facebook

പരിവാഹൻ പോർട്ടൽ തകരാറിൽ; വാഹന ഉടമകൾക്ക് സേവനങ്ങൾ മുടങ്ങുന്നു

2 Min Read

പരിഷ്‌കരണത്തിനുശേഷവും തുടർച്ചയായ തകരാറുകൾ; പരിവാഹൻ പോർട്ടലിലെ സേവന തടസം വാഹന ഉടമകളെ വലയ്ക്കുന്നു. ഡ്യൂപ്ലിക്കേറ്റ് ആർ.സി, വിലാസമാറ്റം, ഉടമസ്ഥാവകാശ കൈമാറ്റം, വാഹന വായ്പയുമായി ബന്ധപ്പെട്ട ഹൈപ്പോത്തിക്കേഷൻ നടപടികൾ തുടങ്ങിയവയാണ് പ്രധാനമായും തടസപ്പെടുന്നത്. ഓൺലൈൻ സേവനങ്ങൾ ലഭിക്കാതെ അക്ഷയ, ഇ-സേവ കേന്ദ്രങ്ങളിൽ മണിക്കൂറുകളോളം കാത്തിരുന്നിട്ടും നിരാശരായി മടങ്ങേണ്ടിവരുന്ന സാഹചര്യമാണ്.

പരിവാഹൻ പോർട്ടലിൽ പതിവായി തകരാർ

റോഡ് ട്രാൻസ്‌പോർട്ട് ആൻഡ് ഹൈവേ മന്ത്രാലയത്തിന്റെ പരിവാഹൻ പോർട്ടൽ മാസങ്ങൾ നീണ്ട നവീകരണത്തിനുശേഷവും ഇടയ്ക്കിടെ പ്രവർത്തനരഹിതമാകുന്നതായാണ് പരാതി. ആർ.ടി.ഒ ഓഫീസുകളിൽ നേരിട്ടെത്താതെ ഓൺലൈനായി പൂർത്തിയാക്കേണ്ട നിരവധി നടപടികളാണ് ഇതോടെ മുടങ്ങുന്നത്.

ആർ.സി ഉടമയുടെ ഫോൺ നമ്പർ മാറ്റുന്നതുപോലുള്ള ലളിതമായ സേവനങ്ങൾക്കുപോലും സാധാരണക്കാർ ബുദ്ധിമുട്ടുകയാണ്. ഒക്ടോബറിൽ പോർട്ടൽ പരിഷ്‌കരിച്ചത് ആധാർ അധിഷ്ഠിത ഒ.ടി.പി സംവിധാനം നടപ്പാക്കുന്നതിനും പുതിയ സേവനങ്ങൾ ഉൾപ്പെടുത്തുന്നതിനുമായിരുന്നു.

എന്നാൽ, സെർവർ ശേഷിക്കുറവാണ് തുടർച്ചയായ തകരാറുകൾക്ക് കാരണമെന്നാണ് അധികൃതർ പറയുന്നത്. നാഷണൽ ഇൻഫർമാറ്റിക്സ് സെന്ററാണ് (എൻ.ഐ.സി) പോർട്ടലിന്റെ പ്രവർത്തനം കൈകാര്യം ചെയ്യുന്നത്. പരിഷ്‌കരണത്തിനുശേഷവും പ്രശ്നങ്ങൾ തുടരുന്നത് മോട്ടോർ വാഹന വകുപ്പ് ഉദ്യോഗസ്ഥരിലും ആശങ്കയുണ്ടാക്കുന്നു.

ആർ.സി വിവരങ്ങളിൽ അപാകത; ഒരു കോടി വാഹനങ്ങൾ ബാധിക്കാം

2020ന് മുമ്പ് രജിസ്റ്റർ ചെയ്ത വാഹനങ്ങളുടെ ആർ.സി വിവരങ്ങൾ പരിവാഹൻ പോർട്ടലിൽ പൂർണമായും ലഭ്യമല്ലെന്നാണ് മറ്റൊരു പ്രധാന പ്രശ്നം. സംസ്ഥാനത്തെ ഏകദേശം ഒരുകോടി വാഹനങ്ങളുടെ വിവരങ്ങളിൽ അപാകതകളുണ്ടെന്നാണ് വിവരം.

വാഹനങ്ങളുടെ കുതിരശക്തി, ഭാരം, വീൽബേസ്, പുക സംബന്ധിച്ച വിവരങ്ങൾ തുടങ്ങിയവയിലാണ് തെറ്റുകൾ കണ്ടെത്തിയിട്ടുള്ളത്. അപൂർണ വിവരങ്ങൾ ശ്രദ്ധയിൽപ്പെട്ടാൽ അവ പരിശോധിച്ച് തിരുത്തി പൂർണമാക്കാൻ മോട്ടോർ വാഹന വകുപ്പ് ഓഫീസുകൾക്ക് നിർദേശം നൽകിയിട്ടുണ്ട്.

ഉടമസ്ഥാവകാശ കൈമാറ്റവും ഹൈപ്പോത്തിക്കേഷൻ നടപടികളും തടസത്തിൽ

പോർട്ടലിലെ തകരാർ ഏറ്റവും കൂടുതൽ ബാധിക്കുന്നത് ഉടമസ്ഥാവകാശ കൈമാറ്റം, ഹൈപ്പോത്തിക്കേഷൻ ഒഴിവാക്കൽ തുടങ്ങിയ സേവനങ്ങളെയാണ്. ഇതോടെ പഴയ വാഹനങ്ങൾ വാങ്ങുകയും വിൽക്കുകയും ചെയ്യുന്നവരും പ്രതിസന്ധിയിലായി.

സെക്കൻഡ് ഹാൻഡ് വാഹനങ്ങളുടെ വിൽപ്പനയിലും ഇടപാടുകൾ പൂർത്തിയാക്കുന്നതിലും തടസം നേരിടുന്നുണ്ട്. പിഴ അടച്ചിട്ടും പോർട്ടലിലെ സാങ്കേതിക പ്രശ്നം കാരണം ചില വാഹനങ്ങൾ ബ്ലാക്ക് ലിസ്റ്റിൽനിന്ന് ഒഴിവാകാത്തതും ഉടമകളെയും വ്യാപാരികളെയും ബുദ്ധിമുട്ടിക്കുന്നു.

ഹൈപ്പോത്തിക്കേഷൻ ഒഴിവാക്കാൻ ആർ.ടി.ഒ ഓഫീസിലെത്തണം

ഓൺലൈൻ സംവിധാനങ്ങൾ നിലവിലുണ്ടെങ്കിലും ഹൈപ്പോത്തിക്കേഷൻ ഒഴിവാക്കുന്നതിനുള്ള എച്ച്.പി. ക്യാൻസലേഷൻ നടപടികൾക്ക് വാഹനം രജിസ്റ്റർ ചെയ്ത ആർ.ടി.ഒ ഓഫീസിൽ നേരിട്ടെത്തേണ്ട സാഹചര്യമുണ്ട്.

ഓൺലൈൻ സേവനങ്ങൾ സുഗമമായി ലഭിക്കാത്തതോടെ ഡിജിറ്റൽ സംവിധാനത്തിലൂടെ പൂർത്തിയാക്കേണ്ട കാര്യങ്ങൾക്കുപോലും ഓഫീസുകൾ കയറിയിറങ്ങേണ്ടിവരുന്നു. പരിവാഹൻ പോർട്ടലിലെ തകരാറുകൾ പരിഹരിച്ച് സേവനങ്ങൾ കാര്യക്ഷമമാക്കണമെന്നാണ് വാഹന ഉടമകളുടെ ആവശ്യം.

English Summary:

Vehicle owners in Kerala are facing difficulties due to frequent technical issues with the Parivahan portal, even after its recent upgrade. Services such as duplicate RC applications, address changes, ownership transfers and hypothecation-related procedures are being disrupted. Incomplete vehicle records, blacklisting issues and delays in ownership transfers are also affecting the second-hand vehicle market. The portal is managed by the National Informatics Centre (NIC).

Share This Article