ന്യൂഡൽഹി: ലഡാക്കിൽ റോഡ് നിയന്ത്രണത്തെ തുടർന്ന് സുരക്ഷാ ഉദ്യോഗസ്ഥരോട് രൂക്ഷമായി പ്രതികരിച്ച യുവതി മാപ്പുപറഞ്ഞു. സംഭവത്തിന്റെ വീഡിയോ സമൂഹമാധ്യമങ്ങളിൽ വ്യാപകമായി പ്രചരിച്ചതിന് പിന്നാലെയാണ് 25കാരിയായ യുവതി വിശദീകരണവുമായി രംഗത്തെത്തിയത്. മണിക്കൂറുകളോളം റോഡിൽ കാത്തിരിക്കേണ്ടിവന്നതിന്റെ നിരാശയും ദേഷ്യവുമാണ് പ്രതികരണത്തിന് കാരണമെന്ന് അവർ വ്യക്തമാക്കി.
ലഡാക്ക് യുവതി മാപ്പുപറഞ്ഞു
ലഡാക്കിൽനിന്ന് ഡൽഹിയിലേക്ക് മടങ്ങുകയായിരുന്ന യുവതിയും സംഘവും മിനിമർഗ് ചെക്ക് പോസ്റ്റിന് സമീപമാണ് മണിക്കൂറുകളോളം കുടുങ്ങിയത്.
നാല് മണിക്കൂറോളം കാത്തിരുന്ന ശേഷവും യാത്ര തുടരാനാകാതെ വന്നതോടെ ഒരു സൈനികനോട് റോഡ് എപ്പോൾ തുറക്കുമെന്ന് യുവതി ചോദിച്ചു. ഒരു മണിക്കൂർ കൂടി കാത്തിരിക്കണമെന്നായിരുന്നു മറുപടി.
റോഡ് തുറക്കാത്തതിൽ പ്രകോപനം
പിന്നീട് റോഡ് അടച്ച നിലയിൽ തന്നെ തുടർന്നതോടെയാണ് താൻ പ്രകോപിതയായതെന്ന് യുവതി പറഞ്ഞു.
സൈന്യത്തെ അപമാനിക്കുകയോ സംഭവത്തിലൂടെ പ്രശസ്തി നേടുകയോ ആയിരുന്നില്ല തന്റെ ലക്ഷ്യമെന്നും അവർ വ്യക്തമാക്കി. ഇന്ത്യൻ സൈന്യത്തെ ഏറെ ബഹുമാനിക്കുന്നുവെന്നും തന്റെ വാക്കുകൾ സൈനികരെ വേദനിപ്പിക്കുമെന്ന് അന്ന് ചിന്തിച്ചില്ലെന്നും യുവതി പറഞ്ഞു.
More Read
സുരക്ഷാ നിയന്ത്രണത്തിന്റെ ഭാഗമായിരുന്നു റോഡ് അടച്ചത്
കാർഗിൽ വിജയ് ദിവസിനോട് അനുബന്ധിച്ച ദിവസങ്ങളിലാണ് സംഭവത്തിന്റെ വീഡിയോ ചിത്രീകരിച്ചതെന്ന് ലഡാക്ക് പൊലീസ് അറിയിച്ചു.
സുരക്ഷാ കാരണങ്ങളാൽ താൽക്കാലികമായി ഗതാഗത നിയന്ത്രണം ഏർപ്പെടുത്തിയിരുന്നതായും ദ്രാസ് മേഖലയിലെ മിനിമർഗ് ചെക്ക് പോസ്റ്റിന് സമീപമാണ് സംഭവമെന്നും പൊലീസ് വ്യക്തമാക്കി.
മിനിമർഗ്–സോജി ലാ–സോനാമാർഗ് റോഡിലൂടെയുള്ള യാത്രയ്ക്കും നിയന്ത്രണമുണ്ടായിരുന്നു.
‘ജെൻ സി’ പരാമർശവും ചർച്ചയായി
സുരക്ഷാ ഉദ്യോഗസ്ഥരുമായി യുവതി വാക്കുതർക്കത്തിലേർപ്പെടുന്നതും ചില യാത്രക്കാരെ തടഞ്ഞുനിർത്തിയശേഷം മന്ത്രി ഉൾപ്പെടെയുള്ള ചിലരെ കടത്തിവിട്ടതിനെ ചോദ്യം ചെയ്യുന്നതും വീഡിയോയിൽ കാണാം.
‘മന്ത്രിക്ക് മാത്രം എങ്ങനെ പോകാൻ കഴിഞ്ഞു? ഞങ്ങൾ ജെൻ സി ആണ്’ എന്ന യുവതിയുടെ പരാമർശവും സമൂഹമാധ്യമങ്ങളിൽ ശ്രദ്ധ നേടി.
സംഭവത്തിൽ ഖേദം പ്രകടിപ്പിച്ച് യുവതി
ചുറ്റുമുണ്ടായിരുന്നവർ പ്രോത്സാഹിപ്പിച്ച സാഹചര്യത്തിൽ അറിയാതെ ‘ജെൻ സി’ എന്ന് പറഞ്ഞതാണെന്നും അതിന് പ്രത്യേക ഉദ്ദേശ്യമൊന്നുമില്ലായിരുന്നുവെന്നും യുവതി പിന്നീട് വിശദീകരിച്ചു.
സംഭവം ഇത്രയും വലിയ വിവാദമാകുമെന്ന് കരുതിയിരുന്നില്ലെന്നും അവർ പറഞ്ഞു. തന്റെ പ്രതികരണം മൂലം നിരവധി പേർക്ക് വിഷമമുണ്ടായതിൽ ഖേദിക്കുന്നതായും വ്യക്തമാക്കി.
രാജ്യത്തെ ജനങ്ങളോടും ഇന്ത്യൻ സൈന്യത്തോടും ജമ്മു കശ്മീർ–ലഡാക്ക് പൊലീസിനോടും മുഖ്യമന്ത്രി ഒമർ അബ്ദുള്ളയോടും യുവതി മാപ്പ് ചോദിച്ചു.
