ഡൽഹി സർക്കാരിന്റെ ലക്ഷ്മി യോജനയ്ക്ക് വൻ ജനപിന്തുണ. രജിസ്ട്രേഷൻ ആരംഭിച്ച ആദ്യദിനം തന്നെ 1,47,215 സ്ത്രീകളാണ് പദ്ധതിയിൽ പേര് രജിസ്റ്റർ ചെയ്തത്. സ്ത്രീകൾക്ക് പ്രതിമാസ സാമ്പത്തിക സഹായത്തോടൊപ്പം ദീർഘകാല സാമ്പത്തിക സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് പദ്ധതി നടപ്പാക്കുന്നത്.
ലക്ഷ്മി യോജനയ്ക്ക് ആദ്യദിനം തന്നെ വൻ പ്രതികരണം
ഓഗസ്റ്റ് 1-ന് രജിസ്ട്രേഷൻ ആരംഭിച്ചതിന് പിന്നാലെ ലക്ഷ്മി യോജന പോർട്ടലിൽ വലിയ തിരക്കാണ് അനുഭവപ്പെട്ടത്. ആദ്യ 24 മണിക്കൂറിനുള്ളിൽ 1.47 ലക്ഷത്തിലധികം അപേക്ഷകൾ ലഭിച്ചതായി സർക്കാർ അറിയിച്ചു.
മുഖ്യമന്ത്രി രേഖാ ഗുപ്തയുടെ നേതൃത്വത്തിലുള്ള ഡൽഹി സർക്കാരാണ് വനിതകൾക്കായി ഈ പദ്ധതി നടപ്പാക്കുന്നത്.
₹2,500 എങ്ങനെ ലഭിക്കും?
ലക്ഷ്മി യോജന പ്രകാരം പ്രതിമാസം ₹2,500യുടെ ആനുകൂല്യമാണ് അനുവദിക്കുന്നത്. എന്നാൽ മുഴുവൻ തുകയും നേരിട്ട് ബാങ്ക് അക്കൗണ്ടിലേക്ക് നൽകില്ല.
₹1,000 ഗുണഭോക്താവിന്റെ ബാങ്ക് അക്കൗണ്ടിൽ നിക്ഷേപിക്കും. ശേഷിക്കുന്ന ₹1,500 മൂന്ന് വർഷത്തെ ലോക്ക്-ഇൻ കാലാവധിയുള്ള സ്ഥിരനിക്ഷേപമായി (എഫ്ഡി) മാറ്റും. ഇതിലൂടെ ഹ്രസ്വകാല സഹായത്തിനൊപ്പം ദീർഘകാല സാമ്പത്തിക സുരക്ഷയും ഉറപ്പാക്കാനാണ് ലക്ഷ്യമിടുന്നത്.
More Read
ആർക്കെല്ലാം പദ്ധതിയിൽ ചേരാം?
21 മുതൽ 60 വയസ്സ് വരെയുള്ള സ്ത്രീകൾക്കാണ് ലക്ഷ്മി യോജനയിൽ അപേക്ഷിക്കാനാകുക. കുടുംബത്തിന്റെ വാർഷിക വരുമാനം ₹2.5 ലക്ഷം കവിയരുത്.
നടപ്പു സാമ്പത്തിക വർഷത്തിൽ 17 ലക്ഷം വനിതകൾക്ക് പദ്ധതിയുടെ പ്രയോജനം ലഭിക്കുമെന്ന് സർക്കാർ പ്രതീക്ഷിക്കുന്നു. ഇതിനായി ₹5,100 കോടി രൂപയാണ് ഡൽഹി സർക്കാർ വകയിരുത്തിയിരിക്കുന്നത്.
ആർക്കൊക്കെയാണ് അർഹതയില്ലാത്തത്?
നിലവിൽ മറ്റേതെങ്കിലും സർക്കാർ പദ്ധതിയിലൂടെ സാമ്പത്തിക സഹായം ലഭിക്കുന്നവർക്ക് ഈ പദ്ധതിയിൽ ചേരാൻ സാധിക്കില്ല.
കൂടാതെ, ആദായനികുതി അടയ്ക്കുന്നവർ, സർക്കാർ ജീവനക്കാർ, കുടുംബത്തിൽ സർക്കാർ ജോലിയുള്ളവർ, മൂന്നിലധികം കുട്ടികളുള്ളവർ, കാർ ഉടമകൾ, ക്രിമിനൽ പശ്ചാത്തലമുള്ളവർ എന്നിവർക്കും അർഹതയില്ല.
അപേക്ഷയ്ക്ക് ശുപാർശക്കത്തും നിർബന്ധം
ലക്ഷ്മി യോജനയിൽ അപേക്ഷിക്കുന്നവർ അതത് മണ്ഡലത്തിലെ എംഎൽഎയുടെയോ എംപിയുടെയോ ശുപാർശക്കത്ത് സമർപ്പിക്കണം.
ഇതിനുശേഷം കർശനമായ പരിശോധനാ നടപടികൾ പൂർത്തിയാക്കിയ ശേഷമേ അർഹരായ ഗുണഭോക്താക്കളെ അന്തിമമായി തിരഞ്ഞെടുക്കുകയുള്ളു. ബിജെപിയുടെ തിരഞ്ഞെടുപ്പ് വാഗ്ദാനങ്ങളിൽ ഉൾപ്പെട്ടിരുന്ന പദ്ധതിയാണ് ഇപ്പോൾ നടപ്പിലാക്കുന്നത്.
