ന്യൂഡൽഹി: ഈ വർഷം എട്ട് വിക്ഷേപണ ദൗത്യങ്ങൾ നടത്താൻ ലക്ഷ്യമിടുന്നതായി ഐഎസ്ആർഒ ചെയർമാൻ വി. നാരായണൻ. എട്ട് ദൗത്യങ്ങളിലൂടെ ആശയവിനിമയം, നാവിഗേഷൻ, ഭൗമനിരീക്ഷണം, ശാസ്ത്രീയ ഗവേഷണം തുടങ്ങിയ മേഖലകൾക്ക് കരുത്തേകുന്ന 12 ഉപഗ്രഹങ്ങൾ ബഹിരാകാശത്ത് എത്തിക്കാനാണ് പദ്ധതി. ഐഎസ്ആർഒ വിക്ഷേപണം വീണ്ടും സജീവമാകുന്നതിനൊപ്പം ഗഗൻയാൻ ദൗത്യത്തിനും നിർണായക മുന്നേറ്റമുണ്ടാകും.
അഹമ്മദാബാദിൽ നടന്ന മൂന്നാമത് ദേശീയ ബഹിരാകാശ ദിനാചരണത്തോടനുബന്ധിച്ചാണ് വി. നാരായണൻ ഇക്കാര്യം അറിയിച്ചത്. കഴിഞ്ഞ എട്ടുമാസമായി ഒരു വിക്ഷേപണ ദൗത്യവും നടത്താതിരുന്ന സാഹചര്യത്തിലാണ് പുതിയ പ്രഖ്യാപനം.
ഐഎസ്ആർഒ വിക്ഷേപണം: ഈ വർഷം എട്ട് ദൗത്യങ്ങൾ
ആശയവിനിമയം, നാവിഗേഷൻ, ഭൗമനിരീക്ഷണം, ശാസ്ത്രീയ ഗവേഷണം തുടങ്ങിയ മേഖലകൾ ലക്ഷ്യമിട്ടുള്ള 12 ഉപഗ്രഹങ്ങളാണ് എട്ട് ദൗത്യങ്ങളിലൂടെ വിക്ഷേപിക്കുക.
അതേസമയം, വാണിജ്യ വിക്ഷേപണ രംഗത്തും ഐഎസ്ആർഒ കൂടുതൽ സജീവമാകും. എസ്.എസ്.എൽ.വി ഉൾപ്പെടെയുള്ള വിക്ഷേപണ സംവിധാനങ്ങളുടെ സ്വകാര്യവത്കരണത്തിനും ഇതോടൊപ്പം പ്രാധാന്യം നൽകും.
ഗഗൻയാൻ ആളില്ലാ പരീക്ഷണം നാല് മാസത്തിനകം
മനുഷ്യനെ ബഹിരാകാശത്ത് എത്തിക്കുന്ന ഇന്ത്യയുടെ സ്വപ്ന ദൗത്യമായ ഗഗൻയാന്റെ ആദ്യ ആളില്ലാ പരീക്ഷണ വിക്ഷേപണം നാല് മാസത്തിനുള്ളിൽ നടത്തുമെന്ന് ചെയർമാൻ വ്യക്തമാക്കി.
More Read
ആളില്ലാ പരീക്ഷണ വിക്ഷേപണത്തിനായി 8,000 സിസ്റ്റം ടെസ്റ്റുകൾ പൂർത്തിയാക്കിയിട്ടുണ്ട്. എച്ച്.എൽ.വി.എം-3 റോക്കറ്റിന്റെ മൂന്ന് ഘട്ടങ്ങളും ക്രൂ എസ്കേപ്പ് സിസ്റ്റത്തിന്റെ മോട്ടോറും സജ്ജമായതായും അറിയിച്ചു.
2035ൽ ഭാരതീയ അന്തരീക്ഷ സ്റ്റേഷൻ
2035ഓടെ ഇന്ത്യയുടെ സ്വന്തം ബഹിരാകാശ നിലയമായ ഭാരതീയ അന്തരീക്ഷ സ്റ്റേഷൻ (ബി.എ.എസ്) സ്ഥാപിക്കാനാണ് ലക്ഷ്യമിടുന്നത്.
ഇതിന്റെ ആദ്യ മൊഡ്യൂളിന് അനുമതി ലഭിച്ചതായും ഐഎസ്ആർഒ ചെയർമാൻ അറിയിച്ചു. മനുഷ്യ ബഹിരാകാശ ദൗത്യങ്ങൾ ഉൾപ്പെടെയുള്ള ഇന്ത്യയുടെ ഭാവി പദ്ധതികൾക്ക് ഇത് നിർണായക അടിസ്ഥാനസൗകര്യമാകും.
അഞ്ച് വർഷത്തിൽ 200–300 ഉപഗ്രഹങ്ങൾ
അടുത്ത അഞ്ച് വർഷത്തിനുള്ളിൽ 200 മുതൽ 300 വരെ ഉപഗ്രഹങ്ങൾ ബഹിരാകാശത്ത് എത്തിക്കുകയാണ് ലക്ഷ്യമെന്ന് വി. നാരായണൻ പറഞ്ഞു.
കൂടാതെ, സ്വകാര്യ പങ്കാളിത്തം കൂടുതൽ ശക്തമാക്കും. വാണിജ്യ വിക്ഷേപണ രംഗത്തെ വികസനത്തിനും സ്വകാര്യ മേഖലയുമായുള്ള സഹകരണത്തിനും ഇതോടെ കൂടുതൽ പ്രാധാന്യം ലഭിക്കും.
