തിരുവനന്തപുരം: വിദ്യാഭ്യാസ സ്ഥാപനങ്ങൾക്ക് ഇന്ന് അവധി പ്രഖ്യാപിച്ച് ജില്ലാ കലക്ടർമാർ. കനത്ത മഴയും കാലാവസ്ഥാ മുന്നറിയിപ്പുകളും തുടരുന്ന സാഹചര്യത്തിൽ എറണാകുളം, കണ്ണൂർ, കാസർകോട്, കോട്ടയം, പത്തനംതിട്ട, വയനാട്, ആലപ്പുഴ ജില്ലകളിലെ എല്ലാ വിദ്യാഭ്യാസ സ്ഥാപനങ്ങൾക്കും ഇന്ന് (ഓഗസ്റ്റ് 7) അവധി പ്രഖ്യാപിച്ചു.
കൂടാതെ, ഇടുക്കി, തൃശൂർ ജില്ലകളിൽ ദുരിതാശ്വാസ ക്യാംപുകൾ പ്രവർത്തിക്കുന്ന സ്കൂളുകൾക്കും ഇന്ന് അവധിയായിരിക്കും. എറണാകുളം ജില്ലയിലെ അവധി പ്രഖ്യാപനം ഇന്ന് പുലർച്ചെയാണ് ജില്ലാ കലക്ടർ നടത്തിയത്.
വിദ്യാഭ്യാസ സ്ഥാപനങ്ങൾക്ക് ഇന്ന് അവധി പ്രഖ്യാപിച്ച ജില്ലകൾ
ഇന്ന് അവധി പ്രഖ്യാപിച്ച ജില്ലകൾ:
- എറണാകുളം
- കണ്ണൂർ
- കാസർകോട്
- കോട്ടയം
- പത്തനംതിട്ട
- വയനാട്
- ആലപ്പുഴ
അതേസമയം, ഇടുക്കി, തൃശൂർ ജില്ലകളിൽ ദുരിതാശ്വാസ ക്യാംപുകളായി പ്രവർത്തിക്കുന്ന വിദ്യാഭ്യാസ സ്ഥാപനങ്ങൾക്കും അവധി ബാധകമാണ്.
സംസ്ഥാനത്ത് ഓറഞ്ച്, യെല്ലോ അലർട്ട്
കേന്ദ്ര കാലാവസ്ഥ വകുപ്പ് ഇന്നും നാളെയും സംസ്ഥാനത്ത് ഒറ്റപ്പെട്ട ശക്തമായ മഴയ്ക്ക് സാധ്യത പ്രവചിച്ചിട്ടുണ്ട്.
More Read
പത്തനംതിട്ട, കോട്ടയം, ഇടുക്കി, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്. തിരുവനന്തപുരം, കൊല്ലം, ആലപ്പുഴ, എറണാകുളം, തൃശൂർ, പാലക്കാട് ജില്ലകളിൽ യെല്ലോ അലർട്ടും നിലവിലുണ്ട്.
കൂടാതെ, തിങ്കളാഴ്ച വരെ സമാന കാലാവസ്ഥ തുടരാൻ സാധ്യതയുണ്ടെന്നും കാലാവസ്ഥ വകുപ്പ് അറിയിച്ചു.
മീൻപിടിത്തത്തിന് വിലക്ക്
കേരളം, കർണാടക, ലക്ഷദ്വീപ് തീരങ്ങളിൽ ഇന്നും നാളെയും മീൻപിടിത്തത്തിന് വിലക്ക് ഏർപ്പെടുത്തിയിട്ടുണ്ട്.
ശക്തമായ കാറ്റിനും മോശം കാലാവസ്ഥയ്ക്കും സാധ്യതയുള്ളതിനാൽ മത്സ്യത്തൊഴിലാളികൾ കടലിൽ പോകരുതെന്ന് മുന്നറിയിപ്പ് നൽകിയിട്ടുണ്ട്.
വിവിധ ജില്ലകളിൽ മഴക്കെടുതി തുടരുന്നു
ഇടുക്കിയിൽ ഇന്നലെ കൊച്ചി–ധനുഷ്കോടി ദേശീയപാതയിൽ ചെറിയ തോതിൽ മണ്ണിടിച്ചിൽ ഉണ്ടായി. ഇടുക്കി, മുല്ലപ്പെരിയാർ ഡാമുകളിലെ ജലനിരപ്പും ഉയർന്നിട്ടുണ്ട്.
അതേസമയം, കോട്ടയം ജില്ലയുടെ പടിഞ്ഞാറൻ മേഖലകളിൽ വെള്ളപ്പൊക്ക ദുരിതം തുടരുകയാണ്. തിരുവാർപ്പ്, അയ്മനം മേഖലകളിൽ വെള്ളം പതുക്കെ ഇറങ്ങുന്നുണ്ടെങ്കിലും കുമരകം, വൈക്കം താലൂക്കിലെ താഴ്ന്ന പ്രദേശങ്ങൾ, ചങ്ങനാശേരിയിലെ എ.സി. റോഡും സമീപ പ്രദേശങ്ങളും ഇപ്പോഴും വെള്ളത്തിനടിയിലാണ്.
