തിരുവനന്തപുരം: വാഹന മോഡിഫിക്കേഷൻ അനുവദിക്കാനുള്ള സംസ്ഥാന സർക്കാരിന്റെ നീക്കത്തിന് തിരിച്ചടി. വാഹനങ്ങളുടെ അനധികൃത രൂപമാറ്റങ്ങൾക്കെതിരെ കർശന നടപടി സ്വീകരിക്കാൻ മോട്ടോർ വാഹന വകുപ്പ് തീരുമാനിച്ചു. ട്രാൻസ്പോർട്ട് കമ്മിഷണർ സി.എച്ച്. നാഗരാജു ഉദ്യോഗസ്ഥർക്ക് നിർദേശം നൽകി.
വാഹന മോഡിഫിക്കേഷൻ അനുവദിക്കാനുള്ള നീക്കം പാളി
ഹൈക്കോടതി ഉത്തരവിന്റെ പശ്ചാത്തലത്തിലാണ് വാഹന മോഡിഫിക്കേഷനെതിരെ കർശന നടപടിക്ക് മോട്ടോർ വാഹന വകുപ്പ് നിർദേശം നൽകിയത്. വാഹനങ്ങളിൽ കണ്ടെത്തുന്ന ഓരോ അനധികൃത രൂപമാറ്റത്തിനും നിലവിലെ നിയമങ്ങളും ചട്ടങ്ങളും അനുസരിച്ച് പിഴ ചുമത്തണം.
കൂടാതെ, പിഴ ചുമത്തിയ ശേഷം തുടർനടപടികളും സ്വീകരിക്കണമെന്നാണ് ട്രാൻസ്പോർട്ട് കമ്മിഷണറുടെ നിർദേശം.
സർക്കാരിന്റെ 100 ദിന പ്രഖ്യാപനത്തിനും തിരിച്ചടി
അപകടകരമല്ലാത്ത വാഹന മോഡിഫിക്കേഷനുകൾ കുറ്റകരമല്ലാതാക്കുമെന്നായിരുന്നു സർക്കാരിന്റെ നൂറുദിന കർമപരിപാടിയിലെ പ്രഖ്യാപനം. എന്നാൽ, ഹൈക്കോടതി ഉത്തരവോടെ ഈ നീക്കത്തിന് തിരിച്ചടിയുണ്ടായി.
സർക്കാരിന്റെ നിർദേശപ്രകാരം അനുവദിക്കാവുന്ന രൂപമാറ്റങ്ങൾ സംബന്ധിച്ച റിപ്പോർട്ട് ട്രാൻസ്പോർട്ട് കമ്മിഷണർ ജൂൺ 4ന് സർക്കാരിന് സമർപ്പിച്ചിരുന്നു.
18 സാധാരണ മോഡിഫിക്കേഷനുകൾ അനുവദിക്കാമെന്നായിരുന്നു റിപ്പോർട്ട്
സീറ്റ് കവർ, ഫ്ലോർ മാറ്റം, സ്റ്റീയറിംഗ് വീൽ കവർ എന്നിവ ഉൾപ്പെടെ 18 പതിവ് മോടിപിടിപ്പിക്കലുകൾ അനുവദിക്കാമെന്നാണ് റിപ്പോർട്ടിൽ നിർദേശിച്ചിരുന്നത്.
എന്നാൽ, കോടതി ഉത്തരവ് വന്നതോടെ ഈ നിർദേശങ്ങൾക്കും സാധുത ഇല്ലാതായതായി മോട്ടോർ വാഹന വകുപ്പ് വ്യക്തമാക്കുന്നു.
വാഹനം നിർമ്മിച്ച് പുറത്തിറക്കുമ്പോഴുള്ള സവിശേഷതകളിൽ നിന്ന് വ്യത്യസ്തമായി നടത്തുന്ന രൂപമാറ്റം കുറ്റകരമാണെന്നാണ് നിലവിലെ നിലപാട്. എന്നാൽ, വാഹനത്തിന്റെ കേടുപാടുകൾ പരിഹരിക്കുന്നതിനിടെ സ്വാഭാവികമായി ഉണ്ടാകുന്ന മാറ്റങ്ങൾക്ക് ഇത് ബാധകമാകാനിടയില്ല.
More Read
റീലുകൾക്കായി വാഹനങ്ങൾ മോഡിഫൈ ചെയ്താലും നടപടി
റീൽസ് ചിത്രീകരണത്തിനായി വാഹനങ്ങളിൽ രൂപമാറ്റം വരുത്തുന്നവർക്കെതിരെയും നിയമനടപടി സ്വീകരിക്കണമെന്ന് ട്രാൻസ്പോർട്ട് കമ്മിഷണറുടെ സർക്കുലറിൽ പ്രത്യേകം നിർദേശിച്ചിട്ടുണ്ട്.
അടൂരിൽ മോഡിഫിക്കേഷൻ നടത്തിയ ജീപ്പിന് പിഴ ചുമത്തിയ രണ്ട് മോട്ടോർ വാഹന വകുപ്പ് ഉദ്യോഗസ്ഥരെ രാഷ്ട്രീയ സമ്മർദ്ദത്തെ തുടർന്ന് അടുത്തിടെ സസ്പെൻഡ് ചെയ്തിരുന്നു. പത്തനംതിട്ടയിൽ പ്രളയ രക്ഷാപ്രവർത്തനത്തിന് എത്തിയ വാഹനത്തിന് പിഴ ചുമത്തിയെന്നായിരുന്നു പരാതി.
എന്നാൽ, വാഹനം മോഡിഫൈ ചെയ്ത് റീൽസ് ചിത്രീകരണത്തിന് ഉപയോഗിക്കുന്നതായി കണ്ടെത്തിയതിനെ തുടർന്നാണ് നടപടി സ്വീകരിച്ചതെന്നായിരുന്നു എം.വി.ഡിയുടെ വിശദീകരണം.
മോഡിഫിക്കേഷൻ നടത്തിയാൽ വാഹനം പഴയ രൂപത്തിലാക്കണം
വാഹന മോഡിഫിക്കേഷന് പിഴ ചുമത്തിയശേഷം വാഹനം പൂർവസ്ഥിതിയിലേക്ക് മാറ്റി പരിശോധനയ്ക്ക് ഹാജരാക്കാൻ ഉടമയ്ക്ക് നിർദേശം നൽകണം.
കൂടാതെ, മൂന്ന് മാസത്തിനുള്ളിൽ രൂപമാറ്റവുമായി ബന്ധപ്പെട്ട് സ്വീകരിച്ച നടപടികളുടെ വിശദാംശങ്ങൾ സെപ്റ്റംബർ മൂന്നിന് മുമ്പ് ബന്ധപ്പെട്ട ഉദ്യോഗസ്ഥർ ട്രാൻസ്പോർട്ട് കമ്മിഷണറെ അറിയിക്കണമെന്നും നിർദേശിച്ചിട്ടുണ്ട്.
ടയർ, ലൈറ്റ്, എയർഹോൺ; പിഴ കനക്കും
വാഹനത്തിന്റെ ടയറുകൾ പുറത്തേക്ക് തള്ളിനിൽക്കുന്ന രീതിയിൽ മോഡിഫിക്കേഷൻ നടത്തിയാൽ ഓരോ ടയറിനും 5,000 രൂപ വീതം പിഴ ചുമത്തും. നാല് ടയറുകൾക്കും രൂപമാറ്റം വരുത്തിയാൽ ആകെ 20,000 രൂപ പിഴ നൽകേണ്ടിവരും.
അതേസമയം, വാഹനത്തിൽ അനുവദിച്ചിട്ടുള്ളതിൽ അധികമായി ഘടിപ്പിക്കുന്ന ഓരോ ലൈറ്റിനും 5,000 രൂപ വീതം പിഴയുണ്ടാകും. നിയമവിരുദ്ധമായി എയർഹോൺ ഘടിപ്പിച്ചാലും 5,000 രൂപ പിഴ ചുമത്തും.
