ന്യൂഡൽഹി: സ്പേസ്എക്സ് റോക്കറ്റ് ചന്ദ്രനിൽ ദിവസങ്ങൾക്കകം ഇടിച്ചേക്കുമെന്ന മുന്നറിയിപ്പുമായി ശാസ്ത്രജ്ഞർ. വർഷങ്ങൾക്ക് മുമ്പ് രണ്ട് സ്വകാര്യ ലൂണാർ ലാൻഡറുകളെ ചന്ദ്രനിലേക്ക് എത്തിക്കാൻ ഉപയോഗിച്ച റോക്കറ്റിന്റെ അപ്പർ സ്റ്റേജാണ് നിയന്ത്രണം വിട്ട് ചന്ദ്രനിലേക്ക് നീങ്ങുന്നതെന്നാണ് വിലയിരുത്തൽ. മണിക്കൂറിൽ ഏകദേശം 8,700 കിലോമീറ്റർ വേഗത്തിൽ ചന്ദ്രന്റെ പ്രകാശമുള്ള പടിഞ്ഞാറൻ ഭാഗത്തെ ഐൻസ്റ്റീൻ ഗർത്തത്തിന് സമീപമാകും ഇത് പതിക്കുകയെന്നാണ് സ്പേസ് ട്രാക്കിംഗ് വിദഗ്ധൻ ബിൽ ഗ്രേ പ്രവചിക്കുന്നത്.
ചന്ദ്രോപരിതലത്തിൽ പുതിയ ഗർത്തം രൂപപ്പെടുമെന്ന വിലയിരുത്തൽ
ശാസ്ത്രജ്ഞരുടെ കണക്കുകൂട്ടലുപ്രകാരം റോക്കറ്റിന്റെ അപ്പർ സ്റ്റേജ് ചന്ദ്രോപരിതലത്തിൽ പതിച്ച് ഏകദേശം 27 മീറ്റർ വീതിയും 5 മീറ്റർ ആഴവുമുള്ള ഗർത്തം രൂപപ്പെടുത്താൻ സാധ്യതയുണ്ട്. കൂട്ടിയിടി ഒരു സെക്കൻഡിൽ താഴെ മാത്രമേ നീണ്ടുനിൽക്കൂ. എന്നാൽ പൊടിയും അവശിഷ്ടങ്ങളും ബഹിരാകാശത്തേക്ക് മൈലുകളോളം ഉയരാൻ സാധ്യതയുണ്ടെന്നാണ് വിദഗ്ധർ പറയുന്നത്.
നാസയും ദക്ഷിണകൊറിയയും നിരീക്ഷണം നടത്തും
അതേസമയം, ഈ സംഭവത്തിന് മുമ്പും ശേഷവും ചന്ദ്രോപരിതലത്തിലെ മാറ്റങ്ങൾ പകർത്താൻ നാസയുടെ ലൂണാർ റീകോണൈസൻസ് ഓർബിറ്ററും ദക്ഷിണകൊറിയയുടെ ഡാനൂരി ലൂണാർ ഓർബിറ്ററും ചിത്രങ്ങൾ ശേഖരിക്കും. ഭൂമിയിൽ നിന്ന് ഗർത്തം നേരിട്ട് കാണാനാകില്ലെങ്കിലും ബഹിരാകാശ പേടകങ്ങൾക്ക് അത് വ്യക്തമായി നിരീക്ഷിക്കാനാകും.
ബഹിരാകാശ മാലിന്യത്തെക്കുറിച്ചുള്ള ആശങ്ക വർധിക്കുന്നു
ഈ കൂട്ടിയിടി വലിയ ഭീഷണി സൃഷ്ടിക്കില്ലെന്നാണ് ശാസ്ത്രജ്ഞരുടെ വിലയിരുത്തൽ. എന്നിരുന്നാലും, ബഹിരാകാശ മാലിന്യം വർധിക്കുന്നത് ഭാവിയിലെ ബഹിരാകാശ ദൗത്യങ്ങൾക്ക് വെല്ലുവിളിയാകാമെന്ന് അവർ മുന്നറിയിപ്പ് നൽകുന്നു.
വിദഗ്ധരുടെ അഭിപ്രായത്തിൽ, റോക്കറ്റിന്റെ അപ്പർ സ്റ്റേജ് സൂര്യന്റെ ഭ്രമണപഥത്തിലേക്ക് തിരിച്ചുവിടാൻ സാധിച്ചിരുന്നെങ്കിൽ ഈ സാഹചര്യം ഒഴിവാക്കാനാകുമായിരുന്നു. 2022-ൽ ഒരു ചൈനീസ് റോക്കറ്റ് ചന്ദ്രന്റെ മറഞ്ഞിരിക്കുന്ന ഭാഗത്ത് പതിച്ചതിന് ശേഷം ഇത്തരമൊരു സംഭവം റിപ്പോർട്ട് ചെയ്യപ്പെടുന്നത് രണ്ടാം തവണയാണ്.
More Read
ഈ റോക്കറ്റ് ഭാഗത്തിന് ഏകദേശം 12 മീറ്റർ നീളവും 4,500 കിലോഗ്രാം ഭാരവുമുണ്ട്. 2025 ജനുവരി 15-ന് രണ്ട് സ്വകാര്യ ലൂണാർ ലാൻഡറുകളുമായി വിക്ഷേപിച്ച ദൗത്യത്തിന്റെ ഭാഗമായിരുന്നു ഇത്
