സൗദിയിൽ പൂർണ സൂര്യഗ്രഹണം; 21-ാം നൂറ്റാണ്ടിലെ ഏറ്റവും ദൈർഘ്യമേറിയ ആകാശക്കാഴ്ച

റിയാദ്: സൗദിയിൽ പൂർണ സൂര്യഗ്രഹണം 2027 ഓഗസ്റ്റ് 2-ന് ദൃശ്യമാകുമെന്ന് സൗദി ബഹിരാകാശ ഏജൻസി അറിയിച്ചു. 21-ാം നൂറ്റാണ്ടിലെ ഏറ്റവും ദൈർഘ്യമേറിയ പൂർണ സൂര്യഗ്രഹണങ്ങളിൽ ഒന്നായ ഈ പ്രതിഭാസം രാജ്യത്ത് 75 വർഷത്തിനിടെ കാണുന്ന ഏറ്റവും അപൂർവമായ ആകാശക്കാഴ്ചയായിരിക്കുമെന്നും അധികൃതർ വ്യക്തമാക്കി.

ഉച്ചസമയത്ത് ചന്ദ്രൻ സൂര്യനെ പൂർണമായി മറയ്ക്കുന്നതോടെ സൗദിയുടെ വിവിധ ഭാഗങ്ങളിൽ ഏതാനും മിനിറ്റുകൾ പകൽ ഇരുട്ടിലാകുകയും സന്ധ്യാസമയത്തിന് സമാനമായ അന്തരീക്ഷം അനുഭവപ്പെടുകയും ചെയ്യും.

മക്കയും ജിദ്ദയും ഉൾപ്പെടെ നിരവധി നഗരങ്ങളിൽ പൂർണ ഗ്രഹണം

അബയിൽ ഏകദേശം 6 മിനിറ്റോളം പൂർണ സൂര്യഗ്രഹണം അനുഭവപ്പെടും. ജിദ്ദയിൽ 5 മിനിറ്റ് 50 സെക്കൻഡ് വരെ പൂർണ ഇരുട്ടുണ്ടാകുമെന്നാണ് വിലയിരുത്തൽ.

മക്ക, ജിദ്ദ, തായിഫ്, അൽ ബാഹ, ഖമീസ് മുഷൈത്ത്, ജിസാൻ, നജ്‌റാൻ തുടങ്ങിയ നഗരങ്ങളിൽ പൂർണ സൂര്യഗ്രഹണം ദൃശ്യമാകും. അതേസമയം, റിയാദിലും ഈസ്റ്റേൺ പ്രവിശ്യയിലും ഭാഗിക സൂര്യഗ്രഹണമായിരിക്കും കാണാനാകുകയെന്ന് ജിദ്ദ ആസ്ട്രോണമി സൊസൈറ്റി അറിയിച്ചു.

ഗ്രഹണസമയത്ത് എന്തൊക്കെ കാണാം?

ഗ്രഹണസമയത്ത് അന്തരീക്ഷ താപനിലയിൽ കുറവ് അനുഭവപ്പെടും. കൂടാതെ, ഉച്ചസമയത്ത് തന്നെ ചില നക്ഷത്രങ്ങളും ഗ്രഹങ്ങളും ദൃശ്യമാകാൻ സാധ്യതയുണ്ട്.

സൂര്യന്റെ പുറം അന്തരീക്ഷ പാളിയായ കൊറോണ നഗ്നനേത്രങ്ങൾ കൊണ്ട് കാണാൻ കഴിയുന്ന അപൂർവ അവസരവും ഈ ഗ്രഹണം നൽകും.

ഗ്രഹണത്തിന്റെ സമയക്രമം

• രാവിലെ 11:41 – ഭാഗിക സൂര്യഗ്രഹണം ആരംഭിക്കും.
• ഉച്ചയ്ക്ക് 1:21 മുതൽ 1:44 വരെ – പൂർണ സൂര്യഗ്രഹണം.
• വൈകിട്ട് 3:00 ഓടെ – ഗ്രഹണം അവസാനിക്കും.

പ്രധാന നഗരങ്ങളിലെ പൂർണ ഗ്രഹണ സമയം:

• ജിദ്ദ: ഉച്ചയ്ക്ക് 12:00-ന് ആരംഭിച്ച് 1:25-ന് പൂർണ ഗ്രഹണം.
• മക്ക: ഉച്ചയ്ക്ക് 12:01-ന് ആരംഭിച്ച് 1:26-ന് പൂർണ ഗ്രഹണം.
• തായിഫ്: ഉച്ചയ്ക്ക് 12:03-ന് ആരംഭിച്ച് 1:28-ന് പൂർണ ഗ്രഹണം.
• ഖമീസ് മുഷൈത്ത്: ഉച്ചയ്ക്ക് 12:13-ന് ആരംഭിച്ച് 1:37-ന് പൂർണ ഗ്രഹണം.

സുരക്ഷാ നിർദേശം

പ്രത്യേക സോളാർ എക്ലിപ്സ് ഗ്ലാസുകൾ ഇല്ലാതെ ഒരു കാരണവശാലും സൂര്യനെ നേരിട്ട് നോക്കരുതെന്ന് സൗദി സ്പേസ് ഏജൻസി മുന്നറിയിപ്പ് നൽകി. സാധാരണ സൺഗ്ലാസുകളോ ഫിൽട്ടറുകളില്ലാത്ത ടെലിസ്കോപ്പുകളോ ഉപയോഗിച്ച് ഗ്രഹണം നിരീക്ഷിക്കുന്നത് കണ്ണിന് സ്ഥിരമായ കാഴ്ചനഷ്ടം വരുത്താൻ സാധ്യതയുണ്ടെന്നും അധികൃതർ അറിയിച്ചു.