കണ്ണൂർ : ശ്രീകണ്ഠപുരം നഗരസഭയിലെ 2023ലെ മികച്ച കുട്ടിക്കർഷകനായ കോട്ടൂർ സ്വദേശി സ്റ്റീവോ സോണി (20) പരിയാരം ഗവ. മെഡിക്കൽ കോളജിൽ എംബിബിഎസിന് ചേർന്നു. പഠനത്തോടൊപ്പം ക്ഷീരകൃഷിയും പച്ചക്കറി കൃഷിയും മുന്നോട്ടുകൊണ്ടുപോയ സ്റ്റീവോയെ നാട്ടുകാർക്ക് പരിചയം സൈക്കിളിൽ വീടുകളിലെത്തുന്ന പാലുകാരനായാണ്.
സ്റ്റീവോ സോണിയുടെ വീട്ടിൽ പശുക്കളും കിടാരികളും
കോട്ടൂരിലെ വീട്ടിൽ സ്റ്റീവോയ്ക്ക് മൂന്ന് പശുക്കളും മൂന്ന് കിടാരികളുമുണ്ട്. വീടുകളിൽ പാൽ എത്തിക്കുന്നതിനൊപ്പം ക്ഷീരസംഘങ്ങൾക്കും പാൽ നൽകിയിരുന്നു.
കൂടാതെ, പയർ, പാവൽ, ചേന, ചേമ്പ് തുടങ്ങിയവയും സ്റ്റീവോ കൃഷി ചെയ്തു. വീട്ടിൽ ആടുകളും കോഴികളും വളർത്തിയിരുന്നു.
എൻട്രൻസ് പഠനത്തിനിടയിലും കൃഷി വിട്ടില്ല
കോട്ടൂർ ലിറ്റിൽ ഫ്ലവർ സ്കൂളിലും പൊടിക്കളം മേരിഗിരി ഇംഗ്ലിഷ് മീഡിയം സ്കൂളിലുമാണ് സ്റ്റീവോ പഠിച്ചത്. മെഡിക്കൽ പ്രവേശന പരീക്ഷയ്ക്കായി ഒരുവർഷം പാലായിൽ പരിശീലനം നടത്തിയപ്പോഴും ക്ഷീരകൃഷിയുമായുള്ള ബന്ധം അദ്ദേഹം ഉപേക്ഷിച്ചില്ല.
അതേസമയം, പാലായിലായിരുന്ന കാലത്തും ദിവസവും മാതാപിതാക്കളെ ഫോണിൽ വിളിച്ച് വീട്ടിലെ കൃഷിയുടെ കാര്യങ്ങൾ അന്വേഷിക്കുകയും ആവശ്യമായ നിർദേശങ്ങൾ നൽകുകയും ചെയ്തു.
ഇനി ലക്ഷ്യം ഡോക്ടറാകുക
പഠനവും കൃഷിയും ഒരുപോലെ മുന്നോട്ടുകൊണ്ടുപോയ സ്റ്റീവോ ഇപ്പോൾ മെഡിക്കൽ പഠനത്തിന്റെ പുതിയ അധ്യായത്തിലാണ്. പരിയാരം ഗവ. മെഡിക്കൽ കോളജിൽ എംബിബിഎസ് പഠനം പൂർത്തിയാക്കി ഡോക്ടറാകുകയാണ് ഇനി ലക്ഷ്യം.
കോട്ടൂർ നീരാക്കൽ എസ്റ്റേറ്റിന്റെ ക്വാർട്ടേഴ്സിലാണ് സ്റ്റീവോയും കുടുംബവും താമസിക്കുന്നത്. പിതാവ് സോണി, മാതാവ് സിനി. സഹോദരി അൽഫോൻസ.
English summary:Steevo Soni, a 20-year-old from Kottur in Sreekandapuram municipality, has joined the MBBS course at Pariyaram Government Medical College. He was named the municipality’s Best Child Farmer in 2023. Known locally for delivering milk to households on a bicycle, Steevo has three cows and three calves at home and has also supplied milk to dairy societies. He has been involved in vegetable farming and rearing goats and chickens. Even while attending entrance coaching in Pala for a year, he continued to stay connected with his family’s farming activities.
