ജോലിയും ഉംറയും വാഗ്ദാനം ചെയ്ത് കെണിയിൽ; സൗദിയിൽ മലയാളിക്ക് വധശിക്ഷാ ഭീഷണി

തൃശൂർ: സൗദിയിൽ ജോലിയും സൗജന്യ ഉംറയും വാഗ്ദാനം ചെയ്ത് ലഹരിക്കടത്തിന് ഇരകളാക്കിയെന്ന പരാതിയുമായി മലയാളിയുടെ കുടുംബം. 

തൃശൂർ കുന്നംകുളം കൊച്ചന്നൂർ സ്വദേശി ഉമർ ഷരീഫ് ഉൾപ്പെടെ എട്ടുപേരാണ് സൗദിയിലെ ജിദ്ദ ജയിലിൽ കഴിയുന്നത്. കേസിൽ പ്രതികൾക്ക് വധശിക്ഷ നൽകണമെന്നാണ് പബ്ലിക് പ്രോസിക്യൂഷന്റെ ആവശ്യമെന്നാണ് റിപ്പോർട്ട്. 

ഭർത്താവ് നിരപരാധിയാണെന്നും യഥാർഥ കുറ്റവാളികളെ കണ്ടെത്തണമെന്നും ആവശ്യപ്പെട്ട് ഉമർ ഷരീഫിന്റെ ഭാര്യ ഹാജറ അധികൃതർക്ക് പരാതി നൽകി.

സൗദി ലഹരിക്കടത്ത് കേസ്: എട്ടുപേർ ജിദ്ദ ജയിലിൽ

ഉമർ ഷരീഫിന് പുറമേ പശ്ചിമബംഗാൾ സ്വദേശികളായ എസ്.കെ. കമാൽ, കഫിജുൽ ഷെയ്ഖ്, അബ്രഹാം ഷെയ്ഖ്, സൗദിൻ ഷെയ്ഖ്, നാസിമുദ്ദീൻ അബ്ദുൽ ബാരി, അജീഗുൽ ഗാസി, ജാഹിർ ഉദ്ദീൻ ഷെയ്ഖ് എന്നിവരാണ് ജയിലിലുള്ളത്.

പാലസ്തീൻ, സുഡാൻ എന്നിവിടങ്ങളിലെ കുട്ടികൾക്കുള്ള മധുരപലഹാരങ്ങളും ഭക്ഷ്യവസ്തുക്കളും മരുന്നുകളുമാണെന്ന് വിശ്വസിപ്പിച്ചാണ് കാർട്ടനുകളിൽ ലഹരിവസ്തുക്കൾ കൈമാറിയതെന്നാണ് പരാതി. 

വിസിറ്റിങ് വിസയിൽ ജോലി, സൗജന്യ ഉംറ എന്നിവ വാഗ്ദാനം ചെയ്തായിരുന്നു യാത്രയ്ക്ക് പ്രേരിപ്പിച്ചതെന്നും ആരോപണമുണ്ട്.

മൂന്നുമാസത്തിനകം മടങ്ങാമെന്ന് വാഗ്ദാനം

തൃശൂർ കൊച്ചന്നൂർ സ്വദേശി ആഷിക്കും മലപ്പുറം സ്വദേശി അലിയും ചേർന്നാണ് തങ്ങളെ കബളിപ്പിച്ചതെന്നാണ് ആരോപണം. 

മൂന്നുമാസത്തിനുശേഷം നാട്ടിലേക്ക് മടങ്ങാമെന്നും പിന്നീട് സ്ഥിരം വിസ ശരിയാക്കാമെന്നും ഇവർ വിശ്വസിപ്പിച്ചെന്നാണ് റിപ്പോർട്ടിലുള്ളത്. ആഷിക് ഉമർ ഷരീഫിന്റെ സുഹൃത്തുമാണ്.

ഓഗസ്റ്റ് 10ന് കോയമ്പത്തൂർ വഴി ജിദ്ദ കിങ് അബ്ദുൽ അസീസ് വിമാനത്താവളത്തിലെത്തിയ സംഘത്തിൽനിന്ന് നിരോധിത പ്രെഗബാലിൻ മരുന്നുകൾ പിടിച്ചെടുത്തതായാണ് വിവരം.

വധശിക്ഷയും വൻതുക പിഴയും ആവശ്യപ്പെട്ട് പ്രോസിക്യൂഷൻ

ജിദ്ദയിലെ നാലാം സംയുക്ത ജുഡീഷ്യൽ കോടതിയുടെ പരിഗണനയിലാണ് കേസ്. ബംഗാളി പരിഭാഷകനെ ലഭിക്കാത്തതിനെത്തുടർന്ന് കോടതി നടപടികൾ മാറ്റിവച്ചതായാണ് റിപ്പോർട്ട്.

 അതേസമയം, സൗദി ആന്റി നാർക്കോട്ടിക്‌സ് നിയമപ്രകാരം പ്രതികൾക്ക് വധശിക്ഷ നൽകണമെന്നാണ് പബ്ലിക് പ്രോസിക്യൂഷന്റെ ആവശ്യം.

ഓരോ പ്രതിക്കും ലക്ഷക്കണക്കിന് റിയാൽ പിഴ ചുമത്തണമെന്നും പ്രോസിക്യൂഷൻ ആവശ്യപ്പെട്ടിട്ടുണ്ട്. ഉമർ ഷരീഫിന് 2,99,799.78 റിയാലും അബ്രഹാം ഷെയ്ഖിന് 3,14,370 റിയാലും പിഴ ചുമത്തിയതായാണ് റിപ്പോർട്ട്. മറ്റ് പ്രതികൾക്കും പിഴ ചുമത്തിയിട്ടുണ്ട്.

ഭർത്താവിനെ രക്ഷിക്കാൻ ഹാജറിന്റെ പരാതി

ഭർത്താവ് നിരപരാധിയാണെന്നും യഥാർഥ പ്രതികളെ നിയമത്തിന് മുന്നിൽ കൊണ്ടുവരണമെന്നും ആവശ്യപ്പെട്ട് ഹാജറ വിവിധ അധികാരികൾക്ക് പരാതി നൽകിയിട്ടുണ്ട്. 

മുഖ്യമന്ത്രിക്കും സംസ്ഥാന പൊലീസ് മേധാവിക്കും കുന്നംകുളം പൊലീസിനും പരാതി നൽകിയതായി റിപ്പോർട്ടിൽ പറയുന്നു.

ഇതിനുപുറമേ, ഇ.ടി. മുഹമ്മദ് ബഷീർ എം.പി. മുഖേന സൗദിയിലെ ഇന്ത്യൻ കോൺസുലേറ്റിനും പരാതി കൈമാറിയിട്ടുണ്ട്. സൗദിയിലെ വധശിക്ഷാ ഭീഷണിയിൽനിന്ന് ഭർത്താവിനെ രക്ഷിക്കാൻ അടിയന്തരമായി ഇടപെടണമെന്നാണ് ഹാജറയുടെ ആവശ്യം.

English Summary: A Malayali man from Thrissur and seven others are reportedly facing severe penalties, including a possible death sentence, in a Saudi drug-smuggling case. His wife, Hajara, alleges that he was deceived with promises of employment and free Umrah and has sought urgent intervention from Indian authorities.