കണ്ണൂർ: തുടർച്ചയായ പഠനവും ആത്മവിശ്വാസവും കൈമുതലാക്കി വലിയ നേട്ടം സ്വന്തമാക്കി കണ്ണൂർ ഇരിട്ടി എടൂർ സ്വദേശിനി ആദിത്യ മനോജ്. ജർമനിയിലെ കാൾസ്രൂഹെ ഇൻസ്റ്റിറ്റ്യൂട്ട് ഓഫ് ടെക്നോളജിയിൽ പി.എച്ച്.ഡി ഗവേഷണത്തിനായി 1.3 കോടി രൂപയുടെ ഫെലോഷിപ്പാണ് 22കാരിയായ ആദിത്യയ്ക്ക് ലഭിച്ചത്.
ജർമൻ സർക്കാരും കാൾസ്രൂഹെ ഇൻസ്റ്റിറ്റ്യൂട്ട് ഓഫ് ടെക്നോളജിയും സംയുക്തമായാണ് നാല് വർഷത്തെ ഗവേഷണ ഫെലോഷിപ്പ് നൽകുന്നത്. ഒക്ടോബർ ഒന്നിന് ആദിത്യ ജർമനിയിലേക്ക് യാത്ര തിരിക്കും.
ആദിത്യ മനോജിന്റെ ഗവേഷണം എൻ.എം.ആർ മേഖലയിൽ
ഫിസിക്കൽ കെമിസ്ട്രിയിലെ ന്യൂക്ലിയർ മാഗ്നറ്റിക് റെസൊണൻസ് (എൻ.എം.ആർ) മേഖലയിലാണ് ആദിത്യയുടെ ഡോക്ടറൽ ഗവേഷണം. ലോ-ഫീൽഡ് ഹൈപ്പർപോളറൈസേഷൻ ടെക്നിക്കുകൾ കേന്ദ്രീകരിച്ചായിരിക്കും ഗവേഷണം.
ഡോ. ബെനോ മീയറാണ് ആദിത്യയുടെ ഗവേഷണ പ്രവർത്തനങ്ങൾക്ക് നേതൃത്വം നൽകുന്നത്. കൂടാതെ, സ്വിറ്റ്സർലൻഡിലെ പ്രമുഖ ഗവേഷണ സ്ഥാപനമായ ഇ.പി.എഫ്.എല്ലുമായി സഹകരിച്ചാണ് ഗവേഷണം നടത്തുക.
More Read
പഠനത്തിൽ നേരത്തെ തന്നെ മികവ്
മുംബൈ സർവകലാശാലയുടെ ഡിപ്പാർട്ട്മെന്റ് ഓഫ് ആറ്റമിക് എനർജിക്ക് കീഴിലുള്ള സെന്റർ ഫോർ എക്സലൻസ് ഇൻ ബേസിക് സയൻസസിൽ നിന്ന് കെമിസ്ട്രിയിൽ ഇന്റഗ്രേറ്റഡ് എം.എസ്സി ഡിസ്റ്റിംഗ്ഷനോടെയാണ് ആദിത്യ പൂർത്തിയാക്കിയത്.
മാസ്റ്റർ തീസിസ് ജർമനിയിലെ ടെക്നിക്കൽ യൂണിവേഴ്സിറ്റിയിലാണ് നിർവഹിച്ചത്. ഇതിനിടെ ബനാറസ് ഹിന്ദു സർവകലാശാലയിലും ജപ്പാനിലെ കാനസാവ സർവകലാശാലയിലും ഗവേഷണ പഠന പ്രവർത്തനങ്ങളിൽ പങ്കെടുത്തു.
എസ്.എസ്.എൽ.സിക്കും പ്ലസ് ടുവിനും മുഴുവൻ എ പ്ലസ്
എടൂർ സെന്റ് മേരീസ് ഹയർ സെക്കൻഡറി സ്കൂളിൽ നിന്നാണ് ആദിത്യ എസ്.എസ്.എൽ.സി പഠനം പൂർത്തിയാക്കിയത്. തുടർന്ന് കോഴിക്കോട് പ്രൊവിഡൻസ് സ്കൂളിൽ നിന്ന് പ്ലസ് ടുവും മുഴുവൻ എ പ്ലസോടെ വിജയിച്ചു.
നിലവിൽ ജർമനിയിലേക്കുള്ള യാത്രയ്ക്ക് മുന്നോടിയായുള്ള ഇടവേളയിൽ ഇരിട്ടിയിലെ സ്വകാര്യ സ്ഥാപനത്തിൽ ട്യൂഷനെടുക്കുകയാണ് ആദിത്യ.
എടൂരിൽ നിന്ന് അന്താരാഷ്ട്ര ഗവേഷണത്തിലേക്ക്
എടൂർ വെമ്പുഴ പാലത്തിന് സമീപം താമസിക്കുന്ന വലിയപറമ്പത്ത് മനോജിന്റെയും ലീനയുടെയും മകളാണ് ആദിത്യ. സഹോദരൻ അർജുൻ ഇന്ത്യൻ ആർമിയിൽ പൂനെയിലാണ്.
നിരന്തരമായ പഠനത്തിലൂടെ നേടിയ മികവാണ് ആദിത്യയെ അന്താരാഷ്ട്ര തലത്തിലുള്ള ഗവേഷണ അവസരത്തിലേക്ക് എത്തിച്ചത്. നാല് വർഷത്തെ ഫെലോഷിപ്പോടെ ജർമനിയിൽ ആരംഭിക്കുന്ന ഗവേഷണം ശാസ്ത്രരംഗത്ത് പുതിയ സാധ്യതകൾ തുറക്കുമെന്ന പ്രതീക്ഷയിലാണ് കുടുംബവും നാട്ടുകാരും
