പരിസ്ഥിതി സൗഹൃദ ഗതാഗത രംഗത്ത് വൻ വിപ്ലവത്തിന് തുടക്കമിട്ടുകൊണ്ട് രാജ്യത്തെ ആദ്യത്തെ ഹൈഡ്രജൻ എൻജിൻ തീവണ്ടി ഓടിത്തുടങ്ങി. വെള്ളിയാഴ്ച ഹരിയാനയിലെ ജിന്ദ് റെയിൽവേ സ്റ്റേഷനിൽ നടന്ന ചടങ്ങിൽ പ്രധാനമന്ത്രി നരേന്ദ്ര മോദി ട്രെയിൻ ഫ്ലാഗ് ഓഫ് ചെയ്തു.
ജിന്ദിനും സോനിപത്തിനും ഇടയിലുള്ള 89 കിലോമീറ്റർ ദൂരത്തിലാണ് രാജ്യത്തെ കന്നി ഹൈഡ്രജൻ ട്രെയിൻ സർവീസ് നടത്തുക. പൂർണമായും തദ്ദേശീയ സാങ്കേതികവിദ്യ ഉപയോഗിച്ച് ഇന്ത്യയിൽ തന്നെയാണ് ഈ സുസ്ഥിര ട്രെയിൻ വികസിപ്പിച്ചെടുത്തത്.
ഹൈഡ്രജൻ ട്രെയിൻ ഫ്ലാഗ് ഓഫ് ചെയ്തതിന് പുറമെ, ഹരിയാനയിലെ ജിന്ദിൽ നടപ്പിലാക്കുന്ന 14,700 കോടി രൂപയുടെ വിവിധ വികസന പദ്ധതികളുടെ ഉദ്ഘാടനവും തറക്കല്ലിടലും പ്രധാനമന്ത്രി നരേന്ദ്ര മോദി ചടങ്ങിൽ നിർവഹിച്ചു. പുകയോ മറ്റ് വിഷവാതകങ്ങളോ പുറന്തള്ളാതെ പൂർണ്ണമായും പരിസ്ഥിതി സൗഹൃദമായി യാത്ര ചെയ്യാം എന്നതാണ് ഈ ട്രെയിനുകളുടെ ഏറ്റവും വലിയ പ്രത്യേകത.
പ്രവർത്തിക്കുന്നത് ഫ്യൂവൽ സെൽ സാങ്കേതികവിദ്യയിൽ; വേഗത മണിക്കൂറിൽ 110 കിലോമീറ്റർ വരെ
ഹൈഡ്രജൻ ഫ്യൂവൽ സെൽ (Hydrogen Fuel Cell) സാങ്കേതികവിദ്യ അടിസ്ഥാനമാക്കിയാണ് ഈ അത്യാധുനിക തീവണ്ടി പ്രവർത്തിക്കുന്നത്. ഇതിൽ അടങ്ങിയിരിക്കുന്ന പ്രത്യേക സെല്ലുകളിലേക്ക് ഹൈഡ്രജനും അന്തരീക്ഷത്തിലെ ഓക്സിജനും സംയോജിപ്പിച്ചാണ് ട്രെയിൻ ഓടിക്കാനാവശ്യമായ വൈദ്യുതി ഉത്പാദിപ്പിക്കുന്നത്.
ഈ പ്രക്രിയയുടെ ഉപോൽപ്പന്നമായി പുറന്തള്ളുന്നത് വെറും ശുദ്ധജലവും നീരാവിയും മാത്രമാണ്. അതിനാൽ തന്നെ വായു മലിനീകരണം പൂർണ്ണമായും ഒഴിവാക്കാൻ ഇതിലൂടെ സാധിക്കും.
More Read
ട്രെയിനിന്റെ പ്രധാന സവിശേഷതകളും പ്രവർത്തന ശേഷിയും താഴെ പറയുന്നവയാണ്:
- യാത്രാ ശേഷി: ഒറ്റത്തവണ 2600 പേർക്ക് ഈ ട്രെയിനിൽ യാത്ര ചെയ്യാൻ സാധിക്കും.
- എൻജിൻ കരുത്ത്: തീവണ്ടിയുടെ സുഗമമായ ഓട്ടത്തിനായി 3200 എച്ച്.പി (HP) പ്രൊപ്പൽഷൻ സിസ്റ്റം എൻജിൻ സജ്ജമാക്കിയിട്ടുണ്ട്.
- വേഗത: നിലവിൽ സുരക്ഷ മുൻനിർത്തി മണിക്കൂറിൽ 75 കിലോമീറ്റർ വേഗത്തിലാകും ട്രെയിൻ സർവീസ് നടത്തുകയെങ്കിലും, ഈ വണ്ടിക്ക് മണിക്കൂറിൽ 110 കിലോമീറ്റർ വരെ പരമാവധി വേഗത കൈവരിക്കാനാകും.
- പ്ലാന്റ് സംവിധാനം: ഹരിയാനയിലെ ജിന്ദിൽ പ്രത്യേക ഹൈഡ്രജൻ ഉത്പാദന, റീഫ്യൂവലിങ് പ്ലാന്റും ഇന്ത്യൻ റെയിൽവേ സജ്ജമാക്കിയിട്ടുണ്ട്. ഇവിടെ കംപ്രസ് ചെയ്ത ഹൈഡ്രജൻ വാതകം സുരക്ഷിതമായി സംഭരിക്കാനും വിതരണം ചെയ്യാനും മികച്ച സംവിധാനങ്ങളുണ്ട്.
ഈ നേട്ടം കൈവരിക്കുന്ന ലോകത്തിലെ ആറാമത്തെ രാജ്യം
വാണിജ്യാടിസ്ഥാനത്തിൽ യാത്രക്കാർക്കായി ഹൈഡ്രജൻ യാത്രാവണ്ടികൾ ലോകത്താദ്യമായി അവതരിപ്പിച്ചത് ജർമനിയാണ്. ജർമനിക്ക് പിന്നാലെ ഫ്രാൻസ്, ജപ്പാൻ, ചൈന, യു.എസ്. (അമേരിക്ക) എന്നീ വികസിത രാജ്യങ്ങൾ ഈ നേട്ടം കൈവരിച്ചു.
ഇപ്പോൾ ഈ രാജ്യങ്ങളുടെ നിരയിലേക്ക് ഹൈഡ്രജൻ തീവണ്ടി വിജയകരമായി ഓടിക്കുന്ന ആറാമത്തെ രാജ്യമായി ഇന്ത്യയും മാറിയിരിക്കുകയാണ്. മറ്റു വിദേശ രാജ്യങ്ങളിൽ രണ്ട് മുതൽ നാല് വരെ കോച്ചുകൾ മാത്രമുള്ള ഹൈഡ്രജൻ ട്രെയിനുകളാണ് സർവീസ് നടത്തുന്നത് എന്നതും ഇന്ത്യയുടെ ഈ വലിയ തദ്ദേശീയ നേട്ടത്തിന് മാറ്റ് കൂട്ടുന്നു.
