ലാല്ഗഡില് നിന്നും ദിബ്രുഗഢിലേക്ക് പോവുകയായിരുന്ന അവഥ് അസാം എക്സ്പ്രസ്സ് തീവണ്ടിയിൽ യാത്രക്കാരിയായ ഗർഭിണി പ്രസവിച്ചു. കഴിഞ്ഞ ജൂണ് 14 നായിരുന്നു റെയിൽവേ ജീവനക്കാരുടെയും സഹയാത്രക്കാരുടെയും കൃത്യമായ ഇടപെടലിലൂടെ ഒരു പുതുജീവൻ റെയിൽവേ കോച്ചിൽ പിറന്നത്.
ട്രെയിൻ അസമിലെ രംഗിയാ റെയില്വേ സ്റ്റേഷനോട് അടുത്തുകൊണ്ടിരിക്കുമ്പോഴാണ് യാത്രക്കാരിയായ യുവതിക്ക് അപ്രതീക്ഷിതമായി കടുത്ത പ്രസവവേദന അനുഭവപ്പെട്ടത്. യുവതിയുടെ അവസ്ഥ മനസ്സിലാക്കിയ യാത്രക്കാർ ഉടൻ തന്നെ വിവരം റെയിൽവേ അധികൃതരെ അറിയിക്കുകയായിരുന്നു. സന്ദേശം ലഭിച്ച ഉടൻ തന്നെ റെയില്വേ വിഭാഗം അടിയന്തര നടപടികൾ സ്വീകരിച്ചു.
ഡിവിഷണല് മെഡിക്കൽ ഓഫീസര് ഡോക്ടർ ശരത്ചന്ദ്രന്റെ നേരിട്ടുള്ള നേതൃത്വത്തിലുള്ള ഒരു പ്രത്യേക മെഡിക്കല് സംഘത്തെ റെയിൽവേ അധികൃതർ രംഗിയ റെയില്വേ സ്റ്റേഷനില് എല്ലാ സജ്ജീകരണങ്ങളോടെയും തയാറാക്കി നിർത്തിയിരുന്നു.
എന്നാല് ട്രെയിൻ സ്റ്റേഷനില് എത്തുന്നതിന് മുന്പുതന്നെ യുവതിയുടെ പ്രസവവേദന അസഹനീയമാംവിധം മൂര്ച്ഛിക്കുകയാണുണ്ടായത്. തുടർന്ന് ഒട്ടും സമയം കളയാതെ സഹയാത്രക്കാരിയായി ആ ട്രെയിനിൽ തന്നെയുണ്ടായിരുന്ന ജോര്ഹട്ട് ക്രിസ്ത്യൻ മിഷന് ആശുപത്രിയിലെ നഴ്സായ കൃഷ്ണാമ ഗോള്ഡ്സ്മിത്ത് ബെസ്ബര്വ രംഗത്തിറങ്ങി. ഇവർ അതീവ ശ്രദ്ധയോടെയും സുരക്ഷിതമായും യുവതിയുടെ പ്രസവം ട്രെയിൻ മുറിക്കുള്ളിൽ വെച്ച് തന്നെ എടുത്തു.
ഈ പ്രക്രിയയിൽ ട്രെയിനിലെ മറ്റ് സഹയാത്രക്കാരും ഡ്യൂട്ടിയിലുണ്ടായിരുന്ന റെയില്വേ ജീവനക്കാരും നഴ്സിന് ആവശ്യമായ എല്ലാവിധ സഹായങ്ങളും ഒരുക്കി കൂടെയുണ്ടായിരുന്നു. ട്രെയിന് പിന്നീട് രംഗിയ സ്റ്റേഷനില് എത്തിയപ്പോഴേക്കും കുഞ്ഞ് ജനിച്ചു കഴിഞ്ഞിരുന്നു.
More Read
മാസം തികയാതെയാണ് കുഞ്ഞ് ജനിച്ചതെന്നതിനാൽ മെഡിക്കൽ സംഘം അതീവ ജാഗ്രത പുലർത്തി. സ്റ്റേഷനിൽ തയാറായി നിന്ന റെയിൽവേ മെഡിക്കൽ സംഘം ഉടൻ തന്നെ പ്രാഥമിക ശുശ്രൂഷകൾ നൽകിയ ശേഷം മാതാവിനെയും കുഞ്ഞിനെയും വിദഗ്ധ പരിചരണത്തിനായി ഗുവാഹത്തി മെഡിക്കല് കോളേജ് ആശുപത്രിയിലേക്ക് മാറ്റി.
നിലവിൽ അമ്മയും കുഞ്ഞും പൂർണ്ണ ആരോഗ്യത്തോടെയും സുരക്ഷിതരായും ഇരിക്കുന്നുവെന്ന് നോർത്ത് ഈസ്റ്റ് ഫ്രോണ്ടിയർ റെയിൽവേ (NFR) അധികൃതർ വാർത്താക്കുറിപ്പിലൂടെ ഔദ്യോഗികമായി അറിയിച്ചു.
തീർത്തും പരിമിതമായ സാഹചര്യങ്ങൾ മാത്രമുള്ള ഓടിക്കൊണ്ടിരുന്ന ട്രെയിനിൽ വെച്ച് സ്വന്തം ഉത്തരവാദിത്തബോധത്തോടെ മുന്നോട്ടുവന്ന് സുരക്ഷിതമായി പ്രസവമെടുക്കാൻ നേതൃത്വം നൽകിയ നഴ്സ് കൃഷ്ണാമ ഗോൾഡ്സ്മിത്തിനെ റെയിൽവേ അധികൃതർ പ്രത്യേകം അഭിനന്ദിച്ചു. കൃഷ്ണാമയുടെ സമയോചിതവും ധീരവുമായ ഈ ഇടപെടൽ വലിയൊരു ദുരന്തം ഒഴിവാക്കാനും രണ്ട് ജീവനുകൾ സുരക്ഷിതമാക്കാനും സഹായിച്ചതായി റെയിൽവേ ഉദ്യോഗസ്ഥർ കൂട്ടിച്ചേർത്തു.
More Read
English Summary
A pregnant woman safely delivered a baby aboard the Avadh Assam Express near Rangiya station. As she went into labor, a co-passenger, Krishnama Goldsmith, who works as a nurse, performed the delivery with the help of railway staff. The mother and premature baby were later shifted to Guwahati Medical College.
