തിരുവനന്തപുരം മെഡിക്കൽ കോളേജിൽ ചികിത്സാ പിഴവ് ആരോപണം; രോഗി മരിച്ചു

തിരുവനന്തപുരം: തിരുവനന്തപുരം മെഡിക്കൽ കോളേജിൽ ചികിത്സയ്ക്കിടെ 87കാരൻ കട്ടിലിൽ നിന്ന് വീണ് മരിച്ചതുമായി ബന്ധപ്പെട്ട് ചികിത്സാ പിഴവ് ആരോപണം. കൊല്ലം ചടയമംഗലം സ്വദേശി സുകുമാര പിള്ളയാണ് മരിച്ചത്. കുടുംബത്തിന്റെ പരാതിയിൽ മെഡിക്കൽ കോളേജ് പൊലീസ് കേസെടുത്തു.

പക്ഷാഘാതത്തെ തുടർന്ന് ഈ മാസം 26നാണ് സുകുമാര പിള്ളയെ ആശുപത്രിയിൽ പ്രവേശിപ്പിച്ചത്. ചികിത്സയിലിരിക്കെ 29ന് കട്ടിലിൽ നിന്ന് വീണതിനു പിന്നാലെ ആരോഗ്യനില വഷളായെന്നാണ് കുടുംബത്തിന്റെ ആരോപണം.

തിരുവനന്തപുരം മെഡിക്കൽ കോളേജിൽ ചികിത്സയ്ക്കിടെ വീണു

കട്ടിലിൽ നിന്ന് വീണതിനെ തുടർന്ന് സുകുമാര പിള്ളയുടെ തലയ്ക്കും കണ്ണിനും പരിക്കേറ്റതായി കുടുംബം പറയുന്നു. വീഴുന്നതിന് മുമ്പ് സംസാരിച്ചിരുന്ന അദ്ദേഹം പിന്നീട് സംസാരിക്കാതായെന്നും കുടുംബം ആരോപിച്ചു.

ആരോഗ്യനില മോശമായിരുന്നിട്ടും ഐസിയുവിലേക്ക് മാറ്റിയില്ലെന്നും കുടുംബം പരാതിപ്പെട്ടു. തലയിൽ മുറിവുണ്ടായപ്പോൾ അതേ കട്ടിലിൽവെച്ചാണ് തുന്നൽ നടത്തിയതെന്നും ആരോപണമുണ്ട്.

ഹാൻഡ് റെയിൽ ഉള്ള കട്ടിൽ നൽകിയില്ലെന്ന് ആരോപണം

ഹാൻഡ് റെയിൽ ഉള്ള കട്ടിൽ നൽകിയിരുന്നെങ്കിൽ വീഴ്ച ഒഴിവാക്കാമായിരുന്നുവെന്നാണ് സുകുമാര പിള്ളയുടെ മകൾ ശ്യാമള ദേവി പറഞ്ഞത്.

അതേസമയം, ചികിത്സയ്ക്കിടെ സംഭവിച്ച വീഴ്ചയ്ക്ക് ആശുപത്രിയുടെ ഭാഗത്ത് നിന്ന് പിഴവുണ്ടായിട്ടില്ലെന്നാണ് തിരുവനന്തപുരം മെഡിക്കൽ കോളേജ് സൂപ്രണ്ടിന്റെ വിശദീകരണം.

ചികിത്സാ പിഴവില്ലെന്ന് മെഡിക്കൽ കോളേജ് സൂപ്രണ്ട്

രോഗിയോടൊപ്പം രണ്ട് ബന്ധുക്കൾ ഉണ്ടായിരുന്നെന്നും അവർ ഒപ്പമില്ലാത്ത സമയത്താണ് രോഗി കട്ടിലിൽ നിന്ന് വീണതെന്നും സൂപ്രണ്ട് വ്യക്തമാക്കി.

വീണ ഉടൻ തന്നെ ആവശ്യമായ ചികിത്സ നൽകിയെന്നും രോഗിയെ ഐസിയുവിലേക്ക് മാറ്റേണ്ട സാഹചര്യമുണ്ടായിരുന്നില്ലെന്നും അദ്ദേഹം പറഞ്ഞു.

ഹാൻഡ് റെയിൽ കട്ടിലിന് മാനദണ്ഡങ്ങളുണ്ടെന്ന് വിശദീകരണം

ഹാൻഡ് റെയിൽ ഉള്ള കട്ടിൽ നൽകുന്നതിന് ചില മാനദണ്ഡങ്ങളുണ്ടെന്നും അതിനാലാണ് അത്തരം കട്ടിൽ നൽകാതിരുന്നതെന്നും സൂപ്രണ്ട് വ്യക്തമാക്കി.

‘രോഗിയുടെ മരണത്തിൽ വീഴ്ച ഉണ്ടായിട്ടില്ല’ എന്ന നിലപാടാണ് ആശുപത്രി അധികൃതർ സ്വീകരിക്കുന്നത്. കുടുംബത്തിന്റെ പരാതിയിൽ പൊലീസ് കേസ് എടുത്ത സാഹചര്യത്തിൽ സംഭവത്തിൽ തുടർനടപടികൾ ഉണ്ടാകുമെന്നാണ് വിവരം.

English summary:

An 87-year-old man, Sukumara Pillai from Chadayamangalam in Kollam, died while undergoing treatment at Thiruvananthapuram Medical College. His family alleged that he fell from his hospital bed on August 29, suffered head and eye injuries and later died due to inadequate treatment. Following the family’s complaint, Medical College Police registered a case. However, the hospital superintendent denied any treatment lapse and said the patient received immediate care after the fall.