കേരളത്തിലെ ചിലന്തികളുടെ എണ്ണം കുറഞ്ഞുവരുന്നതായി ഗവേഷകരുടെ നിരീക്ഷണം. അനിയന്ത്രിതമായ രാസവള, കീടനാശിനി പ്രയോഗങ്ങളും ആവാസവ്യവസ്ഥയുടെ നാശവുമാണ് പ്രധാന ഭീഷണികളായി ചൂണ്ടിക്കാണിക്കപ്പെടുന്നത്. ഇന്ത്യയിൽ ആദ്യമായി നടന്ന ഇന്റർനാഷണൽ കോൺഗ്രസ് ഓഫ് അരാക്നോളജിയിലാണ് കേരളത്തിലെ ചിലന്തികൾ നേരിടുന്ന വെല്ലുവിളികൾ ചർച്ചയായത്.
കേരളത്തിൽ 600ഓളം ഇനം ചിലന്തികൾ
രാജ്യത്ത് ഏകദേശം രണ്ടായിരത്തോളം ഇനം ചിലന്തികളുണ്ടെന്നാണ് കണക്ക്. ഇതിൽ അറുനൂറോളം ഇനങ്ങളുടെ ആവാസകേന്ദ്രമാണ് കേരളം. എന്നാൽ, ഇവയുടെ നിലനിൽപ്പിന് വിവിധ തരത്തിലുള്ള ഭീഷണികൾ ഉയരുന്നുവെന്നാണ് ഗവേഷകരുടെ വിലയിരുത്തൽ.
പരിസ്ഥിതിയുടെ സന്തുലിതാവസ്ഥ നിലനിർത്തുന്നതിൽ ചിലന്തികൾക്ക് നിർണായക പങ്കുണ്ട്. കീടങ്ങളെ സ്വാഭാവികമായി നിയന്ത്രിക്കുന്നതിലൂടെ കൃഷിക്കും പ്രകൃതിക്കും ഇവ സഹായകരമാകുന്നു.
ചിലന്തികളുടെ എണ്ണം കുറയുന്നത് സ്വാഭാവിക കീടനിയന്ത്രണ സംവിധാനത്തെ ദുർബലപ്പെടുത്തും. ഇതോടെ കൂടുതൽ രാസകീടനാശിനികൾ ഉപയോഗിക്കേണ്ട സാഹചര്യമുണ്ടാകാം. ഇത്തരം മാറ്റങ്ങൾ ഭക്ഷ്യശൃംഖലയെയും മനുഷ്യന്റെ ആരോഗ്യത്തെയും ബാധിക്കാമെന്നും ചൂണ്ടിക്കാണിക്കപ്പെടുന്നു.
ആവാസവ്യവസ്ഥ ഇല്ലാതാക്കുന്ന നഗരവത്കരണം
രാസവളങ്ങളുടെയും കീടനാശിനികളുടെയും അമിതപ്രയോഗത്തിന് പുറമേ നിരവധി ഘടകങ്ങളും ചിലന്തികളുടെ നിലനിൽപ്പിനെ ബാധിക്കുന്നുണ്ട്.
നഗരവത്കരണം, വനനശീകരണം, കോൺക്രീറ്റ് നിർമാണങ്ങൾ, പച്ചപ്പ് കുറയുന്നത് എന്നിവ സ്വാഭാവിക ആവാസവ്യവസ്ഥ ഇല്ലാതാക്കുന്നു. കൂടാതെ, റബർ, തേക്ക്, അക്കേഷ്യ തുടങ്ങിയ ഏകവിള തോട്ടങ്ങളുടെ വ്യാപനവും ചിലന്തികളുടെ വൈവിധ്യം കുറയ്ക്കുന്നതായി നിരീക്ഷിക്കപ്പെടുന്നു.
കാലാവസ്ഥാ വ്യതിയാനവും ഭീഷണിയാകുന്നു
പ്രളയങ്ങൾ, അപ്രതീക്ഷിത മഴ, കടുത്ത ചൂട്, കാട്ടുതീ എന്നിവ ചിലന്തികളുടെ പ്രജനനത്തെയും നിലനിൽപ്പിനെയും പ്രതികൂലമായി ബാധിക്കുന്നു.
അതേസമയം, കരിയിലകളും മണ്ണിലെ ജൈവാംശവും കുറയുന്നത് മണ്ണിൽ വസിക്കുന്ന ചിലന്തികളുടെ ആവാസവ്യവസ്ഥയെ ബാധിക്കുന്ന മറ്റൊരു പ്രധാന ഘടകമാണ്.
ലോകത്ത് 54,261 ഇനം ചിലന്തികൾ
ലോകത്താകെ 139 കുടുംബങ്ങളിലായി 54,261 ഇനം ചിലന്തികളെ ഇതുവരെ കണ്ടെത്തിയിട്ടുണ്ട്. എന്നാൽ, നിലവിലുള്ള ഇനങ്ങളിൽ ഏകദേശം നാലിലൊന്ന് മാത്രമാണ് ഇതുവരെ കണ്ടെത്തിയതെന്നാണ് ഗവേഷണ മേഖലയിൽ നിന്നുള്ള കണക്ക്. ആഫ്രിക്കൻ ഭൂഖണ്ഡത്തിൽ ചിലന്തികളെക്കുറിച്ച് കാര്യമായ ഗവേഷണം നടന്നിട്ടില്ലെന്നും റിപ്പോർട്ടിൽ ചൂണ്ടിക്കാട്ടുന്നു.
ചിലന്തികളുടെ ശരാശരി ആയുസ് ഒരു വർഷമാണെങ്കിലും ചില ഇനങ്ങൾ 14 വർഷം വരെ ജീവിക്കാറുണ്ട്.
പശ്ചിമഘട്ടത്തിൽ കൂടുതൽ ഗവേഷണം വേണം
കേരളത്തിലെ പശ്ചിമഘട്ടത്തിൽ പോലും ചിലന്തികളെക്കുറിച്ച് കാര്യമായ പഠനം നടത്താൻ കഴിഞ്ഞിട്ടില്ലെന്ന് ഭാരതമാതാ കോളേജിലെ ചിലന്തി ഗവേഷണ വിഭാഗം മേധാവി ഡോ. എം.ജെ. മാത്യു പറഞ്ഞു.
ഉൾക്കാടുകളിലേക്ക് കൂടുതൽ ഗവേഷണം വ്യാപിപ്പിച്ചാൽ ഇതുവരെ കണ്ടെത്താത്ത നിരവധി ചിലന്തി ഇനങ്ങളെ തിരിച്ചറിയാൻ കഴിയുമെന്നും അദ്ദേഹം അഭിപ്രായപ്പെട്ടു.
English Summary:
Researchers have raised concerns over the declining spider population in Kerala, citing excessive use of chemical fertilisers and pesticides, habitat destruction and climate-related disturbances. Kerala is home to around 600 of India’s approximately 2,000 spider species. Spiders play an important role in natural pest control and maintaining ecological balance. Researchers have called attention to the need for more studies, particularly in the Western Ghats.
