കർണാടകയിലെ യാദ്ഗിർ ജില്ലയിൽ അമിതമായ തോതിൽ എനർജി ഡ്രിങ്കുകൾ ഉപയോഗിച്ചതിനെത്തുടർന്ന് പതിനെട്ടു വയസ്സുകാരനായ ബാലു ദേശായി എന്ന വിദ്യാർഥി ദാരുണമായി മരണപ്പെട്ടു.
ഹുൻസാഗി സ്വദേശിയായ ബാലു ദിവസവും നാല് എനർജി ഡ്രിങ്കുകൾ വരെ കുടിക്കാറുണ്ടായിരുന്നുവെന്ന് നാട്ടുകാർ പറയുന്നു.
വീട്ടുകാർ പലതവണ വിലക്കിയിട്ടും ഈ ശീലം ഉപേക്ഷിക്കാൻ അവൻ തയ്യാറായിരുന്നില്ല. ആരോഗ്യനില വഷളായതിനെത്തുടർന്ന് ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.
വൃക്ക തകരാറാണ് മരണത്തിന് കാരണമായതെന്നാണ് ഡോക്ടർമാരുടെ പ്രാഥമിക നിഗമനം, എങ്കിലും മെഡിക്കൽ റിപ്പോർട്ട് ലഭിച്ച ശേഷം മാത്രമേ അന്തിമ സ്ഥിരീകരണം ഉണ്ടാവുകയുള്ളൂ.
More Read
ഈ സംഭവത്തിൽ പ്രതിഷേധം രേഖപ്പെടുത്തിക്കൊണ്ട് നാട്ടുകാർ എനർജി ഡ്രിങ്കുകൾക്കെതിരെ കർശന നിലപാട് സ്വീകരിച്ചു. യുവാക്കൾ തെരുവിലിറങ്ങി എനർജി ഡ്രിങ്ക് കുപ്പികളിലെ പാനീയം റോഡിലേക്ക് ഒഴിച്ച് തങ്ങളുടെ ശക്തമായ പ്രതിഷേധം പ്രകടിപ്പിച്ചു.
ഇത്തരം പാനീയങ്ങളുടെ അമിത ഉപയോഗം ആരോഗ്യത്തിന് എത്രത്തോളം അപകടകരമാണെന്നതിലേക്ക് ഈ സംഭവം വിരൽ ചൂണ്ടുന്നു.
മെഡിക്കൽ റിപ്പോർട്ടിലൂടെ മരണകാരണം വ്യക്തമാകുന്നതോടെ എനർജി ഡ്രിങ്കുകളുടെ ഉപയോഗത്തെക്കുറിച്ചുള്ള ചർച്ചകൾ കൂടുതൽ ശക്തമാകാനാണ് സാധ്യത.
More Read
English Summary
An 18-year-old student, Balu Desai, died in Karnataka, reportedly due to kidney failure caused by the excessive daily consumption of energy drinks. Locals protested against such beverages following his death.
