ഓപ്പറേഷൻ സ്റ്റീൽ ബേഡ്: റൂറൽ പോലീസിന്റെ വലയിലായി 22 ക്രിമിനലുകൾ

ഓപ്പറേഷൻ സ്റ്റീൽ ബേഡ് വഴി എറണാകുളം റൂറൽ പൊലീസ് സംഘടിത കുറ്റകൃത്യങ്ങൾക്കെതിരെ നടപടി ശക്തമാക്കുന്നു. ജില്ലാ പൊലീസ് മേധാവി കെ. എസ്. സുദർശന്റെ നേതൃത്വത്തിൽ ആരംഭിച്ച പ്രത്യേക ദൗത്യത്തിൽ ഇതുവരെ 22 ക്രിമിനലുകൾ അറസ്റ്റിലായതായി പൊലീസ് അറിയിച്ചു.

ഓപ്പറേഷൻ സ്റ്റീൽ ബേഡ്: 22 ക്രിമിനലുകൾ അറസ്റ്റിൽ

ക്രിമിനൽ സംഘങ്ങളെ മുൻകൂട്ടി കണ്ടെത്തി കുറ്റകൃത്യങ്ങൾ തടയുക എന്ന ലക്ഷ്യത്തോടെ കഴിഞ്ഞ മാർച്ചിലാണ് ഓപ്പറേഷൻ സ്റ്റീൽ ബേഡ് ആരംഭിച്ചത്.

മാർച്ച് 26-ന് ആംസ് ആക്ട്, എക്സ്പ്ലോസീവ് ആക്ട് എന്നിവ പ്രകാരം എടത്തല, അങ്കമാലി സ്വദേശികൾ ഉൾപ്പെടെ നിരവധി പ്രതികളെ പൊലീസ് അറസ്റ്റ് ചെയ്തിരുന്നു. ഇവർക്കെതിരെ വിവിധ ക്രിമിനൽ കേസുകൾ നിലവിലുണ്ടെന്ന് പൊലീസ് അറിയിച്ചു.

റിസോർട്ടിൽ ഒത്തുകൂടിയ സംഘവും പിടിയിൽ

കോതമംഗലം പുന്നേക്കാട് കരിയിലപ്പാറയിലെ റിസോർട്ടിൽ പുതിയ കുറ്റകൃത്യങ്ങൾ ആസൂത്രണം ചെയ്യാൻ ഒത്തുകൂടിയതായി സംശയിക്കുന്ന നിരവധി പ്രതികളെയും പൊലീസ് പിടികൂടി.

കണ്ണൂർ, തിരുവനന്തപുരം, കൊച്ചി, ആലപ്പുഴ എന്നിവിടങ്ങളിൽ നിന്നുള്ള പ്രതികൾ ഹൈവേ റോബറി, കൊലപാതകശ്രമം, മയക്കുമരുന്ന് കടത്ത്, മോചനദ്രവ്യത്തിനായി ആളുകളെ തട്ടിക്കൊണ്ടുപോകൽ, സ്വർണക്കടത്ത്, സാമ്പത്തിക കുറ്റകൃത്യങ്ങൾ എന്നിവയുമായി ബന്ധപ്പെട്ട കേസുകളിൽ പ്രതികളാണെന്ന് പൊലീസ് വ്യക്തമാക്കി. ഇവർ ഉപയോഗിച്ചിരുന്ന ആഡംബര കാറുകളും മൊബൈൽ ഫോണുകളും കസ്റ്റഡിയിലെടുത്തു.

ഹൈവേ റോബറി സംഘം, സ്പാ പിരിവ് സംഘം എന്നിവർക്കെതിരെയും നടപടി

അത്താണിയിലെ ഒരു സ്പായിൽ ഭീഷണിപ്പെടുത്തി പിരിവ് നടത്താൻ ശ്രമിച്ച സംഭവത്തിൽ നിരവധി കേസുകളിലെ പ്രതികളായ നാല് പേരെ നെടുമ്പാശ്ശേരി പൊലീസ് അറസ്റ്റ് ചെയ്തു.

അതേസമയം, പൂതംകുറ്റി ഭാഗത്ത് വാഹന പരിശോധനയ്ക്കിടെ കത്തി കണ്ടെത്തിയതിനെ തുടർന്ന് നടത്തിയ അന്വേഷണത്തിൽ ഹൈവേ റോബറി നടത്താൻ പദ്ധതിയിട്ടിരുന്ന അഞ്ചംഗ സംഘത്തെയും അങ്കമാലി പൊലീസ് പിടികൂടി.

നിരീക്ഷണവും പ്രതിരോധ അറസ്റ്റും ശക്തമാക്കും

ഓപ്പറേഷൻ സ്റ്റീൽ ബേഡ് ഭാഗമായി ഇന്റലിജൻസ് ശേഖരണത്തിനും പ്രതികളെ കണ്ടെത്തുന്നതിനുമായി പ്രത്യേക സംഘങ്ങളെ നിയോഗിച്ചിട്ടുണ്ട്.

കുറ്റകൃത്യങ്ങൾ നടക്കുന്നതിന് മുമ്പ് തന്നെ പ്രതിരോധ അറസ്റ്റ് (Preventive Arrest) ഉൾപ്പെടെയുള്ള നടപടികൾ സ്വീകരിക്കുമെന്നും, അറസ്റ്റിലായവരുടെ മുൻ കേസുകളിൽ ലഭിച്ച ജാമ്യം റദ്ദാക്കുന്നതിനുള്ള നടപടികളും സ്വീകരിക്കുമെന്നും പൊലീസ് അറിയിച്ചു.

ഓപ്പറേഷൻ തുഫാനും ശക്തമായി തുടരുന്നു

അതേസമയം, ഓപ്പറേഷൻ തുഫാൻ ഭാഗമായുള്ള നടപടികളും ശക്തമായി തുടരുകയാണ്.

സമീപകാലത്ത് 18 കിലോ ഹൈബ്രിഡ് കഞ്ചാവ് പിടിച്ചെടുത്ത കേസിൽ എല്ലാ പ്രതികളെയും അറസ്റ്റ് ചെയ്തതായി പൊലീസ് അറിയിച്ചു. കേസിന്റെ മുഖ്യ ആസൂത്രകനെ തിരിച്ചറിഞ്ഞിട്ടുണ്ടെന്നും, നിലവിൽ വിദേശത്തുള്ള ഇയാളെ നാട്ടിലെത്തിച്ച് അറസ്റ്റ് ചെയ്യുന്നതിനുള്ള നടപടികൾ പുരോഗമിക്കുകയാണെന്നും പൊലീസ് വ്യക്തമാക്കി.