മമ്മൂട്ടിയുടെ ഡയറ്റ് വീണ്ടും ചർച്ചയാകുകയാണ്. 74-ാം വയസിലും ഊർജസ്വലമായ ആരോഗ്യവും ഫിറ്റ്നസും നിലനിർത്തുന്ന നടന്റെ ചിട്ടയായ ഭക്ഷണക്രമത്തെക്കുറിച്ചുള്ള വിവരങ്ങളാണ് ശ്രദ്ധ നേടുന്നത്. ലളിതമായ വീട്ടുഭക്ഷണത്തിനും നിയന്ത്രിത ഭക്ഷണശീലങ്ങൾക്കുമാണ് അദ്ദേഹം പ്രാധാന്യം നൽകുന്നതെന്ന് മുൻപ് നൽകിയ ഒരു അഭിമുഖത്തിൽ അദ്ദേഹത്തിന്റെ വ്യക്തിഗത പാചകക്കാരൻ വ്യക്തമാക്കിയിരുന്നു.
ചോറിന് പകരം ഓട്സ് പുട്ടും ഗോതമ്പ് ദോശയും
മമ്മൂട്ടിയുടെ വ്യക്തിഗത പാചകക്കാരനായ ലെനീഷ് 2020-ൽ നൽകിയ അഭിമുഖത്തിൽ പറഞ്ഞതനുസരിച്ച്, അരിഭക്ഷണം താരം പരമാവധി ഒഴിവാക്കാറാണ് പതിവ്.
ചോറിന് പകരം ഓട്സ് ഉപയോഗിച്ച് തയ്യാറാക്കുന്ന പുട്ടാണ് അദ്ദേഹം കൂടുതൽ തിരഞ്ഞെടുക്കുന്നത്. അതേസമയം, അത്താഴത്തിന് സാധാരണയായി ഗോതമ്പ് ദോശയാണ് കഴിക്കുന്നത്. അതും പരമാവധി മൂന്ന് ദോശയിൽ കൂടുതൽ കഴിക്കാറില്ല.
വറുത്ത ഭക്ഷണം ഒഴിവാക്കി നാടൻ മീൻ കറിക്ക് മുൻഗണന
എണ്ണയിൽ വറുത്ത മീൻ വിഭവങ്ങളോട് മമ്മൂട്ടിക്ക് വലിയ താൽപര്യമില്ലെന്നാണ് ലെനീഷ് പറഞ്ഞത്.
പകരം, അൽപം മസാലയും തേങ്ങയും ചേർത്ത് തയ്യാറാക്കുന്ന നാടൻ മീൻ കറികളാണ് അദ്ദേഹം ഇഷ്ടപ്പെടുന്നത്. കരിമീൻ, മാലാൻ, തേങ്ങാപ്പാലും അരപ്പും ചേർത്ത നെത്തോലി കറി എന്നിവ അദ്ദേഹത്തിന്റെ പ്രിയ വിഭവങ്ങളിലുണ്ട്.
More Read
സലാഡും പയർ മെഴുക്കുപുരട്ടിയും സ്ഥിരം കൂട്ടുകറികൾ
മമ്മൂട്ടിയുടെ ഭക്ഷണത്തിൽ കുറഞ്ഞ മസാലയിൽ തയ്യാറാക്കുന്ന പയർ മെഴുക്കുപുരട്ടിയും കുരുമുളകുപൊടി വിതറിയ ഫ്രഷ് സലാഡും പ്രധാന സ്ഥാനമുണ്ട്.
കൂടാതെ, പ്രകൃതിദത്ത ചേരുവകൾ ഉപയോഗിച്ചുള്ള ലളിതമായ വീട്ടുഭക്ഷണത്തിനാണ് അദ്ദേഹം മുൻഗണന നൽകുന്നത്. ചില ദിവസങ്ങളിൽ തേങ്ങാപ്പാൽ ചേർത്ത ചിക്കൻ കറിയോ ചൂടുള്ള മഷ്റൂം സൂപ്പോ അത്താഴമായി തിരഞ്ഞെടുക്കാറുണ്ടെന്നും അഭിമുഖത്തിൽ പറയുന്നു.
ബീഫും ബിരിയാണിയും അപൂർവമായി മാത്രം
ബീഫും മട്ടണും ഇഷ്ടമാണെങ്കിലും അവ ദൈനംദിന ഭക്ഷണത്തിന്റെ ഭാഗമാക്കാറില്ലെന്നാണ് ലെനീഷ് വ്യക്തമാക്കിയത്.
More Read
ബിരിയാണി കഴിക്കണമെന്നുണ്ടെങ്കിൽ പോലും പുതുതായി തയ്യാറാക്കിയതുമാത്രമാണ് മമ്മൂട്ടി തിരഞ്ഞെടുക്കാറുള്ളത്. ഓണസദ്യ പോലുള്ള പ്രത്യേക അവസരങ്ങളിലും ചോറ് വളരെ ചെറിയ അളവിൽ മാത്രമാണ് കഴിക്കാറുള്ളതെന്നും അദ്ദേഹം പറഞ്ഞു.
