4 ഇൻ 1 ഡിജിറ്റൽ മാപിനി വികസിപ്പിച്ച് കൊച്ചിയിലെ യുവ എൻജിനിയറിംഗ് വിദ്യാർഥി ശ്രദ്ധേയനാകുന്നു. എ.സി. മുറികളിലും വാഹനങ്ങളിലുമുണ്ടാകുന്ന കാർബൺ മോണോക്സൈഡ് വിഷബാധ മൂലമുള്ള അപകടങ്ങളാണ് ഈ ഉപകരണം വികസിപ്പിക്കാൻ അക്ഷയ് രാജിന് പ്രചോദനമായത്. തീപ്പെട്ടിയുടെ വലിപ്പമുള്ള ഈ ഉപകരണം നാല് പ്രധാന അളവുകൾ ഒരുമിച്ച് കണ്ടെത്താൻ സഹായിക്കുന്നു.
കാലടി ആദിശങ്കര എൻജിനിയറിംഗ് കോളേജിലെ മൂന്നാം വർഷ ഇലക്ട്രോണിക്സ് വിദ്യാർഥിയായ പി.ആർ. അക്ഷയ് രാജാണ് ഈ നൂതന ഉപകരണത്തിന് പിന്നിൽ.
കാർബൺ മോണോക്സൈഡും താപനിലയും ഒരൊറ്റ ഉപകരണത്തിൽ
4 ഇൻ 1 ഡിജിറ്റൽ മാപിനി കാർബൺ മോണോക്സൈഡിന്റെ സാന്നിധ്യം കണ്ടെത്തി അലാറം മുഴക്കാൻ കഴിവുള്ള ഇലക്ട്രോകെമിക്കൽ സെൻസറോടെയാണ് പ്രവർത്തിക്കുന്നത്. കൂടാതെ താപനില അളക്കുന്ന സെൻസർ, അന്തരീക്ഷത്തിലെ ഈർപ്പം അറിയിക്കുന്ന ഹൈഗ്രോമീറ്റർ, അന്തരീക്ഷ മർദ്ദം അളക്കുന്ന ബാരോമീറ്റർ എന്നിവയും ഇതിൽ ഉൾപ്പെടുത്തിയിട്ടുണ്ട്.
ഇന്റർനെറ്റ് ഓഫ് തിങ്സ് (IoT) സാങ്കേതികവിദ്യ ഉപയോഗിച്ച് ഈ സെൻസറുകളെല്ലാം ഒരൊറ്റ ഉപകരണത്തിലേക്ക് സംയോജിപ്പിച്ചതാണ് ഇതിന്റെ പ്രത്യേകത.
തീപ്പെട്ടി വലിപ്പം; നിർമ്മാണച്ചെലവ് വെറും 2,000 രൂപ
ഈ ഉപകരണത്തിന് 35 മില്ലീമീറ്റർ നീളവും 32.5 മില്ലീമീറ്റർ വീതിയും മാത്രമാണുള്ളത്. 24 മില്ലീമീറ്റർ ഡിസ്പ്ലേ സ്ക്രീനോടുകൂടിയ ഉപകരണം റോബോട്ടിക്സ് സാങ്കേതികവിദ്യയിലാണ് പ്രവർത്തിക്കുന്നത്.
More Read
ത്രീഡി പ്രിന്റഡ് കേസ്, ഡിജിറ്റൽ സ്ക്രീൻ, വിവിധ സെൻസറുകൾ, റീചാർജബിൾ ബാറ്ററി എന്നിവയാണ് പ്രധാന ഘടകങ്ങൾ. ഏകദേശം 2,000 രൂപ ചെലവും ഒരു മാസത്തെ പരിശ്രമവുമാണ് ഈ കണ്ടുപിടിത്തത്തിന് പിന്നിലുള്ളത്.
ബഹിരാകാശ ഉപയോഗവും ലക്ഷ്യമിട്ട് പുതിയ സാങ്കേതികവിദ്യ
4 ഇൻ 1 ഡിജിറ്റൽ മാപിനി ഭാവിയിൽ ബഹിരാകാശ റോവറുകളിലും ഉപയോഗിക്കാനാകുമെന്ന സാധ്യതയാണ് അക്ഷയ് മുന്നിൽ കാണുന്നത്. ചെറുപ്പം മുതൽ ശാസ്ത്ര പരീക്ഷണങ്ങളിൽ സജീവമായ അക്ഷയ് ഇതിനുമുമ്പും നിരവധി നൂതന ഉപകരണങ്ങൾ വികസിപ്പിച്ചിട്ടുണ്ട്.
പ്രതികൂല ഭൂപ്രകൃതിയിൽ സഞ്ചരിക്കുന്ന പ്ലാനറ്ററി എക്സ്പ്ലോറേഷൻ റോവർ, മൈക്രോ ഡ്രോൺ, തടസങ്ങൾ തിരിച്ചറിഞ്ഞ് സഞ്ചരിക്കുന്ന റോബോട്ട്, ഓട്ടോമാറ്റിക് പ്ലാന്റ് വാട്ടറിംഗ് സിസ്റ്റം, ഗ്യാസ് ലീക്കേജ് ഡിറ്റക്ഷൻ സിസ്റ്റം എന്നിവയും അക്ഷയുടെ ശ്രദ്ധേയ കണ്ടുപിടിത്തങ്ങളിൽപ്പെടുന്നു.
എറണാകുളം വടുതല പുതിയാട്ടിൽ വീട്ടിൽ വ്യാപാരിയായ പി.എൻ. രാജന്റെയും രമണിയുടെയും ഇളയമകനാണ് അക്ഷയ് രാജ്. മികച്ച ഇന്നൊവേഷനുകൾക്കുള്ള കേരള സർക്കാരിന്റെ YIP 4.0 പുരസ്കാര ജേതാവായ അദ്ദേഹം തന്റെ കണ്ടുപിടിത്തങ്ങൾക്ക് പേറ്റന്റ് നേടാനുള്ള ശ്രമവും തുടരുകയാണ്.
