പാസ്‌പോർട്ടും യാത്രാരേഖകളും നഷ്ടമായി ഇറാനിൽ കുടുങ്ങി; കൊല്ലം സ്വദേശി അക്ഷയ്‌ക്ക് തുണയായി സുരേഷ് ഗോപി

കൊല്ലം: പാസ്‌പോർട്ടും മറ്റ് യാത്രാരേഖകളും നഷ്ടപ്പെട്ടതിനെ തുടർന്ന് മാസങ്ങളായി ഇറാനിൽ കുടുങ്ങിക്കിടക്കുന്ന കൊല്ലം പ്രാക്കുളം സ്വദേശി അക്ഷയ് ഹരീഷിന് നാട്ടിലേക്ക് മടങ്ങാൻ വഴിയൊരുങ്ങുന്നു. കേന്ദ്രമന്ത്രി സുരേഷ് ഗോപിയുടെ ഇടപെടലിനെ തുടർന്നാണ് മടക്കയാത്രയ്ക്കുള്ള നടപടികൾ ആരംഭിച്ചത്.

ഇറാൻ അംബാസഡറുമായി സുരേഷ് ഗോപി സംസാരിച്ചതിന് പിന്നാലെ ഇന്ത്യൻ എംബസി ഉദ്യോഗസ്ഥർ അക്ഷയ് ഹരീഷിനെ സന്ദർശിച്ചു. മടക്കയാത്രയ്ക്ക് ആവശ്യമായ രേഖകൾ ഉടൻ അനുവദിക്കുമെന്നാണ് ലഭിക്കുന്ന വിവരം.

ദുബായിലെ ജോലി വാഗ്ദാനം ചെയ്ത് കപ്പലിൽ നിയമനം

അലി ഷിപ്പിംഗ് കമ്പനിയുടെ ഉടമസ്ഥതയിലുള്ള ‘പാം മറൈൻ’ കപ്പലിൽ വാച്ച് കീപ്പറായാണ് അക്ഷയ് ജോലി ചെയ്തിരുന്നത്. ദുബായിൽ ജോലി വാഗ്ദാനം ചെയ്താണ് ഏജന്റ് യുവാവിനെ കൊണ്ടുപോയത്.

എന്നാൽ ജോലിയിൽ പ്രവേശിച്ചശേഷം കപ്പലിന്റെ യാത്രകൾ കൂടുതലും ഇറാനിലേക്കായിരുന്നുവെന്ന് അക്ഷയ് വ്യക്തമാക്കുന്നു.

പാകിസ്ഥാനിൽ കൈമാറിയ പാസ്‌പോർട്ട് തിരിച്ചുകിട്ടിയില്ല

പാകിസ്ഥാനിൽനിന്ന് അരി കൊണ്ടുവരുന്നതിനായി നടത്തിയ കപ്പൽയാത്രയ്ക്കിടെയാണ് പ്രതിസന്ധി ആരംഭിച്ചത്. കപ്പൽ പാകിസ്ഥാനിലെ തുറമുഖത്ത് എത്തിയപ്പോൾ പതിവ് പരിശോധനയുടെ ഭാഗമായി അക്ഷയ്‌യുടെ പാസ്‌പോർട്ടും മറ്റ് യാത്രാരേഖകളും അധികൃതർക്ക് കൈമാറി.

പരിശോധന പൂർത്തിയായശേഷം രേഖകൾ കപ്പൽ ക്യാപ്റ്റന് തിരികെ ലഭിക്കുമെന്നായിരുന്നു പ്രതീക്ഷ. എന്നാൽ കപ്പൽ ഇറാനിലെത്തിയശേഷം നാട്ടിലേക്ക് മടങ്ങാനുള്ള ഒരുക്കങ്ങൾക്കിടെയാണ് രേഖകൾ ക്യാപ്റ്റന്റെ കൈവശമില്ലെന്ന് വ്യക്തമായത്.

പിന്നീട് കമ്പനി നടത്തിയ അന്വേഷണത്തിലും രേഖകൾ പാകിസ്ഥാനിൽ കണ്ടെത്താനായില്ലെന്നാണ് അക്ഷയ്‌ക്ക് ലഭിച്ച വിവരം. ഇതോടെ മടക്കയാത്ര അനിശ്ചിതത്വത്തിലായി.

11 മാസമായി ഇറാനിൽ; സംഘർഷവും തിരിച്ചടിയായി

ഏകദേശം 11 മാസമായി ഇറാനിൽ കഴിയുകയാണെന്നാണ് അക്ഷയ് പറയുന്നത്. മേഖലയിലെ സംഘർഷത്തെ തുടർന്ന് ഒരുഘട്ടത്തിൽ കപ്പൽ സർവീസുകൾ തടസ്സപ്പെട്ടിരുന്നു.

പിന്നീട് സർവീസുകൾ പുനരാരംഭിച്ചെങ്കിലും യാത്രാരേഖകളില്ലാത്തതിനാൽ അക്ഷയ്‌ക്ക് നാട്ടിലേക്ക് മടങ്ങാൻ കഴിഞ്ഞില്ല.

കുടുംബത്തിന്റെ അഭ്യർഥനയിൽ ഇടപെട്ട് കേന്ദ്രമന്ത്രി

മകൻ ഇറാനിൽ കുടുങ്ങിക്കിടക്കുന്ന വിവരം കുടുംബം ബിജെപി നേതാവ് വി.എസ്. ജിതിൻ ദേവ് വഴിയാണ് കേന്ദ്രമന്ത്രി സുരേഷ് ഗോപിയുടെ ശ്രദ്ധയിൽപ്പെടുത്തിയത്. വിവരം ലഭിച്ച ഉടൻ മന്ത്രി വിഷയത്തിൽ ഇടപെടുകയായിരുന്നു.

ഇറാൻ അംബാസഡറുമായുള്ള ചർച്ചയ്ക്കു പിന്നാലെ ഇന്ത്യൻ എംബസി ഉദ്യോഗസ്ഥർ അക്ഷയ്‌യെ സന്ദർശിച്ചതോടെ മടക്കയാത്രയ്ക്കുള്ള നടപടികൾക്ക് വേഗം ലഭിച്ചു. ആവശ്യമായ യാത്രാരേഖകൾ ലഭിക്കുന്നതോടെ യുവാവിന് നാട്ടിലേക്ക് മടങ്ങാനാകുമെന്നാണ് കുടുംബത്തിന്റെ പ്രതീക്ഷ.

English Summary: Kollam native Akshay Harish, who has been stranded in Iran for around 11 months after losing his passport and travel documents, may soon return home following Union Minister Suresh Gopi’s intervention. Indian Embassy officials have visited him, and arrangements are being made to issue the required travel documents.