതിനെ തുടർന്ന് ബ്ലോക്ക് പഞ്ചായത്ത് 10 ലക്ഷം രൂപ ചെലവഴിച്ച് പാലം നിർമിക്കുകയും വഴിയിൽ കോൺക്രീറ്റ് ഇടുകയും ചെയ്തു.
More Read
ജീവിതത്തിലെ പ്രതിസന്ധികൾക്കിടയിലും ബിന്ദുവിന് ആശ്വാസമായത് പുതിയ തൊഴിൽ അവസരമാണ്. എം.ജി.എം സ്കൂൾ മാനേജർ ഗീവർഗീസ് യോഹന്നാൻ പൊന്മുടി വാലി സ്കൂളിൽ ജോലി നൽകുകയും ചെയ്തു. കുടുംബജീവിതത്തിലും സന്തോഷ നിമിഷങ്ങൾ എത്തിയിട്ടുണ്ട്. മൂത്ത മകൾ പ്രവീണയുടെ വിവാഹം അടുത്തിടെ നടന്നു. ഇളയ മകൾ പ്ലസ് വൺ പ്രവേശനത്തിനായി കാത്തിരിക്കുകയാണ്.
നേരിട്ട അനീതിക്കെതിരെ അവസാനം വരെ പോരാടുമെന്നും, തനിക്കുണ്ടായ അനുഭവം മറ്റാർക്കും ആവർത്തിക്കരുതെന്നതാണ് തന്റെ ആഗ്രഹമെന്നും ബിന്ദു പറഞ്ഞു.
English Summary:
R. Bindu, a former domestic worker from Thiruvananthapuram, continues her legal fight against those she says falsely implicated her in a theft case. Though her innocence has been established, she seeks accountability for the humiliation and hardship she endured. With community support, a new job, and positive developments in her family life, Bindu remains determined to pursue justice.
