ബിഗ് ബോസ് രാകേഷ് തിരിച്ചെത്തി; കപ്പിന് പകരം അമ്മ കൊടുത്തത് പപ്പായ

ബിഗ് ബോസ് സീസൺ എട്ടിൽ നിന്ന് പുറത്തായ രാകേഷിനെ വീട്ടിൽ സ്വീകരിച്ചത് അമ്മയുടെ വേറിട്ട ‘ട്രോൾ’ വരവേൽപ്പോടെ. ബിഗ് ബോസ് കിരീടവുമായി മകൻ തിരിച്ചെത്തണമെന്നായിരുന്നു അമ്മയുടെ ആഗ്രഹം. എന്നാൽ കപ്പിന് പകരം രണ്ട് പപ്പായയാണ് അമ്മ സമ്മാനിച്ചത്. രാകേഷും അമ്മയുടെ തമാശ അതേ ചിരിയോടെ ഏറ്റെടുത്തതോടെ വീഡിയോ സമൂഹമാധ്യമങ്ങളിൽ ശ്രദ്ധ നേടുകയാണ്.

ബിഗ് ബോസ് രാകേഷിന് അമ്മയുടെ വേറിട്ട വരവേൽപ്പ്

അഗ്നിപരീക്ഷയിൽ നിന്ന് ബിഗ് ബോസ് സീസൺ എട്ടിലെത്തിയ മത്സരാർഥികളിൽ ഒരാളായിരുന്നു രാകേഷ്. കഴിഞ്ഞ ആഴ്ച നടന്ന മാസ് എവിക്ഷനിൽ ആറ് മത്സരാർഥികൾ പുറത്തായപ്പോൾ രാകേഷും അതിൽ ഉൾപ്പെട്ടു.

എന്നാൽ പുറത്തായതിന്റെ വിഷമത്തേക്കാൾ വീട്ടിലെത്തിയപ്പോഴുള്ള അമ്മയുടെ സ്വീകരണമാണ് ഇപ്പോൾ രാകേഷിന്റെ മുഖത്ത് ചിരി നിറച്ചത്.

‘തോറ്റ് തുന്നം പാടി എത്തിയിരിക്കുകയാണ് മോൻ’

‘തോറ്റ് തുന്നം പാടി എത്തിയിരിക്കുകയാണ് മോൻ’ എന്ന സിനിമാ ഡയലോഗ് പറഞ്ഞുകൊണ്ടാണ് അമ്മ മകനെ സ്വീകരിച്ചത്.

അമ്മയുടെ കഴുത്തിൽ ഹാരം അണിയിക്കുകയും ബൊക്കെ നൽകുകയും ചെയ്ത രാകേഷ്, ‘ബിഗ് ബോസിൽ നിന്ന് വന്നിട്ട് ഒന്നും കൊണ്ടുവന്നില്ലെന്ന് പറയണ്ട’ എന്നും തമാശയായി പറഞ്ഞു.

തുടർന്ന് ബിഗ് ബോസിൽ പോയി തോറ്റ് തിരിച്ചെത്തിയതിൽ അമ്മയ്ക്ക് എന്താണ് പറയാനുള്ളതെന്നും രാകേഷ് ചോദിച്ചു.

കപ്പിന് പകരം കിട്ടിയത് രണ്ട് പപ്പായ

മകന്റെ പുറത്താകലിൽ നിരാശപ്പെടാതെ അഭിമാനത്തോടെയായിരുന്നു അമ്മയുടെ മറുപടി. “ഒരുപാട് അഭിമാനം ഉണ്ട്. അതിൽ കയറാൻ പറ്റുക എന്നത് തന്നെ ഭാഗ്യമാണ്” എന്നായിരുന്നു അമ്മ പറഞ്ഞത്.

എന്നാൽ പിന്നാലെ എത്തിയ സമ്മാനം രാകേഷ് പ്രതീക്ഷിച്ചതായിരുന്നില്ല. ബിഗ് ബോസ് വീട്ടിൽ നിന്ന് മകൻ കപ്പുമായി തിരിച്ചുവരണമെന്നായിരുന്നു തന്റെ വലിയ ആഗ്രഹമെന്ന് അമ്മ പറഞ്ഞു.

പക്ഷേ കപ്പിന് പകരം ‘കപ്പങ്ങ ഇരിക്കട്ടെ’ എന്ന് പറഞ്ഞ് രാകേഷിന്റെ കയ്യിലേക്ക് രണ്ട് പപ്പായയാണ് അമ്മ നൽകിയത്.

‘ഇപ്പോൾ സ്വന്തം വീട്ടിൽനിന്നും ട്രോൾ’

അമ്മയുടെ ട്രോൾ സമ്മാനവും രാകേഷ് ചിരിച്ചുകൊണ്ടാണ് സ്വീകരിച്ചത്. “നാട്ടുകാർ ട്രോൾ ചെയ്യുന്നു, ഇപ്പോൾ സ്വന്തം വീട്ടിൽനിന്നും ട്രോൾ ആണല്ലോ” എന്നായിരുന്നു രാകേഷിന്റെ രസകരമായ പ്രതികരണം.

അമ്മയും മകനും തമ്മിലുള്ള ഈ രസകരമായ സംഭാഷണമാണ് വീഡിയോയ്ക്ക് കൂടുതൽ കൗതുകം നൽകുന്നത്.

അഗ്നിപരീക്ഷയിലും ശ്രദ്ധ നേടി രാകേഷ്

അഗ്നിപരീക്ഷയിൽ നിന്ന് ബിഗ് ബോസ് ഹൗസിലെത്തുമെന്ന് ആദ്യഘട്ടത്തിൽ തന്നെ പലരും പ്രവചിച്ചിരുന്ന മത്സരാർഥികളിൽ ഒരാളായിരുന്നു രാകേഷ്.

സ്വതസിദ്ധമായ സംസാരശൈലിയും തമാശകളും കൊണ്ട് അഗ്നിപരീക്ഷയിൽ തന്നെ ശ്രദ്ധ നേടിയ രാകേഷിന് ബിഗ് ബോസ് വീട്ടിലും സ്വന്തമായ ഇടം കണ്ടെത്താൻ കഴിഞ്ഞിരുന്നു.

ബിഗ് ബോസ് കിരീടവുമായി മകൻ തിരിച്ചെത്തണമെന്ന അമ്മയുടെ ആഗ്രഹം ഇത്തവണ പൂർത്തിയായില്ല. എന്നാൽ പുറത്തായെത്തിയ മകനെ സ്നേഹത്തോടെ സ്വീകരിച്ചതിനൊപ്പം ചെറിയൊരു ‘ട്രോൾ’ സമ്മാനം നൽകാനും അമ്മ മറന്നില്ല.

English Summary

Bigg Boss Malayalam Season 8 contestant Rakesh received a humorous welcome from his mother after being evicted in the mass eviction. His mother jokingly welcomed him with the dialogue, “The son has returned after losing badly,” while Rakesh presented her with a garland and bouquet. She said she was proud of him for getting into Bigg Boss but jokingly handed him two papayas instead of the trophy he had hoped to bring home. Rakesh took the trolling sportingly and said he was now being trolled by his own family as well. The light-hearted exchange has attracted attention on social media.